ਨਿਊਜ਼ੀਲੈਂਡ ‘ਚ NZTA ਦੇ ਨਾਮ ‘ਤੇ ਚਲਾਏ ਗਏ ਟੈਕਸਟ ਮੈਸੇਜ ਸਕੈਮ ਮਾਮਲੇ ‘ਚ 26 ਸਾਲਾ ਚੀਨੀ ਨਾਗਰਿਕ ਕਿੰਗਲੇ ਲਿਊ ਨੂੰ ਆਕਲੈਂਡ ਡਿਸਟ੍ਰਿਕਟ ਕੋਰਟ ਵੱਲੋਂ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ ਹੈ। ਅਦਾਲਤ ਨੇ ਉਸ ਨੂੰ ਧੋਖਾਧੜੀ ਰਾਹੀਂ ਸੰਪਤੀ ਹਾਸਿਲ ਕਰਨ ਦੇ ਪੰਜ ਮਾਮਲਿਆਂ ‘ਚ ਦੋਸ਼ੀ ਕਰਾਰ ਦਿੱਤਾ ਹੈ। ਜਾਂਚ ਅਨੁਸਾਰ ਲਿਊ ਜੁਲਾਈ 2025 ਵਿੱਚ ਵਿਜ਼ਟਰ ਵੀਜ਼ੇ ‘ਤੇ ਨਿਊਜ਼ੀਲੈਂਡ ਪਹੁੰਚੀ ਸੀ ਅਤੇ ਇੱਕ ਅੰਤਰਰਾਸ਼ਟਰੀ ਠੱਗੀ ਗਿਰੋਹ ਦੇ ਮੈਂਬਰ ਵੱਜੋਂ ਕੰਮ ਕਰ ਰਹੀ ਸੀ। ਗਿਰੋਹ ਲੋਕਾਂ ਨੂੰ ਜਾਅਲੀ NZTA ਰੋਡ ਟੋਲ ਫੀਸ ਦੇ ਸੁਨੇਹੇ ਭੇਜਦਾ ਸੀ, ਜਿਨ੍ਹਾਂ ਵਿੱਚ ਦਿੱਤੇ ਲਿੰਕ ਰਾਹੀਂ ਪੀੜਤਾਂ ਨੂੰ ਨਕਲੀ ਵੈੱਬਸਾਈਟ ‘ਤੇ ਲਿਜਾਇਆ ਜਾਂਦਾ ਸੀ।
ਜਦੋਂ ਲੋਕ ਉੱਥੇ ਆਪਣੀ ਕ੍ਰੈਡਿਟ ਕਾਰਡ ਜਾਂ ਬੈਂਕਿੰਗ ਜਾਣਕਾਰੀ ਦਰਜ ਕਰਦੇ ਸਨ ਤਾਂ ਇਹ ਵੇਰਵੇ ਠੱਗਾਂ ਦੇ ਹੱਥ ਲੱਗ ਜਾਂਦੇ ਸਨ। ਇਨ੍ਹਾਂ ਚੋਰੀ ਕੀਤੇ ਵੇਰਵਿਆਂ ਦੀ ਮਦਦ ਨਾਲ ਲਿਊ ਨੇ 20 ਤੋਂ ਵੱਧ ਆਈਫੋਨ ਅਤੇ ਹੋਰ ਮਹਿੰਗਾ ਸਮਾਨ ਖਰੀਦਿਆ, ਜਿਸ ਦੀ ਕੁੱਲ ਕੀਮਤ ਲਗਭਗ 89 ਹਜ਼ਾਰ ਡਾਲਰ ਸੀ। ਇੱਕ 63 ਸਾਲਾ ਪੀੜਤ ਨੇ ਅਦਾਲਤ ਵਿੱਚ ਦੱਸਿਆ ਕਿ ਉਸ ਨੇ ਟੋਲ ਫੀਸ ਬਾਰੇ ਆਏ ਸੁਨੇਹੇ ਨੂੰ ਅਸਲੀ ਸਮਝ ਕੇ ਆਪਣੀ ਕਾਰਡ ਜਾਣਕਾਰੀ ਸਾਂਝੀ ਕਰ ਦਿੱਤੀ ਸੀ। ਅਗਲੇ ਹੀ ਦਿਨ ਉਸ ਦੇ ਕਾਰਡ ਤੋਂ ਕਰੀਬ 16,690 ਡਾਲਰ ਦੀ ਖਰੀਦਦਾਰੀ ਕਰ ਲਈ ਗਈ, ਜਿਸ ਵਿੱਚ ਆਈਫੋਨ, ਪ੍ਰੈਜ਼ੀ ਕਾਰਡ ਅਤੇ ਹੋਰ ਸਮਾਨ ਸ਼ਾਮਿਲ ਸੀ।
ਪੁਲਿਸ ਜਾਂਚ ਦੌਰਾਨ CCTV ਫੁਟੇਜ ਅਤੇ ਭੁਗਤਾਨ ਰਿਕਾਰਡਾਂ ਦੇ ਆਧਾਰ ‘ਤੇ ਲਿਊ ਦੀ ਪਹਿਚਾਣ ਹੋਈ। ਉਸ ਦੀ ਗ੍ਰਿਫ਼ਤਾਰੀ ਉਸ ਸਮੇਂ ਹੋਈ ਜਦੋਂ ਉਸ ਨੇ ਚੋਰੀ ਕੀਤੇ ਕਾਰਡਾਂ ਦੀ ਵਰਤੋਂ ਕਰਕੇ ਆਕਲੈਂਡ ਦੇ ਲੂਈ ਵਿਟਨ ਸਟੋਰ ਤੋਂ ਲਗਭਗ 17,000 ਡਾਲਰ ਦਾ ਲਗਜ਼ਰੀ ਸਮਾਨ ਖਰੀਦਿਆ। ਅਦਾਲਤ ਵਿੱਚ ਬਚਾਅ ਪੱਖ ਨੇ ਦਲੀਲ ਦਿੱਤੀ ਕਿ ਲਿਊ ਜੂਏ ਦੀ ਲਤ ਅਤੇ ਕਰਜ਼ੇ ਦੇ ਦਬਾਅ ਕਾਰਨ ਇਸ ਅਪਰਾਧ ਵਿੱਚ ਸ਼ਾਮਿਲ ਹੋਈ ਸੀ, ਪਰ ਅਦਾਲਤ ਨੇ ਉਸ ਦੀ ਭੂਮਿਕਾ ਨੂੰ ਗੰਭੀਰ ਮੰਨਦਿਆਂ ਸਜ਼ਾ ਸੁਣਾਈ ਹੈ।
ਪੁਲਿਸ ਨੇ ਲੋਕਾਂ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਸਰਕਾਰੀ ਏਜੰਸੀਆਂ ਦੇ ਨਾਮ ‘ਤੇ ਆਉਣ ਵਾਲੇ ਕਿਸੇ ਵੀ ਟੈਕਸਟ ਮੈਸੇਜ ਵਿੱਚ ਦਿੱਤੇ ਲਿੰਕ ‘ਤੇ ਕਲਿੱਕ ਕਰਨ ਤੋਂ ਪਹਿਲਾਂ ਉਸ ਦੀ ਪੁਸ਼ਟੀ ਜ਼ਰੂਰ ਕਰਨ ਅਤੇ ਆਪਣੀ ਬੈਂਕਿੰਗ ਜਾਂ ਕ੍ਰੈਡਿਟ ਕਾਰਡ ਜਾਣਕਾਰੀ ਅਣਪਛਾਤੀਆਂ ਵੈੱਬਸਾਈਟਾਂ ‘ਤੇ ਕਦੇ ਵੀ ਸਾਂਝੀ ਨਾ ਕਰਨ।