ਪਾਲਮਰਸਟਨ ਨਾਰਥ ਵਿੱਚ ਅੱਜ ਦੁਪਹਿਰ ਤੋਂ ਥੋੜ੍ਹਾ ਪਹਿਲਾਂ ਇੱਕ ਚੋਰੀ ਕੀਤੀ ਕਾਰ ਪੁਲਿਸ ਪਿੱਛੇ ਲੱਗਣ ਤੋਂ ਬਾਅਦ ਇੰਨੀ ਬੇਕਾਬੂ ਹੋਈ ਕਿ ਇੱਕ ਇੱਟਾਂ ਦੀ ਕੰਧ ਤੋੜਦੀ ਹੋਈ ਘਰ ਵਿੱਚ ਜਾ ਵੜੀ। ਹਾਦਸੇ ਤੋਂ ਬਾਅਦ ਜ਼ਖ਼ਮੀ ਡਰਾਈਵਰ ਮੌਕੇ ਤੋਂ ਫਰਾਰ ਹੋ ਗਿਆ। ਪੁਲਿਸ ਮੁਤਾਬਿਕ ਅਧਿਕਾਰੀਆਂ ਨੇ Awapuni ਦੇ Amberly Ave ’ਤੇ ਇੱਕ ਕਾਰ ਨੂੰ ਖਤਰਨਾਕ ਢੰਗ ਨਾਲ ਚਲਦਿਆਂ ਦੇਖਿਆ ਅਤੇ ਉਸ ਦਾ ਪਿੱਛਾ ਸ਼ੁਰੂ ਕੀਤਾ। ਹਾਲਾਂਕਿ, ਕਾਰ ਚਲਾਉਣ ਦੇ ਤਰੀਕੇ ਨੂੰ ਦੇਖਦਿਆਂ ਪੁਲਿਸ ਨੇ ਕੁਝ ਸਮੇਂ ਬਾਅਦ ਪਿੱਛਾ ਛੱਡ ਦਿੱਤਾ।
ਇਸ ਤੋਂ ਕੁਝ ਹੀ ਦੇਰ ਬਾਅਦ ਪੁਲਿਸ ਨੂੰ Strachan Way ’ਤੇ ਕਾਰ ਦੇ ਇੱਟਾਂ ਦੀ ਕੰਧ ਨਾਲ ਟਕਰਾਉਣ ਅਤੇ ਇੱਕ ਘਰ ਵਿੱਚ ਜਾ ਵੱਜਣ ਦੀ ਸੂਚਨਾ ਮਿਲੀ।
ਮੌਕੇ ਦੀਆਂ ਤਸਵੀਰਾਂ ਵਿੱਚ ਕਾਲੇ ਰੰਗ ਦੀ ਕਾਰ ਘਰ ਦੇ ਨਾਲ ਬੁਰੀ ਤਰ੍ਹਾਂ ਟਕਰਾਈ ਹੋਈ ਦਿਖਾਈ ਦਿੱਤੀ। ਕਾਰ ਦਾ ਅਗਲਾ ਹਿੱਸਾ ਪੂਰੀ ਤਰ੍ਹਾਂ ਨੁਕਸਾਨਿਆ ਗਿਆ ਸੀ ਅਤੇ ਵਿੰਡਸਕ੍ਰੀਨ ਵੀ ਚਕਨਾਚੂਰ ਹੋ ਗਈ।
ਪੁਲਿਸ ਨੇ ਦੱਸਿਆ ਕਿ ਡਰਾਈਵਰ ਹਾਦਸੇ ਤੋਂ ਬਾਅਦ ਮੌਕੇ ਤੋਂ ਭੱਜ ਗਿਆ, ਪਰ ਪੁਲਿਸ ਨੇ ਉਸ ਨੂੰ ਭੱਜਦਿਆਂ ਹੀ ਲੱਭ ਲਿਆ। ਡਰਾਈਵਰ ਜ਼ਖ਼ਮੀ ਸੀ ਅਤੇ ਉਸ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ।
ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਇਹ ਕਾਰ ਇੱਕ ਦਿਨ ਪਹਿਲਾਂ ਹੀ ਚੋਰੀ ਹੋਈ ਸੀ।
ਕਾਰ ਨੂੰ ਹੁਣ ਘਰ ਵਿੱਚੋਂ ਹਟਾ ਦਿੱਤਾ ਗਿਆ ਹੈ, ਜਦਕਿ ਇਸ ਪੂਰੇ ਮਾਮਲੇ ਦੀ ਜਾਂਚ ਹਾਲੇ ਵੀ ਜਾਰੀ ਹੈ।