ਆਕਲੈਂਡ: ਸਿੱਖ ਰੇਡੀਓ ਹੋਸਟ ਹਰਨੇਕ ਸਿੰਘ ਨੇਕੀ ’ਤੇ ਹੋਏ ਧਾਰਮਿਕ ਤੌਰ ’ਤੇ ਪ੍ਰੇਰਿਤ ਹਮਲੇ ਨਾਲ ਜੁੜੇ ਮਾਮਲੇ ਵਿੱਚ ਕੁੱਲ ਸੱਤ ਵਿਅਕਤੀਆਂ ਨੂੰ ਵੱਖ-ਵੱਖ ਅਪਰਾਧਾਂ ਲਈ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ।
ਦੋਸ਼ੀ ਕਰਾਰ ਦਿੱਤੇ ਗਏ ਵਿਅਕਤੀਆਂ ਵਿੱਚ:
ਗੁਰਿੰਦਰਪਾਲ ਸਿੰਘ ਬਰਾੜ — ਹਮਲੇ ਦਾ ਪ੍ਰਬੰਧਕ ਅਤੇ ਮੁੱਖ ਸਾਜ਼ਿਸ਼ਕਰਤਾ, ਜਿਸ ਨੇ ਹਮਲੇ ਦੀ ਯੋਜਨਾ ਬਣਾਉਣ ਅਤੇ ਉਸ ਨੂੰ ਦਿਸ਼ਾ ਦੇਣ ਵਿੱਚ ਭੂਮਿਕਾ ਨਿਭਾਈ।
ਜੋਬਨਪ੍ਰੀਤ ਸਿੰਘ — ਹਮਲੇ ਦੌਰਾਨ ਹਰਨੇਕ ਸਿੰਘ ’ਤੇ ਚਾਕੂ ਨਾਲ ਵਾਰ ਕਰਨ ਵਾਲਿਆਂ ਵਿੱਚੋਂ ਇੱਕ।
ਹਰਦੀਪ ਸਿੰਘ ਸੰਧੂ
ਜਸਪਾਲ ਸਿੰਘ
ਜਗਰਾਜ ਸਿੰਘ
ਗੁਰਬਿੰਦਰ ਸਿੰਘ
ਸੁਖਪ੍ਰੀਤ ਸਿੰਘ
ਘਰ ਪਰਤਦੇ ਸਮੇਂ ਕੀਤਾ ਗਿਆ ਸੀ ਹਮਲਾ
23 ਦਸੰਬਰ 2020 ਨੂੰ ਹਮਲਾਵਰਾਂ ਨੇ ਹਰਨੇਕ ਸਿੰਘ ਦਾ ਪਿੱਛਾ ਕਰਦਿਆਂ ਉਨ੍ਹਾਂ ਦੇ ਘਰ ਤੱਕ ਪਹੁੰਚ ਕੇ ਵਾਟਲ ਡਾਊਨਜ਼ ਸਥਿਤ ਡਰਾਈਵਵੇਅ ਵਿੱਚ ਉਨ੍ਹਾਂ ’ਤੇ ਹਮਲਾ ਕੀਤਾ। ਉਨ੍ਹਾਂ ਦੀ ਗੱਡੀ ਨੂੰ ਟੱਕਰ ਮਾਰੀ ਗਈ, ਵਾਹਨ ਦੇ ਸ਼ੀਸ਼ੇ ਤੋੜੇ ਗਏ ਅਤੇ ਉਨ੍ਹਾਂ ’ਤੇ 40 ਤੋਂ ਵੱਧ ਵਾਰ ਚਾਕੂ ਨਾਲ ਹਮਲਾ ਕੀਤਾ ਗਿਆ।
ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹਰਨੇਕ ਸਿੰਘ ਨੂੰ ਲਗਭਗ ਤਿੰਨ ਹਫ਼ਤਿਆਂ ਤੱਕ ਮਿਡਲਮੋਰ ਹਸਪਤਾਲ ਵਿੱਚ ਇਲਾਜ ਲਈ ਰੱਖਿਆ ਗਿਆ, ਜਿਸ ਵਿੱਚ ਕੁਝ ਸਮਾਂ ਉਹ ਆਈਸੀਯੂ ਵਿੱਚ ਵੀ ਰਹੇ। ਉਨ੍ਹਾਂ ਦੀ ਜਾਨ ਬਚਾਉਣ ਲਈ ਕਈ ਵਾਰ ਸਰਜਰੀ ਕੀਤੀ ਗਈ ਅਤੇ ਸੈਂਕੜੇ ਟਾਂਕੇ ਲਗਾਉਣੇ ਪਏ।
ਹਸਪਤਾਲ ਵਿੱਚ ਵੀ ਧਮਕੀ ਦੇਣ ਦੇ ਦੋਸ਼
ਰਿਪੋਰਟਾਂ ਮੁਤਾਬਕ ਜਦੋਂ ਹਰਨੇਕ ਸਿੰਘ ਹਸਪਤਾਲ ਵਿੱਚ ਜ਼ਿੰਦਗੀ ਅਤੇ ਮੌਤ ਦੀ ਲੜਾਈ ਲੜ ਰਹੇ ਸਨ, ਉਸ ਸਮੇਂ ਜੋਬਨਪ੍ਰੀਤ ਸਿੰਘ ਵੱਲੋਂ ਉਨ੍ਹਾਂ ਦਾ ਘਰ ਸਾੜਨ ਸਬੰਧੀ ਕਥਿਤ ਤੌਰ ’ਤੇ ਗੱਲ ਕੀਤੀ ਗਈ ਸੀ।
ਜਸਟਿਸ ਮਾਰਕ ਵੂਲਫੋਰਡ ਨੇ ਬਾਅਦ ਵਿੱਚ ਇਨ੍ਹਾਂ ਕਥਿਤ ਬਿਆਨਾਂ ਨੂੰ ਪਛਤਾਵੇ ਦੀ ਘਾਟ ਨਾਲ ਜੋੜਿਆ। ਹਾਲਾਂਕਿ ਘਰ ਨੂੰ ਅਸਲ ਵਿੱਚ ਅੱਗ ਨਹੀਂ ਲਗਾਈ ਗਈ, ਪਰ ਕਥਿਤ ਧਮਕੀ ਨੇ ਮਾਮਲੇ ਦੀ ਗੰਭੀਰਤਾ ਨੂੰ ਹੋਰ ਉਜਾਗਰ ਕੀਤਾ।
ਰਾਜਨੀਤਿਕ ਅਤੇ ਧਾਰਮਿਕ ਵਿਚਾਰਾਂ ਕਾਰਨ ਨਿਸ਼ਾਨਾ ਬਣਾਉਣ ਦਾ ਦੋਸ਼
ਪ੍ਰੋਸੀਕਿਊਸ਼ਨ ਵੱਲੋਂ ਅਦਾਲਤ ਵਿੱਚ ਦਲੀਲ ਦਿੱਤੀ ਗਈ ਕਿ ਹਮਲੇ ਦੀ ਯੋਜਨਾ ਹਰਨੇਕ ਸਿੰਘ ਦੇ ਰਾਜਨੀਤਿਕ ਅਤੇ ਧਾਰਮਿਕ ਵਿਚਾਰਾਂ ਪ੍ਰਤੀ ਡੂੰਘੀ ਅਤੇ ਤੀਬਰ ਨਫ਼ਰਤ ਤੋਂ ਪ੍ਰੇਰਿਤ ਸੀ।
ਅਦਾਲਤ ਵਿੱਚ ਬਰਾੜ ਨੂੰ ਸਿਰਫ਼ ਇੱਕ ਹੋਰ ਹਮਲਾਵਰ ਨਹੀਂ, ਸਗੋਂ ਹਮਲੇ ਦਾ ਪ੍ਰਭਾਵਸ਼ਾਲੀ ਆਯੋਜਕ ਦੱਸਿਆ ਗਿਆ, ਜਿਸ ’ਤੇ ਹਰਨੇਕ ਸਿੰਘ ਨੂੰ ਚੁੱਪ ਕਰਵਾਉਣ ਲਈ ਹਮਲੇ ਦੀ ਯੋਜਨਾ ਬਣਾਉਣ ਦਾ ਦੋਸ਼ ਸੀ। ਹੋਰ ਵਿਅਕਤੀਆਂ ਨੇ ਹਮਲਾਵਰਾਂ, ਡਰਾਈਵਰਾਂ, ਪਿੱਛਾ ਕਰਨ ਵਾਲਿਆਂ ਜਾਂ ਹਮਲੇ ਤੋਂ ਬਾਅਦ ਮਦਦ ਕਰਨ ਵਾਲਿਆਂ ਵਜੋਂ ਭੂਮਿਕਾਵਾਂ ਨਿਭਾਈਆਂ।
ਹਾਲਾਂਕਿ ਸਾਰੇ ਸੱਤ ਵਿਅਕਤੀ attempted murder ਦੇ ਦੋਸ਼ ਵਿੱਚ ਦੋਸ਼ੀ ਨਹੀਂ ਠਹਿਰਾਏ ਗਏ। ਕੁਝ ਨੂੰ ਇਸ ਸਾਜ਼ਿਸ਼ ਨਾਲ ਜੁੜੇ ਘੱਟ ਗੰਭੀਰ ਅਪਰਾਧਾਂ, ਜਿਨ੍ਹਾਂ ਵਿੱਚ ਹਮਲੇ ਤੋਂ ਬਾਅਦ ਸਹਾਇਤਾ ਕਰਨ ਵਰਗੇ ਦੋਸ਼ ਸ਼ਾਮਿਲ ਹਨ, ਲਈ ਦੋਸ਼ੀ ਕਰਾਰ ਦਿੱਤਾ ਗਿਆ।
ਮਾਮਲੇ ਤੋਂ ਬਾਅਦ ਇਮੀਗ੍ਰੇਸ਼ਨ ਸਬੰਧੀ ਸਵਾਲ
ਮਾਮਲੇ ਦੇ ਮੁੱਖ ਦੋਸ਼ੀਆਂ ਨੂੰ ਕੈਦ ਦੀਆਂ ਸਜ਼ਾਵਾਂ ਸੁਣਾਈਆਂ ਗਈਆਂ ਹਨ। ਇਸ ਦੇ ਨਾਲ ਹੀ ਇਹ ਸਵਾਲ ਵੀ ਉੱਠ ਰਹੇ ਹਨ ਕਿ ਨਿਊਜ਼ੀਲੈਂਡ ਵਿੱਚ ਇਹ ਕਥਿਤ ਤੌਰ ’ਤੇ ਸੰਗਠਿਤ ਨੈੱਟਵਰਕ ਕਿਵੇਂ ਵਿਕਸਿਤ ਹੋਇਆ ਅਤੇ ਕੀ ਅਧਿਕਾਰੀਆਂ ਨੂੰ ਪਹਿਲਾਂ ਹੀ ਕਿਸੇ ਸੰਭਾਵਿਤ ਖ਼ਤਰੇ ਬਾਰੇ ਜਾਣਕਾਰੀ ਸੀ।
ਇਸ ਤੋਂ ਇਲਾਵਾ, ਜਿਹੜੇ ਦੋਸ਼ੀ ਨਿਊਜ਼ੀਲੈਂਡ ਦੇ ਨਾਗਰਿਕ ਨਹੀਂ ਹਨ, ਉਨ੍ਹਾਂ ਖ਼ਿਲਾਫ਼ ਇਮੀਗ੍ਰੇਸ਼ਨ ਅਤੇ ਡਿਪੋਰਟੇਸ਼ਨ ਸਬੰਧੀ ਕੀ ਕਾਰਵਾਈ ਹੋਵੇਗੀ, ਇਹ ਵੀ ਅਹਿਮ ਮੁੱਦਾ ਬਣਿਆ ਹੋਇਆ ਹੈ।
ਰਿਪੋਰਟਾਂ ਮੁਤਾਬਕ ਜੋਬਨਪ੍ਰੀਤ ਸਿੰਘ ਵੱਲੋਂ ਆਪਣੀ ਜੇਲ੍ਹ ਦੀ ਸਜ਼ਾ ਪੂਰੀ ਕਰਨ ਤੋਂ ਬਾਅਦ ਡਿਪੋਰਟ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਹਾਲਾਂਕਿ, ਭਵਿੱਖ ਵਿੱਚ ਜੇਕਰ ਉਹ ਭਾਰਤ ਵਾਪਸੀ ’ਤੇ ਖ਼ਤਰੇ ਦਾ ਹਵਾਲਾ ਦੇ ਕੇ ਸ਼ਰਨ ਜਾਂ ਸੁਰੱਖਿਆ ਦੀ ਅਰਜ਼ੀ ਦਾਇਰ ਕਰਦਾ ਹੈ, ਤਾਂ ਇਸ ਦਾ ਫੈਸਲਾ ਨਿਊਜ਼ੀਲੈਂਡ ਦੇ ਇਮੀਗ੍ਰੇਸ਼ਨ ਕਾਨੂੰਨਾਂ ਅਤੇ ਸੰਬੰਧਿਤ ਅਧਿਕਾਰੀਆਂ ਦੀ ਜਾਂਚ ’ਤੇ ਨਿਰਭਰ ਕਰੇਗਾ।
ਫਿਲਹਾਲ ਅਜਿਹੀ ਕਿਸੇ ਅਰਜ਼ੀ ਦਾਇਰ ਕੀਤੇ ਜਾਣ ਦਾ ਕੋਈ ਸਬੂਤ ਸਾਹਮਣੇ ਨਹੀਂ ਆਇਆ ਹੈ। ਮਾਮਲੇ ਵਿੱਚ ਅਗਲੇ ਇਮੀਗ੍ਰੇਸ਼ਨ ਫੈਸਲਿਆਂ ’ਤੇ ਵੀ ਨਜ਼ਰ ਰਹੇਗੀ।