ਨਿਊਜ਼ੀਲੈਂਡ: ਨਿਊਜ਼ੀਲੈਂਡ ਸਰਕਾਰ ਨੇ ਪੇਰੈਂਟ ਰੈਜ਼ੀਡੈਂਟ ਵੀਜ਼ਾ (Parent Resident Visa) ਲਈ ਅਰਜ਼ੀਆਂ ਦੀ ਚੋਣ ਪ੍ਰਕਿਰਿਆ ਵਿੱਚ ਵੱਡਾ ਬਦਲਾਅ ਕਰਨ ਦਾ ਐਲਾਨ ਕੀਤਾ ਹੈ। ਨਵੇਂ ਨਿਯਮਾਂ ਤਹਿਤ ਹੁਣ 90 ਫੀਸਦੀ ਅਰਜ਼ੀਆਂ ਨੂੰ ਉਨ੍ਹਾਂ ਦੀ ਤਾਰੀਖ ਦੇ ਕ੍ਰਮ ਅਨੁਸਾਰ ਚੁਣਿਆ ਜਾਵੇਗਾ, ਜਿਸ ਨਾਲ ਮਾਪਿਆਂ ਨੂੰ ਨਿਊਜ਼ੀਲੈਂਡ ਵਿੱਚ ਸਥਾਈ ਨਿਵਾਸ ਲਈ ਵਧੇਰੇ ਸਪੱਸ਼ਟ ਅਤੇ ਭਰੋਸੇਮੰਦ ਰਸਤਾ ਮਿਲੇਗਾ।
ਇਮੀਗ੍ਰੇਸ਼ਨ ਮੰਤਰੀ ਏਰਿਕਾ ਸਟੈਨਫੋਰਡ ਨੇ ਸ਼ਨੀਵਾਰ ਨੂੰ ਇਸ ਬਦਲਾਅ ਦਾ ਐਲਾਨ ਕਰਦਿਆਂ ਕਿਹਾ ਕਿ ਇਹ ਪ੍ਰਣਾਲੀ ਪਿਛਲੀ ਲੇਬਰ ਸਰਕਾਰ ਵੱਲੋਂ ਲਾਗੂ ਕੀਤੀ ਗਈ ਅਨਿਸ਼ਚਿਤ ਬੈਲਟ ਪ੍ਰਣਾਲੀ ਦੀ ਥਾਂ ਲਵੇਗੀ।
ਨਵੇਂ ਹਾਈਬ੍ਰਿਡ ਮਾਡਲ ਤਹਿਤ ਸਾਲਾਨਾ 2,500 ਵੀਜ਼ਾ ਸਥਾਨਾਂ ਵਿੱਚੋਂ 90 ਫੀਸਦੀ ਬਿਨੈਕਾਰਾਂ ਦੀ ਚੋਣ ਕ੍ਰੋਨੋਲੋਜੀਕਲ ਕਤਾਰ (ਤਾਰੀਖ ਦੇ ਕ੍ਰਮ) ਅਨੁਸਾਰ ਹੋਵੇਗੀ। ਬਾਕੀ 10 ਫੀਸਦੀ ਸਥਾਨ ਬੈਲਟ ਪ੍ਰਣਾਲੀ ਰਾਹੀਂ ਭਰੇ ਜਾਣਗੇ, ਤਾਂ ਜੋ ਨਵੇਂ ਬਿਨੈਕਾਰਾਂ ਨੂੰ ਵੀ ਮੌਕਾ ਮਿਲ ਸਕੇ।
ਮੰਤਰੀ ਸਟੈਨਫੋਰਡ ਨੇ ਕਿਹਾ ਕਿ ਪੁਰਾਣੀ ਬੈਲਟ ਪ੍ਰਣਾਲੀ ਕਾਰਨ ਪਰਿਵਾਰ ਲੰਬੇ ਸਮੇਂ ਤੱਕ ਚਿੰਤਾ ਅਤੇ ਅਨਿਸ਼ਚਿਤਤਾ ਵਿੱਚ ਰਹਿੰਦੇ ਸਨ ਕਿ ਉਨ੍ਹਾਂ ਦੇ ਮਾਪਿਆਂ ਦੀ ਅਰਜ਼ੀ ਕਦੇ ਚੁਣੀ ਵੀ ਜਾਵੇਗੀ ਜਾਂ ਨਹੀਂ।
ਨਵੇਂ ਨਿਯਮਾਂ ਦੀ ਇੱਕ ਹੋਰ ਅਹਿਮ ਵਿਸ਼ੇਸ਼ਤਾ ਇਹ ਹੈ ਕਿ EOI (Expression of Interest) ਹੁਣ ਦੋ ਸਾਲ ਬਾਅਦ ਆਪਣੇ ਆਪ ਖ਼ਤਮ ਨਹੀਂ ਹੋਵੇਗੀ। ਜੇਕਰ ਬਿਨੈਕਾਰ ਸਿਸਟਮ ਵਿੱਚ ਬਣੇ ਰਹਿਣ ਦੀ ਪੁਸ਼ਟੀ ਕਰਦੇ ਹਨ ਅਤੇ ਆਪਣੀ ਜਾਣਕਾਰੀ ਅਪਡੇਟ ਰੱਖਦੇ ਹਨ, ਤਾਂ ਉਨ੍ਹਾਂ ਨੂੰ ਹਰ ਦੋ ਸਾਲ ਬਾਅਦ ਮੁੜ ਅਰਜ਼ੀ ਦੇਣ ਜਾਂ ਵਾਧੂ ਫੀਸ ਅਦਾ ਕਰਨ ਦੀ ਲੋੜ ਨਹੀਂ ਪਵੇਗੀ।
ਸਰਕਾਰ ਮੁਤਾਬਿਕ ਇਸ ਬਦਲਾਅ ਨਾਲ ਉਨ੍ਹਾਂ ਪਰਿਵਾਰਾਂ ਨੂੰ ਪਹਿਲ ਮਿਲੇਗੀ ਜੋ ਲੰਬੇ ਸਮੇਂ ਤੋਂ ਕਤਾਰ ਵਿੱਚ ਉਡੀਕ ਕਰ ਰਹੇ ਹਨ, ਜਿਨ੍ਹਾਂ ਵਿੱਚ ਕੁਝ ਪਰਿਵਾਰ 2022 ਤੋਂ ਉਡੀਕ ਕਰ ਰਹੇ ਹਨ। ਇਸ ਦੇ ਨਾਲ ਹੀ 10 ਫੀਸਦੀ ਬੈਲਟ ਕੋਟੇ ਰਾਹੀਂ ਨਵੇਂ ਬਿਨੈਕਾਰਾਂ ਨੂੰ ਵੀ ਚੁਣੇ ਜਾਣ ਦਾ ਮੌਕਾ ਮਿਲੇਗਾ।
ਹਾਲਾਂਕਿ ਨਵੀਂ ਪ੍ਰਣਾਲੀ ਨਾਲ ਉਡੀਕ ਦਾ ਸਮਾਂ ਪੂਰੀ ਤਰ੍ਹਾਂ ਖਤਮ ਨਹੀਂ ਹੋਵੇਗਾ। ਮਾਪਿਆਂ ਨੂੰ ਰੈਜ਼ੀਡੈਂਟ ਵੀਜ਼ਾ ਹਾਸਿਲ ਕਰਨ ਲਈ ਸਿਹਤ ਸੰਬੰਧੀ ਮਾਪਦੰਡਾਂ ਸਮੇਤ ਹੋਰ ਸਾਰੇ ਵੀਜ਼ਾ ਨਿਯਮਾਂ ਨੂੰ ਵੀ ਪੂਰਾ ਕਰਨਾ ਪਵੇਗਾ।
ਨਵੀਂ ਚੋਣ ਪ੍ਰਣਾਲੀ 10 ਨਵੰਬਰ ਦੀ ਚੋਣ ਤੋਂ ਲਾਗੂ ਹੋਵੇਗੀ। ਮੌਜੂਦਾ EOI ਬਿਨੈਕਾਰਾਂ ਨੂੰ ਅਕਤੂਬਰ ਵਿੱਚ ਕ੍ਰੋਨੋਲੋਜੀਕਲ ਕਤਾਰ ਵਿੱਚ ਆਪਣੀ ਸਥਿਤੀ ਬਾਰੇ ਜਾਣਕਾਰੀ ਦੇਣ ਦੀ ਗੱਲ ਸਰਕਾਰ ਨੇ ਕਹੀ ਹੈ।