ਵੈਲਿੰਗਟਨ: ਨਿਊਜ਼ੀਲੈਂਡ ਪੁਲਿਸ ਨੇ ਭਾਰਤੀ ਮੂਲ ਦੇ ਸੀਨੀਅਰ ਅਧਿਕਾਰੀ ਰਾਕੇਸ਼ ਨਾਇਡੂ ਦੇ ਪੁਲਿਸ ਅਧਿਕਾਰ ਅਤੇ ਵਰਦੀ ਪਹਿਨਣ ਦੀ ਇਜਾਜ਼ਤ ਅਸਥਾਈ ਤੌਰ ‘ਤੇ ਰੋਕ ਦਿੱਤੀ ਹੈ। ਇਹ ਕਦਮ ਇਸ ਲਈ ਚੁੱਕਿਆ ਗਿਆ ਹੈ ਕਿਉਂਕਿ ਨਾਇਡੂ ਇਸ ਸਾਲ ਹੋਣ ਵਾਲੀਆਂ ਨਿਊਜ਼ੀਲੈਂਡ ਆਮ ਚੋਣਾਂ ਵਿੱਚ ਲੇਬਰ ਪਾਰਟੀ ਵੱਲੋਂ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਹਨ।
ਪੁਲਿਸ ਦੇ ਸਹਾਇਕ ਕਮਿਸ਼ਨਰ ਟਿਮ ਐਂਡਰਸਨ ਨੇ ਦੱਸਿਆ ਕਿ ਰਾਕੇਸ਼ ਨਾਇਡੂ ਅਗਸਤ ਦੇ ਅੰਤ ਤੱਕ ਪੁਲਿਸ ਵਿਭਾਗ ਦਾ ਹਿੱਸਾ ਰਹਿਣਗੇ। ਇਸ ਸਮੇਂ ਦੌਰਾਨ ਉਹ National Manager – Ethnic, Iwi and Communities Partnerships ਦੇ ਅਹੁਦੇ ਨਾਲ ਜੁੜੀਆਂ ਜ਼ਿੰਮੇਵਾਰੀਆਂ ਨਵੇਂ ਅਧਿਕਾਰੀਆਂ ਨੂੰ ਸੌਂਪਣ ਅਤੇ ਟੀਮ ਦੇ ਸੁਚਾਰੂ ਤਬਾਦਲੇ ਦਾ ਕੰਮ ਸੰਭਾਲਣਗੇ। ਇਸ ਦੇ ਨਾਲ ਹੀ ਉਹ ਸੱਭਿਆਚਾਰਕ ਸਮਝ ਨਾਲ ਸੰਬੰਧਿਤ ਇੱਕ ਅੰਦਰੂਨੀ ਪ੍ਰੋਜੈਕਟ ਵਿੱਚ ਵੀ ਯੋਗਦਾਨ ਦੇਣਗੇ।
ਮੀਡੀਆ ਰਿਪੋਰਟਾਂ ਅਨੁਸਾਰ, ਜਦੋਂ ਤੱਕ ਨਾਇਡੂ ਅਧਿਕਾਰਕ ਤੌਰ ‘ਤੇ ਚੋਣ ਪ੍ਰਚਾਰ ਲਈ ਛੁੱਟੀ ‘ਤੇ ਨਹੀਂ ਜਾਂਦੇ, ਉਹ ਲੇਬਰ ਪਾਰਟੀ ਦੀ ਕਿਸੇ ਵੀ ਚੋਣ ਮੁਹਿੰਮ ਵਿੱਚ ਸ਼ਾਮਿਲ ਨਹੀਂ ਹੋ ਸਕਣਗੇ। ਇਸ ਦੌਰਾਨ ਉਹ ਪੁਲਿਸ ਦੇ ਕਾਨੂੰਨੀ ਅਧਿਕਾਰਾਂ ਦੀ ਵਰਤੋਂ ਨਹੀਂ ਕਰਨਗੇ, ਪੁਲਿਸ ਵਰਦੀ ਨਹੀਂ ਪਾ ਸਕਣਗੇ ਅਤੇ ਨਾ ਹੀ ਕਿਸੇ ਜਨਤਕ ਸਮਾਗਮ ਜਾਂ ਕਮਿਊਨਿਟੀ ਮੀਟਿੰਗ ਵਿੱਚ ਪੁਲਿਸ ਦੀ ਨੁਮਾਇੰਦਗੀ ਕਰ ਸਕਣਗੇ।
ਰਾਕੇਸ਼ ਨਾਇਡੂ ਨੂੰ ਜੂਨ ਮਹੀਨੇ ਵਿੱਚ ਲੇਬਰ ਪਾਰਟੀ ਦੀ ਉਮੀਦਵਾਰ ਸੂਚੀ ਵਿੱਚ 13ਵੇਂ ਸਥਾਨ ‘ਤੇ ਸ਼ਾਮਿਲ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਪੁਲਿਸ ਨੇ ਅੰਦਰੂਨੀ ਸਮੀਖਿਆ ਸ਼ੁਰੂ ਕੀਤੀ। ਸਮੀਖਿਆ ਦਾ ਕੇਂਦਰ ਇਹ ਹੈ ਕਿ ਕੀ ਨਾਇਡੂ ਨੇ ਲੇਬਰ ਪਾਰਟੀ ਨਾਲ ਚੱਲ ਰਹੀਆਂ ਗੱਲਬਾਤਾਂ ਬਾਰੇ ਆਪਣੇ ਸੀਨੀਅਰ ਅਧਿਕਾਰੀਆਂ ਨੂੰ ਸਮੇਂ ਸਿਰ ਜਾਣੂ ਕਰਵਾਇਆ ਸੀ ਜਾਂ ਨਹੀਂ।
ਇਸ ਦੇ ਨਾਲ ਪੁਲਿਸ ਇਹ ਵੀ ਜਾਂਚ ਰਹੀ ਹੈ ਕਿ ਸਿਆਸਤ ਵਿੱਚ ਦਾਖ਼ਲੇ ਦੀ ਪ੍ਰਕਿਰਿਆ ਦੌਰਾਨ ਕਿਸੇ ਗੁਪਤ ਜਾਂ ਸੰਵੇਦਨਸ਼ੀਲ ਪੁਲਿਸ ਜਾਣਕਾਰੀ ਦੀ ਸਾਂਝ ਤਾਂ ਨਹੀਂ ਪਾਈ ਗਈ। ਹਾਲਾਂਕਿ, ਜਾਂਚ ਅਜੇ ਜਾਰੀ ਹੈ ਅਤੇ ਪੁਲਿਸ ਵੱਲੋਂ ਇਸ ਮਾਮਲੇ ਵਿੱਚ ਕੋਈ ਅੰਤਿਮ ਨਤੀਜਾ ਜਾਂ ਅਧਿਕਾਰਕ ਟਿੱਪਣੀ ਜਾਰੀ ਨਹੀਂ ਕੀਤੀ ਗਈ ਹੈ।