ਨਿਊਜ਼ੀਲੈਂਡ ਸਰਕਾਰ ਦੀ ਫਿਊਲ ਸਹਾਇਤਾ ਯੋਜਨਾ ਨੂੰ ਲੈ ਕੇ ਨਵੇਂ ਅੰਕੜਿਆਂ ਤੋਂ ਪਤਾ ਲੱਗਿਆ ਹੈ ਕਿ ਹੁਣ ਤੱਕ ਉਮੀਦ ਨਾਲੋਂ ਘੱਟ ਪਰਿਵਾਰਾਂ ਨੂੰ ਇਸ ਦਾ ਲਾਭ ਮਿਲਿਆ ਹੈ। ਇਨਲੈਂਡ ਰੇਵਨਿਊ (IRD) ਦੇ ਅੰਕੜਿਆਂ ਅਨੁਸਾਰ 1 ਅਪ੍ਰੈਲ ਤੋਂ ਬਾਅਦ ਹਰ ਹਫ਼ਤੇ ਔਸਤ ਕਰੀਬ 95,000 ਪਰਿਵਾਰਾਂ ਨੂੰ ਹੀ ਫਿਊਲ ਰਾਹਤ ਰਕਮ ਜਾਰੀ ਕੀਤੀ ਗਈ ਹੈ, ਜਦਕਿ ਕੁੱਲ 1,06,120 ਪਰਿਵਾਰਾਂ ਨੇ ਘੱਟੋ-ਘੱਟ ਇੱਕ ਵਾਰ ਇਹ ਭੁਗਤਾਨ ਪ੍ਰਾਪਤ ਕੀਤਾ ਹੈ।
ਮਾਰਚ ਵਿੱਚ ਸਰਕਾਰ ਨੇ ਐਲਾਨ ਕੀਤਾ ਸੀ ਕਿ ਲਗਭਗ 1.57 ਲੱਖ ਪਰਿਵਾਰ ਇਸ ਯੋਜਨਾ ਦੇ ਦਾਇਰੇ ਵਿੱਚ ਆਉਣਗੇ। ਇਸ ਤਹਿਤ ਬਹੁਤੇ ਯੋਗ ਪਰਿਵਾਰਾਂ ਨੂੰ ਹਫ਼ਤੇਵਾਰ 50 ਡਾਲਰ ਦੀ ਰਾਹਤ ਦਿੱਤੀ ਜਾਣੀ ਹੈ, ਜਦਕਿ ਕੁਝ ਪਰਿਵਾਰਾਂ ਨੂੰ ਇਨ-ਵਰਕ ਟੈਕਸ ਕਰੈਡਿਟ ਰਾਹੀਂ ਘੱਟ ਰਕਮ ਮਿਲੇਗੀ।
ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਨੇ ਕਿਹਾ ਕਿ ਯੋਜਨਾ ਬਾਰੇ ਗਲਤ ਧਾਰਣਾ ਬਣਾਈ ਜਾ ਰਹੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ 1.57 ਲੱਖ ਪਰਿਵਾਰ ਸਾਲ ਭਰ ਦੌਰਾਨ ਵੱਖ-ਵੱਖ ਸਮਿਆਂ ‘ਤੇ ਇਸ ਯੋਜਨਾ ਦਾ ਲਾਭ ਲੈਣਗੇ ਅਤੇ ਇਹ ਜ਼ਰੂਰੀ ਨਹੀਂ ਕਿ ਸਾਰੇ ਪਰਿਵਾਰ ਇੱਕੋ ਸਮੇਂ ਹਫ਼ਤਾਵਾਰ ਭੁਗਤਾਨ ਪ੍ਰਾਪਤ ਕਰਨ।
ਸਰਕਾਰ ਮੁਤਾਬਿਕ ਯੋਗ ਪਰਿਵਾਰਾਂ ਕੋਲ ਭੁਗਤਾਨ ਪ੍ਰਾਪਤ ਕਰਨ ਲਈ ਕਈ ਵਿਕਲਪ ਹਨ। ਉਹ ਚਾਹੁਣ ਤਾਂ ਰਕਮ ਹਫ਼ਤਾਵਾਰ, ਪੰਦਰਵਾੜੇ ਬਾਅਦ ਜਾਂ ਟੈਕਸ ਸਾਲ ਦੇ ਅੰਤ ‘ਤੇ ਇਕਮੁਸ਼ਤ ਵੀ ਲੈ ਸਕਦੇ ਹਨ। ਅੰਦਾਜ਼ਾ ਹੈ ਕਿ ਲਗਭਗ 20 ਫ਼ੀਸਦੀ ਪਰਿਵਾਰ ਇਕਮੁਸ਼ਤ ਭੁਗਤਾਨ ਨੂੰ ਤਰਜੀਹ ਦੇਣਗੇ।
ਇਸੇ ਵਿਚਕਾਰ ਨਿਕੋਲਾ ਵਿਲਿਸ ਨੇ ਕਿਹਾ ਕਿ ਦੇਸ਼ ਵਿੱਚ 91 ਆਕਟੇਨ ਪੈਟਰੋਲ ਦੀ ਔਸਤ ਕੀਮਤ 3 ਡਾਲਰ ਪ੍ਰਤੀ ਲੀਟਰ ਤੋਂ ਹੇਠਾਂ ਆਉਣ ਦੀ ਸੰਭਾਵਨਾ ਹੈ। ਜੇ ਇਹ ਕੀਮਤ ਲਗਾਤਾਰ ਚਾਰ ਹਫ਼ਤਿਆਂ ਤੱਕ 3 ਡਾਲਰ ਤੋਂ ਘੱਟ ਰਹਿੰਦੀ ਹੈ ਤਾਂ ਸਰਕਾਰ ਵੱਲੋਂ ਦਿੱਤੀ ਜਾ ਰਹੀ ਅਸਥਾਈ ਫਿਊਲ ਰਾਹਤ ਯੋਜਨਾ ਨੂੰ ਸਮਾਪਤ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਕਮੀ ਘਰੇਲੂ ਪਰਿਵਾਰਾਂ ਅਤੇ ਕਾਰੋਬਾਰਾਂ ਦੋਵਾਂ ਲਈ ਰਾਹਤ ਦੀ ਖ਼ਬਰ ਹੈ।