ਨਿਊਜ਼ੀਲੈਂਡ ਦੇ ਕੇਂਦਰੀ ਕ੍ਰਾਈਸਟਚਰਚ ਇਲਾਕੇ ਵਿੱਚ ਕਈ ਪਿੱਤਲ ਦੀਆਂ ਯਾਦਗਾਰੀ ਤਖ਼ਤੀਆਂ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਜਾਂਚ ਵਿੱਚ ਮਦਦ ਲਈ ਇੱਕ ਵਿਅਕਤੀ ਦੀ ਤਸਵੀਰ ਵੀ ਜਾਰੀ ਕੀਤੀ ਹੈ, ਜਿਸ ਬਾਰੇ ਮੰਨਿਆ ਜਾ ਰਿਹਾ ਹੈ ਕਿ ਉਹ ਮਾਮਲੇ ਨੂੰ ਸੁਲਝਾਉਣ ਵਿੱਚ ਅਹਿਮ ਜਾਣਕਾਰੀ ਦੇ ਸਕਦਾ ਹੈ।
ਕ੍ਰਾਈਸਟਚਰਚ ਮੈਟਰੋ ਕਮਾਂਡਰ ਸੁਪਰਡੈਂਟ ਲੇਨ ਟੌਡ ਨੇ ਦੱਸਿਆ ਕਿ ਇਹ ਚੋਰੀਆਂ 11 ਅਗਸਤ ਦੀ ਰਾਤ ਤੋਂ 12 ਅਗਸਤ ਦਰਮਿਆਨ ਹੋਈਆਂ। ਚੋਰੀ ਕੀਤੀਆਂ ਤਖ਼ਤੀਆਂ ਲੈਟੀਮਰ ਸਕੁਏਅਰ ਅਤੇ ਬ੍ਰਿਜ ਆਫ਼ ਰਿਮੈਂਬਰੈਂਸ ਦੇ ਇਲਾਕਿਆਂ ਤੋਂ ਹਟਾਈਆਂ ਗਈਆਂ ਹਨ।
ਪੁਲਿਸ ਨੇ ਜਾਰੀ ਕੀਤੀ ਤਸਵੀਰ ਵਿੱਚ ਦਿਖਾਈ ਦੇ ਰਹੇ ਵਿਅਕਤੀ ਨਾਲ ਗੱਲ ਕਰਨ ਦੀ ਅਪੀਲ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਜੇਕਰ ਕੋਈ ਇਸ ਵਿਅਕਤੀ ਨੂੰ ਜਾਣਦਾ ਹੈ ਤਾਂ ਉਹ ਵੀ ਜਾਂਚ ਵਿੱਚ ਮਦਦ ਕਰ ਸਕਦਾ ਹੈ।
ਸੁਪਰਡੈਂਟ ਟੌਡ ਨੇ ਕਿਹਾ, “ਜੇਕਰ ਇਹ ਵਿਅਕਤੀ ਤੁਸੀਂ ਖੁਦ ਹੋ ਜਾਂ ਤੁਸੀਂ ਇਸ ਵਿਅਕਤੀ ਨੂੰ ਜਾਣਦੇ ਹੋ ਤਾਂ ਕਿਰਪਾ ਕਰਕੇ ਪੁਲਿਸ ਨਾਲ ਸੰਪਰਕ ਕਰੋ।”
ਪੁਲਿਸ ਨੇ ਇਨ੍ਹਾਂ ਇਲਾਕਿਆਂ ਵਿੱਚ ਉਕਤ ਰਾਤਾਂ ਦੌਰਾਨ ਮੌਜੂਦ ਰਹੇ ਲੋਕਾਂ ਨੂੰ ਵੀ ਅੱਗੇ ਆਉਣ ਦੀ ਅਪੀਲ ਕੀਤੀ ਹੈ। ਇਸ ਤੋਂ ਇਲਾਵਾ ਜਿਨ੍ਹਾਂ ਲੋਕਾਂ ਕੋਲ ਸੀਸੀਟੀਵੀ ਕੈਮਰੇ ਦੀ ਰਿਕਾਰਡਿੰਗ, ਡੈਸ਼ਕੈਮ ਫੁਟੇਜ ਜਾਂ ਚੋਰੀ ਹੋਈਆਂ ਤਖ਼ਤੀਆਂ ਦੀ ਮੌਜੂਦਾ ਸਥਿਤੀ ਬਾਰੇ ਕੋਈ ਜਾਣਕਾਰੀ ਹੈ, ਉਨ੍ਹਾਂ ਨੂੰ ਪੁਲਿਸ ਨਾਲ ਸੰਪਰਕ ਕਰਨ ਲਈ ਕਿਹਾ ਗਿਆ ਹੈ।