ਨਿਊਜ਼ੀਲੈਂਡ ਦੇ ਇਤਿਹਾਸ ਦੇ ਸਭ ਤੋਂ ਵੱਡੇ ਮੈਥਾਮਫੇਟਾਮੀਨ ਤਸਕਰੀ ਮਾਮਲੇ ਵਿੱਚ ਦੋਸ਼ੀ ਠਹਿਰਾਏ ਗਏ ਬਲਤੇਜ ਸਿੰਘ ਅਤੇ ਹਿਮਤਜੀਤ ਸਿੰਘ ਕਾਹਲੋਂ ਦੀ ਆਖ਼ਰੀ ਕਾਨੂੰਨੀ ਉਮੀਦ ਵੀ ਖਤਮ ਹੋ ਗਈ ਹੈ। ਦੇਸ਼ ਦੀ ਸੁਪਰੀਮ ਕੋਰਟ ਨੇ ਉਨ੍ਹਾਂ ਦੀ ਅਪੀਲ ਸੁਣਨ ਤੋਂ ਇਨਕਾਰ ਕਰਦਿਆਂ ਹੇਠਲੀਆਂ ਅਦਾਲਤਾਂ ਵੱਲੋਂ ਸੁਣਾਈਆਂ ਸਜ਼ਾਵਾਂ ਨੂੰ ਬਰਕਰਾਰ ਰੱਖਿਆ ਹੈ। ਅਦਾਲਤ ਨੇ ਫੈਸਲਾ ਸੁਣਾਉਂਦੇ ਹੋਏ ਕਿਹਾ ਕਿ ਬਲਤੇਜ ਸਿੰਘ ਨੂੰ ਦਿੱਤੀ ਗਈ 22 ਸਾਲ ਦੀ ਕੈਦ ਅਤੇ ਹਿਮਤਜੀਤ ਸਿੰਘ ਕਾਹਲੋਂ ਨੂੰ ਸੁਣਾਈ ਗਈ 21 ਸਾਲ ਦੀ ਸਜ਼ਾ, ਨਾਲ ਹੀ 10 ਸਾਲ ਦੀ ਲਾਜ਼ਮੀ ਗੈਰ-ਪੈਰੋਲ ਮਿਆਦ, ਉਨ੍ਹਾਂ ਦੇ ਅਪਰਾਧ ਦੀ ਗੰਭੀਰਤਾ ਦੇ ਮੁਤਾਬਕ ਪੂਰੀ ਤਰ੍ਹਾਂ ਉਚਿਤ ਹੈ।
ਦੋਵਾਂ ਦੋਸ਼ੀਆਂ ਨੇ 10 ਸਾਲ ਦੀ ਘੱਟੋ-ਘੱਟ ਗੈਰ-ਪੈਰੋਲ ਮਿਆਦ ਨੂੰ ਚੁਣੌਤੀ ਦਿੱਤੀ ਸੀ, ਪਰ ਸੁਪਰੀਮ ਕੋਰਟ ਨੇ ਇਸ ਦਲੀਲ ਨੂੰ ਰੱਦ ਕਰ ਦਿੱਤਾ। ਅਦਾਲਤ ਨੇ ਸਪਸ਼ਟ ਕੀਤਾ ਕਿ ਮਾਮਲੇ ਵਿੱਚ ਇਨਸਾਫ਼ ਦੀ ਕਿਸੇ ਵੀ ਤਰ੍ਹਾਂ ਦੀ ਉਲੰਘਣਾ ਨਹੀਂ ਹੋਈ।
ਅਦਾਲਤੀ ਰਿਕਾਰਡਾਂ ਅਨੁਸਾਰ, ਇਸ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਗਿਰੋਹ ਨੇ ਬੀਅਰ ਅਤੇ ਕੋਮਬੂਚਾ ਦੀਆਂ ਬੋਤਲਾਂ ਵਿੱਚ ਘੋਲ ਕੇ ਲਗਭਗ 741 ਕਿਲੋਗ੍ਰਾਮ ਮੈਥਾਮਫੇਟਾਮੀਨ ਨਿਊਜ਼ੀਲੈਂਡ ਵਿੱਚ ਪਹੁੰਚਾਈ ਸੀ। ਅਦਾਲਤ ਨੇ ਇਸਨੂੰ ਬੇਹੱਦ ਗੰਭੀਰ ਅਪਰਾਧ ਕਰਾਰ ਦਿੰਦਿਆਂ ਕਿਹਾ ਕਿ ਅਜਿਹੇ ਮਾਮਲਿਆਂ ਵਿੱਚ ਸਖ਼ਤ ਸਜ਼ਾ ਸਮਾਜ ਲਈ ਇੱਕ ਮਜ਼ਬੂਤ ਸੰਦੇਸ਼ ਹੈ।
ਫੈਸਲੇ ਵਿੱਚ ਇਹ ਵੀ ਦਰਜ ਹੈ ਕਿ ਕਾਹਲੋਂ ਦੀ ਭੂਮਿਕਾ ਮੁੱਖ ਦੋਸ਼ੀ ਬਲਤੇਜ ਸਿੰਘ ਨਾਲੋਂ ਘੱਟ ਸੀ, ਪਰ ਉਸ ਨਾਲ ਜੁੜਿਆ ਇੱਕ ਹੋਰ ਦੁਖਦਾਈ ਮਾਮਲਾ ਵੀ ਸਾਹਮਣੇ ਆਇਆ। 21 ਸਾਲਾ ਏਡਨ ਸਾਗਾਲਾ ਦੀ ਮੌਤ ਉਸ ਵੇਲੇ ਹੋ ਗਈ ਸੀ ਜਦੋਂ ਉਸ ਨੇ ਮੈਥ ਨਾਲ ਦੂਸ਼ਿਤ “ਹਨੀ ਬੇਅਰ” ਬੀਅਰ ਪੀ ਲਈ ਸੀ, ਜੋ ਕਾਹਲੋਂ ਵੱਲੋਂ ਉਸਨੂੰ ਦਿੱਤੀ ਗਈ ਸੀ। ਇਸ ਕਾਰਨ ਕਾਹਲੋਂ ਨੂੰ ਗੈਰ-ਇਰਾਦਤਨ ਕਤਲ ਅਤੇ ਮੈਥ ਸਪਲਾਈ ਨਾਲ ਸੰਬੰਧਿਤ ਦੋਸ਼ਾਂ ਵਿੱਚ ਵੀ ਦੋਸ਼ੀ ਕਰਾਰ ਦਿੱਤਾ ਗਿਆ ਸੀ।
ਅਦਾਲਤ ਨੇ ਕਿਹਾ ਕਿ ਇਹ ਨਸ਼ਾ ਤਸਕਰੀ ਨੈੱਟਵਰਕ ਭਾਰਤ, ਕੈਨੇਡਾ, ਅਮਰੀਕਾ ਅਤੇ ਨਿਊਜ਼ੀਲੈਂਡ ਤੱਕ ਫੈਲਿਆ ਹੋਇਆ ਸੀ। ਜਾਂਚ ਦੌਰਾਨ ਬਲਤੇਜ ਸਿੰਘ ਨੂੰ ਨਿਊਜ਼ੀਲੈਂਡ ਵਿੱਚ ਇਸ ਗਿਰੋਹ ਦਾ ਮੁੱਖ ਸੰਚਾਲਕ ਮੰਨਿਆ ਗਿਆ। ਉਸ ਨੇ ਉਹ ਸਟੋਰੇਜ ਯੂਨਿਟ ਕਿਰਾਏ ‘ਤੇ ਲਿਆ ਸੀ ਜਿੱਥੇ ਨਸ਼ੀਲੇ ਪਦਾਰਥਾਂ ਨੂੰ ਕੱਢ ਕੇ ਤਿਆਰ ਕੀਤਾ ਜਾਂਦਾ ਸੀ। ਪੁਲਿਸ ਨੇ ਉਸ ਦੀ ਕਾਰ ਵਿਚੋਂ 1,21,600 ਡਾਲਰ ਨਕਦ ਵੀ ਬਰਾਮਦ ਕੀਤੇ ਸਨ।
ਸੁਪਰੀਮ ਕੋਰਟ ਨੇ ਆਪਣੇ ਅੰਤਿਮ ਫੈਸਲੇ ਵਿੱਚ ਕਿਹਾ ਕਿ ਇੰਨੇ ਵੱਡੇ ਪੱਧਰ ਦੀ ਨਸ਼ਾ ਤਸਕਰੀ ਨਾਲ ਸਮਾਜ ਨੂੰ ਹੋਣ ਵਾਲਾ ਨੁਕਸਾਨ ਬਹੁਤ ਗੰਭੀਰ ਹੈ, ਇਸ ਲਈ ਦੋਸ਼ੀਆਂ ਨੂੰ ਦਿੱਤੀਆਂ ਗਈਆਂ ਸਜ਼ਾਵਾਂ ਪੂਰੀ ਤਰ੍ਹਾਂ ਜਾਇਜ਼ ਹਨ। ਇਸ ਫੈਸਲੇ ਨਾਲ ਦੋਵਾਂ ਵੱਲੋਂ ਕੀਤੀ ਗਈ ਆਖ਼ਰੀ ਕਾਨੂੰਨੀ ਕੋਸ਼ਿਸ਼ ਵੀ ਅਸਫਲ ਰਹੀ ਹੈ।