ਸ਼੍ਰੀਲੰਕਾ ਵਿੱਚ ਇੱਕ ਵੱਡਾ ਹਵਾਈ ਹਾਦਸਾ ਹੋਣ ਤੋਂ ਟਲ ਗਿਆ, ਜਦੋਂ ਕੋਲੰਬੋ ਤੋਂ ਸਿਡਨੀ ਜਾ ਰਹੇ ਸ਼੍ਰੀਲੰਕਨ ਏਅਰਲਾਈਨਜ਼ ਦੇ ਇੱਕ ਯਾਤਰੀ ਜਹਾਜ਼ ‘ਤੇ ਉਡਾਣ ਦੌਰਾਨ ਬਿਜਲੀ ਡਿੱਗ ਗਈ। ਪਾਇਲਟ ਅਤੇ ਫਲਾਈਟ ਕ੍ਰੂ ਦੀ ਤੁਰੰਤ ਸੂਝਬੂਝ ਕਾਰਨ ਜਹਾਜ਼ ਨੂੰ ਸੁਰੱਖਿਅਤ ਢੰਗ ਨਾਲ ਵਾਪਿਸ ਲੈਂਡ ਕਰਵਾ ਲਿਆ ਗਿਆ ਅਤੇ ਸਾਰੇ ਯਾਤਰੀਆਂ ਦੀ ਜਾਨ ਬਚ ਗਈ।
ਮਿਲੀ ਜਾਣਕਾਰੀ ਅਨੁਸਾਰ, 12 ਜੂਨ ਦੀ ਰਾਤ ਕਰੀਬ 1 ਵਜੇ ਕੋਲੰਬੋ ਤੋਂ ਸਿਡਨੀ ਲਈ ਉਡਾਣ ਭਰਨ ਵਾਲੇ ਏਅਰਬਸ A330-243 ਜਹਾਜ਼ ਨੂੰ ਖਰਾਬ ਮੌਸਮ ਦਾ ਸਾਹਮਣਾ ਕਰਨਾ ਪਿਆ। ਉਡਾਣ ਦੌਰਾਨ ਜਹਾਜ਼ ਦੇ ਖੱਬੇ ਇੰਜਣ ‘ਤੇ ਬਿਜਲੀ ਡਿੱਗ ਗਈ, ਜਿਸ ਕਾਰਨ ਇੰਜਣ ਦੇ ਬਾਹਰੀ ਹਿੱਸੇ ਨੂੰ ਨੁਕਸਾਨ ਪਹੁੰਚਿਆ। ਇੰਜਣ ਕਵਰ ‘ਤੇ ਸੜਨ ਦੇ ਨਿਸ਼ਾਨ ਪਾਏ ਗਏ ਅਤੇ ਕੁਝ ਹਿੱਸੇ ਵੀ ਪ੍ਰਭਾਵਿਤ ਹੋਏ।
ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਫਲਾਈਟ ਕ੍ਰੂ ਨੇ ਤੁਰੰਤ ਜਹਾਜ਼ ਨੂੰ ਵਾਪਸ ਮੋੜਨ ਦਾ ਫੈਸਲਾ ਕੀਤਾ। ਇਸ ਤੋਂ ਬਾਅਦ ਜਹਾਜ਼ ਨੂੰ ਸੁਰੱਖਿਅਤ ਢੰਗ ਨਾਲ ਬੰਡਾਰਨਾਇਕੇ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਉਤਾਰ ਲਿਆ ਗਿਆ।
ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਘਟਨਾ ਵਿੱਚ ਕਿਸੇ ਵੀ ਯਾਤਰੀ ਜਾਂ ਕ੍ਰੂ ਮੈਂਬਰ ਨੂੰ ਕੋਈ ਸੱਟ ਨਹੀਂ ਲੱਗੀ। ਜਹਾਜ਼ ਵਿੱਚ ਕੁੱਲ 207 ਯਾਤਰੀ ਅਤੇ 16 ਕ੍ਰੂ ਮੈਂਬਰ ਸਵਾਰ ਸਨ, ਜੋ ਸਾਰੇ ਸੁਰੱਖਿਅਤ ਹਨ।
ਏਅਰਲਾਈਨ ਵੱਲੋਂ ਜਾਰੀ ਬਿਆਨ ਮੁਤਾਬਿਕ, ਯਾਤਰੀਆਂ ਨੂੰ ਦੂਜੇ ਏਅਰਬਸ A330 ਜਹਾਜ਼ ਵਿੱਚ ਤਬਦੀਲ ਕੀਤਾ ਗਿਆ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਸਿਡਨੀ ਲਈ ਰਵਾਨਾ ਕਰ ਦਿੱਤਾ ਗਿਆ। ਉਧਰ, ਬਿਜਲੀ ਦੀ ਲਪੇਟ ਵਿੱਚ ਆਏ ਜਹਾਜ਼ ਨੂੰ ਵਿਸਥਾਰਪੂਰਵਕ ਤਕਨੀਕੀ ਜਾਂਚ ਅਤੇ ਇੰਜਣ ਦੀ ਮੁਰੰਮਤ ਲਈ ਏਅਰਲਾਈਨ ਦੇ ਹੈਂਗਰ ਵਿੱਚ ਭੇਜ ਦਿੱਤਾ ਗਿਆ ਹੈ।
ਹਾਦਸਾ ਟਲਣ ਤੋਂ ਬਾਅਦ ਯਾਤਰੀਆਂ ਅਤੇ ਏਅਰਲਾਈਨ ਪ੍ਰਬੰਧਨ ਨੇ ਪਾਇਲਟ ਅਤੇ ਫਲਾਈਟ ਕ੍ਰੂ ਦੀ ਸੂਝਬੂਝ ਅਤੇ ਤੁਰੰਤ ਫੈਸਲੇ ਦੀ ਸ਼ਲਾਂਘਾ ਕੀਤੀ ਹੈ।