ਵਾਕਾਟਾਨੇ : ਨਿਊਜ਼ੀਲੈਂਡ ਦੇ ਪੂਰਬੀ ਬੇਅ ਆਫ਼ ਪਲੈਂਟੀ ਖੇਤਰ ਵਿੱਚ ਮੰਗਲਵਾਰ ਸ਼ਾਮ 4.1 ਤੀਬਰਤਾ ਦੇ ਭੂਚਾਲ ਨੇ ਲੋਕਾਂ ਨੂੰ ਹਿਲਾ ਕੇ ਰੱਖ ਦਿੱਤਾ। ਜੀਓਨੈੱਟ (GeoNet) ਮੁਤਾਬਿਕ ਭੂਚਾਲ ਸ਼ਾਮ ਕਰੀਬ 6:25 ਵਜੇ ਆਇਆ। ਇਸ ਦਾ ਕੇਂਦਰ ਵਾਕਾਟਾਨੇ ਤੋਂ ਲਗਭਗ 15 ਕਿਲੋਮੀਟਰ ਪੱਛਮ ਵੱਲ ਅਤੇ ਜ਼ਮੀਨ ਤੋਂ 5 ਕਿਲੋਮੀਟਰ ਦੀ ਡੂੰਘਾਈ ਵਿੱਚ ਸੀ।
ਹਜ਼ਾਰਾਂ ਲੋਕਾਂ ਨੇ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ। ਜੀਓਨੈੱਟ ਨੇ ਇਸ ਦੀ ਤੀਬਰਤਾ ਨੂੰ “ਹਲਕੀ” (Light) ਸ਼੍ਰੇਣੀ ਵਿੱਚ ਦਰਜ ਕੀਤਾ ਹੈ। ਵਾਕਾਟਾਨੇ ਦੇ ਇੱਕ ਵਸਨੀਕ ਨੇ ਸੋਸ਼ਲ ਮੀਡੀਆ ‘ਤੇ ਲਿਖਿਆ, “ਇਹ ਤਾਂ ਕਾਫ਼ੀ ਵੱਡਾ ਝਟਕਾ ਸੀ।” ਇੱਕ ਹੋਰ ਵਿਅਕਤੀ ਨੇ ਕਿਹਾ, “ਵਾਹ, ਇਹ ਤਾਂ ਜ਼ੋਰਦਾਰ ਝਟਕਾ ਸੀ।” ਇੱਕ ਮਹਿਲਾ ਨੇ ਦੱਸਿਆ ਕਿ ਵਾਕਾਟਾਨੇ ਵਿੱਚ ਉਸ ਨੂੰ ਲੱਗਾ ਜਿਵੇਂ “ਪਪਾਤੂਆਨੁਕੂ (ਧਰਤੀ ਮਾਤਾ) ਹਿੱਲ ਰਹੀ ਹੋਵੇ,” ਅਤੇ ਉਸ ਨੇ ਕਿਹਾ ਕਿ ਉਸ ਦੀ ਪੂਰੀ ਕੈਬਿਨ ਇਸ ਤਰ੍ਹਾਂ ਹਿੱਲੀ ਜਿਵੇਂ ਉਸ ਦਾ ਦਿਲ ਧੜਕ ਰਿਹਾ ਹੋਵੇ।
ਇਹ ਭੂਚਾਲ ਨਿਊਜ਼ੀਲੈਂਡ ਵਿੱਚ ਪਿਛਲੇ ਕੁਝ ਹਫ਼ਤਿਆਂ ਦੌਰਾਨ ਆਏ ਭੂਚਾਲਾਂ ਦੀ ਲੜੀ ਵਿੱਚ ਇੱਕ ਹੋਰ ਕੜੀ ਹੈ। ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਤੇ ਅਰਾਰੋਆ ਨੇੜੇ 5.7 ਤੀਬਰਤਾ ਦਾ “ਤਾਕਤਵਰ” ਭੂਚਾਲ ਆਇਆ ਸੀ, ਜਿਸ ਦੇ ਝਟਕੇ ਹਜ਼ਾਰਾਂ ਲੋਕਾਂ ਨੇ ਮਹਿਸੂਸ ਕੀਤੇ ਸਨ। ਇਸ ਤੋਂ ਪਹਿਲਾਂ ਜੁਲਾਈ ਵਿੱਚ ਤੌਮਾਰੁਨੁਈ ਖੇਤਰ ਵਿੱਚ 5.9 ਤੀਬਰਤਾ ਦੇ “ਗੰਭੀਰ” ਭੂਚਾਲ ਨੇ ਝਟਕੇ ਦਿੱਤੇ ਸਨ। ਇਸ ਤੋਂ ਇੱਕ ਹਫ਼ਤਾ ਪਹਿਲਾਂ ਤੇ ਆਨਾਊ ਨੇੜੇ ਵੀ 5.9 ਤੀਬਰਤਾ ਦਾ ਭੂਚਾਲ ਦਰਜ ਕੀਤਾ ਗਿਆ ਸੀ।