ਪ੍ਰੀਤੀ ਪਵਾਰ ਨੇ ਰਾਸ਼ਟਰਮੰਡਲ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਿਆ ਹੈ। ਉਸਨੇ ਫਾਈਨਲ ਵਿੱਚ ਕੈਨੇਡਾ ਦੀ ਸਵਾਨਾ ਡੇਲਗਾਡੋ ਨੂੰ ਬਹੁਤ ਆਸਾਨੀ ਨਾਲ ਹਰਾਇਆ। ਪ੍ਰੀਤੀ ਨੇ ਬਾਊਟ ਦੇ ਤਿੰਨੋਂ ਦੌਰਾਂ ਵਿੱਚ ਦਬਦਬਾ ਬਣਾਇਆ, ਅਤੇ ਸਾਰੇ ਪੰਜ ਜੱਜਾਂ ਨੇ ਉਸਦੇ ਹੱਕ ਵਿੱਚ ਫੈਸਲਾ ਸੁਣਾਇਆ। ਇਹ ਪਹਿਲੀ ਵਾਰ ਹੈ ਜਦੋਂ 22 ਸਾਲਾ ਪ੍ਰੀਤੀ ਨੇ ਰਾਸ਼ਟਰਮੰਡਲ ਖੇਡਾਂ ਵਿੱਚ ਤਗਮਾ ਜਿੱਤਿਆ ਹੈ।
ਪ੍ਰੀਤੀ ਪਵਾਰ ਨੇ ਰਾਸ਼ਟਰਮੰਡਲ ਖੇਡਾਂ ਵਿੱਚ ਆਪਣੇ ਸਾਰੇ ਵਿਰੋਧੀਆਂ ‘ਤੇ ਇੱਕ ਪਾਸੜ ਜਿੱਤ ਦਰਜ ਕਰਕੇ ਸੋਨ ਤਗਮਾ ਹਾਸਿਲ ਕੀਤਾ ਹੈ। ਸ਼ੁਰੂਆਤੀ ਦੌਰ ਵਿੱਚ, ਉਸਨੇ ਮਲਾਵੀ ਦੇ ਇੱਕ ਐਥਲੀਟ ਨੂੰ ਬਾਹਰ ਕਰ ਦਿੱਤਾ। ਬਾਅਦ ਵਿੱਚ ਉਹ ਉੱਤਰੀ ਆਇਰਲੈਂਡ ਅਤੇ ਜ਼ੈਂਬੀਆ ਦੇ ਐਥਲੀਟਾਂ ਨੂੰ ਫੈਸਲਾਕੁੰਨ ਹਰਾ ਕੇ ਫਾਈਨਲ ਵਿੱਚ ਪਹੁੰਚ ਗਈ।
ਪਹਿਲੇ ਦੌਰ ਤੋਂ ਹੀ, ਪ੍ਰੀਤੀ ਨੇ ਕੈਨੇਡੀਅਨ ਮੁੱਕੇਬਾਜ਼ ਨੂੰ ਮੁੱਕਾ ਮਾਰਨ ਦਾ ਕੋਈ ਮੌਕਾ ਨਹੀਂ ਦਿੱਤਾ। ਦੁਨੀਆ ਦੀ ਤੀਜੇ ਨੰਬਰ ਦੀ ਮੁੱਕੇਬਾਜ਼ ਇੱਕ ਸੱਚੀ ਵਿਸ਼ਵ ਚੈਂਪੀਅਨ ਵਾਂਗ ਖੇਡੀ ਹੈ। ਉਸਨੇ ਇਸ ਤੋਂ ਪਹਿਲਾਂ ਪਿਛਲੇ ਸਾਲ ਵਿਸ਼ਵ ਮੁੱਕੇਬਾਜ਼ੀ ਕੱਪ ਵਿੱਚ ਸੋਨ ਤਗਮਾ ਜਿੱਤਿਆ ਸੀ। ਰਾਸ਼ਟਰਮੰਡਲ ਖੇਡਾਂ ਵਿੱਚ ਕੁੱਲ 14 ਭਾਰਤੀ ਮੁੱਕੇਬਾਜ਼ਾਂ ਨੇ ਹਿੱਸਾ ਲਿਆ ਸੀ, ਜਿਨ੍ਹਾਂ ਵਿੱਚੋਂ 10 ਫਾਈਨਲ ਵਿੱਚ ਪਹੁੰਚੇ ਹਨ।
ਪ੍ਰੀਤੀ ਪਵਾਰ ਨੇ ਰਾਸ਼ਟਰਮੰਡਲ ਖੇਡਾਂ 2026 ਵਿੱਚ ਭਾਰਤ ਨੂੰ ਪਹਿਲਾ ਮੁੱਕੇਬਾਜ਼ੀ ਦਾ ਤਗਮਾ ਦਿਵਾਇਆ ਹੈ।ਦੂਜੇ ਪਾਸੇ ਜੈਸਮੀਨ ਲੰਬੋਡੀਆ ਨੇ ਵੀ ਸੋਨ ਤਗਮਾ ਜਿੱਤ ਲਿਆ ਹੈ, ਜਿਸ ਕਾਰਨ ਭਾਰਤ ਦੇ ਹੁਣ ਇਨ੍ਹਾਂ ਖੇਡਾਂ ਵਿੱਚ ਕੁੱਲ 7 ਸੋਨ ਤਗਮੇ ਹੋ ਗਏ ਹਨ। ਤਮਗਾ ਸੂਚੀ ਵਿਚ ਭਾਰਤ ਹੁਣ 7 ਸੋਨ, 12 ਚਾਂਦੀ ਅਤੇ 6 ਕਾਂਸੀ ਦੇ ਤਗਮਿਆਂ ਨਾਲ ਛੇਵੇਂ ਸਥਾਨ ‘ਤੇ ਆ ਗਿਆ ਹੈ।
ਪ੍ਰੀਤੀ ਪਵਾਰ ਦੀ ਗੱਲ ਕਰੀਏ ਤਾਂ ਉਸਨੂੰ ਪਹਿਲੀ ਪਹਿਚਾਣ 2022 ਦੀਆਂ ਏਸ਼ਿਆਈ ਖੇਡਾਂ ਵਿੱਚ ਮਿਲੀ ਜਦੋਂ ਉਸਨੇ ਕਾਂਸੀ ਦਾ ਤਗਮਾ ਜਿੱਤਿਆ ਸੀ। ਇਸ ਤੋਂ ਇਲਾਵਾ ਉਹ ਅੰਡਰ-22 ਏਸ਼ੀਅਨ ਚੈਂਪੀਅਨਸ਼ਿਪ ਅਤੇ ਵਿਸ਼ਵ ਮੁੱਕੇਬਾਜ਼ੀ ਕੱਪ ‘ਚ ਸੋਨ ਤਗਮਾ ਜੇਤੂ ਰਹੀ ਹੈ।