ਨਿਊਜ਼ੀਲੈਂਡ ਦੇ ਮੱਧ ਅਤੇ ਹੇਠਲੇ ਉੱਤਰੀ ਟਾਪੂ ਵਿੱਚ ਆਏ ਤੂਫ਼ਾਨੀ ਮੌਸਮ ਨੇ ਬਿਜਲੀ ਸਪਲਾਈ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਸ਼ਨੀਵਾਰ ਸਵੇਰੇ ਵੀ ਹਜ਼ਾਰਾਂ ਘਰ ਬਿਜਲੀ ਤੋਂ ਬਿਨਾਂ ਰਹੇ, ਜਦਕਿ ਤੇਜ਼ ਹਵਾਵਾਂ ਕਾਰਨ ਕਈ ਇਲਾਕਿਆਂ ਵਿੱਚ ਬਿਜਲੀ ਦੇ ਢਾਂਚੇ ਨੂੰ ਨੁਕਸਾਨ ਪਹੁੰਚਿਆ।
ਵੈਲਿੰਗਟਨ ਦੀ ਅਰੋਹਾਟਾ ਜੇਲ੍ਹ ਵੀ ਇਸ ਸੰਕਟ ਤੋਂ ਬਚ ਨਾ ਸਕੀ। ਸ਼ੁੱਕਰਵਾਰ ਨੂੰ ਖਰਾਬ ਮੌਸਮ ਦੌਰਾਨ ਜੇਲ੍ਹ ਦੇ ਜਨਰੇਟਰ ਵਿੱਚ ਆਈ ਤਕਨੀਕੀ ਖਰਾਬੀ ਕਾਰਨ ਕੁਝ ਸਮੇਂ ਲਈ ਬਿਜਲੀ ਸਪਲਾਈ ਠੱਪ ਹੋ ਗਈ। ਇਸ ਦੌਰਾਨ ਫ਼ੋਨ, ਕੰਪਿਊਟਰ ਅਤੇ ਲਾਈਟਾਂ ਪ੍ਰਭਾਵਿਤ ਹੋਣ ਕਾਰਨ ਸਵੇਰੇ 11:20 ਵਜੇ ਜੇਲ੍ਹ ਨੂੰ ਲਾਕਡਾਊਨ ਕਰਨਾ ਪਿਆ। ਮੁਰੰਮਤ ਟੀਮ ਨੇ ਜਨਰੇਟਰ ਦੀ ਖਰਾਬੀ ਦੂਰ ਕਰਕੇ ਕਰੀਬ 12:12 ਵਜੇ ਸਪਲਾਈ ਮੁੜ ਬਹਾਲ ਕਰ ਦਿੱਤੀ।
ਦੂਜੇ ਪਾਸੇ, Powerco ਦੇ ਨੈੱਟਵਰਕ ਨਾਲ ਜੁੜੀਆਂ 2,000 ਤੋਂ ਵੱਧ ਜਾਇਦਾਦਾਂ ਵਿੱਚ ਸ਼ਨੀਵਾਰ ਸਵੇਰ ਤੱਕ ਵੀ ਬਿਜਲੀ ਬਹਾਲ ਨਹੀਂ ਹੋ ਸਕੀ। ਇਸ ਤੋਂ ਇਲਾਵਾ Wellington Electricity ਦੇ ਲਗਭਗ 450 ਗਾਹਕ ਵੀ ਬਿਜਲੀ ਦੀ ਉਡੀਕ ਕਰ ਰਹੇ ਸਨ।
ਕੰਪਨੀ ਅਨੁਸਾਰ ਸ਼ੁੱਕਰਵਾਰ ਦੀਆਂ ਤੇਜ਼ ਹਵਾਵਾਂ ਨੇ ਤਾਰਾਨਾਕੀ, ਵਾਇਰਾਰਾਪਾ, ਵਾਂਗਾਨੂਈ ਅਤੇ ਮਨਾਵਾਤੂ ਖੇਤਰਾਂ ਵਿੱਚ ਵੱਡਾ ਨੁਕਸਾਨ ਕੀਤਾ। ਸਵੇਰੇ 10 ਵਜੇ ਤੱਕ ਤਾਰਾਨਾਕੀ ਵਿੱਚ ਸਭ ਤੋਂ ਵੱਧ 2,046 ਗਾਹਕ ਪ੍ਰਭਾਵਿਤ ਸਨ, ਜਦਕਿ ਵਾਇਰਾਰਾਪਾ ਵਿੱਚ 184, ਵਾਂਗਾਨੂਈ ਵਿੱਚ 118 ਅਤੇ ਮਨਾਵਾਤੂ ਵਿੱਚ 40 ਘਰਾਂ ਦੀ ਬਿਜਲੀ ਬੰਦ ਸੀ।
Powerco ਨੇ ਕਿਹਾ ਕਿ ਖਰਾਬ ਮੌਸਮ ਕਾਰਨ ਕਈ ਥਾਵਾਂ ‘ਤੇ ਮੁਰੰਮਤ ਕਰਨਾ ਖਤਰਨਾਕ ਸਾਬਤ ਹੋ ਰਿਹਾ ਸੀ, ਜਿਸ ਨਾਲ ਬਿਜਲੀ ਬਹਾਲ ਕਰਨ ਵਿੱਚ ਦੇਰੀ ਹੋਈ। ਕੰਪਨੀ ਨੇ ਦੱਸਿਆ ਕਿ ਵੱਖ-ਵੱਖ ਖੇਤਰਾਂ ਤੋਂ ਵਾਧੂ ਮੁਰੰਮਤ ਟੀਮਾਂ ਨੂੰ ਵੀ ਕੰਮ ‘ਤੇ ਲਾਇਆ ਗਿਆ ਹੈ, ਪਰ ਇਸ ਵੇਲੇ ਬਿਜਲੀ ਪੂਰੀ ਤਰ੍ਹਾਂ ਕਦੋਂ ਬਹਾਲ ਹੋਵੇਗੀ, ਇਸ ਬਾਰੇ ਕੋਈ ਨਿਰਧਾਰਤ ਸਮਾਂ ਨਹੀਂ ਦਿੱਤਾ ਜਾ ਸਕਦਾ।