ਨਿਊਜ਼ੀਲੈਂਡ ਦੇ Wairarapa ਵਿੱਚ ਇੱਕ ਡੇਅਰੀ ਕੰਪਨੀ ਨੂੰ ਉਸ ਸਮੇਂ ਭਾਰੀ ਜੁਰਮਾਨਾ ਭੁਗਤਣਾ ਪਿਆ, ਜਦੋਂ ਇੱਕ ਕਰਮਚਾਰੀ ਦੀ ਬਾਂਹ ਟਰੈਕਟਰ ਦੀ ਬਿਨਾਂ ਗਾਰਡ ਵਾਲੀ ਮਸ਼ੀਨਰੀ ਵਿੱਚ ਫਸ ਕੇ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਈ।
ਇਹ ਹਾਦਸਾ ਜਨਵਰੀ 2025 ਵਿੱਚ ਵਾਪਰਿਆ ਸੀ। ਕਰਮਚਾਰੀ ਟਰੈਕਟਰ ਨਾਲ ਜੁੜੇ ਫੀਡ ਮਿਕਸਰ ਨੂੰ ਚਲਾ ਰਿਹਾ ਸੀ। ਇਸ ਦੌਰਾਨ ਉਸ ਦੇ ਕੱਪੜੇ ਬਿਨਾਂ ਸੁਰੱਖਿਆ ਗਾਰਡ ਵਾਲੇ Power Take-Off (PTO) ਸ਼ਾਫਟ ਵਿੱਚ ਫਸ ਗਏ ਅਤੇ ਉਹ ਮਸ਼ੀਨਰੀ ਵਿੱਚ ਬੁਰੀ ਤਰ੍ਹਾਂ ਉਲਝ ਗਿਆ। ਹਾਦਸੇ ਵਿੱਚ ਉਸ ਨੂੰ ਕਈ ਗੰਭੀਰ ਸੱਟਾਂ ਲੱਗੀਆਂ ਅਤੇ ਉਸ ਦੀ ਇੱਕ ਬਾਂਹ ਚਲੀ ਗਈ।
Shady Farming Limited ਨੇ Health and Safety at Work Act 2015 ਤਹਿਤ ਲੱਗੇ ਦੋਸ਼ ਨੂੰ ਕਬੂਲ ਕਰ ਲਿਆ। ਕੰਪਨੀ ਨੂੰ 18 ਅਗਸਤ ਨੂੰ ਦੋਸ਼ੀ ਠਹਿਰਾਉਂਦਿਆਂ $60,000 ਦਾ ਜੁਰਮਾਨਾ ਕੀਤਾ ਗਿਆ ਅਤੇ ਲਗਭਗ $96,000 ਰੀਪਰੇਸ਼ਨ ਦੇਣ ਦਾ ਹੁਕਮ ਵੀ ਦਿੱਤਾ ਗਿਆ।
WorkSafe ਮੁਤਾਬਕ PTO ਸ਼ਾਫਟ ਖੇਤੀਬਾੜੀ ਮਸ਼ੀਨਰੀ ਦੇ ਸਭ ਤੋਂ ਖਤਰਨਾਕ ਹਿੱਸਿਆਂ ਵਿੱਚੋਂ ਇੱਕ ਹੁੰਦੇ ਹਨ। ਇਹ ਬਹੁਤ ਤੇਜ਼ ਰਫ਼ਤਾਰ ਨਾਲ ਘੁੰਮਦੇ ਹਨ ਅਤੇ ਬਿਨਾਂ ਗਾਰਡ ਵਾਲਾ ਸ਼ਾਫਟ ਢਿੱਲੇ ਕੱਪੜਿਆਂ ਨੂੰ ਪਲਕ ਝਪਕਦਿਆਂ ਆਪਣੇ ਅੰਦਰ ਖਿੱਚ ਸਕਦਾ ਹੈ।
WorkSafe ਦੇ ਸੈਂਟਰਲ ਰੀਜਨ ਮੈਨੇਜਰ Nigel Formosa ਨੇ ਕਿਹਾ ਕਿ ਇਹ ਮਾਮਲਾ ਸਪੱਸ਼ਟ ਕਰਦਾ ਹੈ ਕਿ ਮਸ਼ੀਨਰੀ ਦੀ ਗਾਰਡਿੰਗ ਨੂੰ ਬਹੁਤ ਗੰਭੀਰ ਸੁਰੱਖਿਆ ਉਪਾਅ ਵਜੋਂ ਲੈਣਾ ਕਿਉਂ ਜ਼ਰੂਰੀ ਹੈ।
ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਟਰੈਕਟਰ ਅਤੇ ਫੀਡ ਮਿਕਸਰ ਨੂੰ PTO ਸ਼ਾਫਟ ’ਤੇ ਬਿਨਾਂ ਕਿਸੇ ਗਾਰਡ ਦੇ ਚਲਾਇਆ ਜਾ ਰਿਹਾ ਸੀ। ਖਾਸ ਗੱਲ ਇਹ ਹੈ ਕਿ ਫਾਰਮ ਦੇ ਆਪਣੇ Risk Register ਵਿੱਚ ਪਹਿਲਾਂ ਹੀ ਕੱਪੜਿਆਂ ਜਾਂ ਸਰੀਰ ਦੇ ਮਸ਼ੀਨਰੀ ਵਿੱਚ ਫਸਣ ਦੇ ਖਤਰੇ ਨੂੰ ਉੱਚ-ਪੱਧਰੀ ਜੋਖਮ ਵਜੋਂ ਦਰਜ ਕੀਤਾ ਗਿਆ ਸੀ।
ਫਾਰਮ ਦੇ ਸੇਫਟੀ ਮੈਨੇਜਮੈਂਟ ਸਿਸਟਮ ਵਿੱਚ ਇਹ ਵੀ ਸਪੱਸ਼ਟ ਸੀ ਕਿ PTO ਸ਼ਾਫਟ ਹਰ ਸਮੇਂ ਗਾਰਡ ਨਾਲ ਢੱਕੇ ਹੋਣੇ ਚਾਹੀਦੇ ਹਨ ਅਤੇ ਇਸ ਵਿੱਚ ਕੋਈ ਛੋਟ ਨਹੀਂ ਸੀ।
ਪਰ ਜਾਂਚ ਵਿੱਚ ਇਹ ਵੀ ਪਤਾ ਲੱਗਾ ਕਿ ਕੰਪਨੀ ਇਹ ਯਕੀਨੀ ਬਣਾਉਣ ਵਿੱਚ ਨਾਕਾਮ ਰਹੀ ਕਿ ਮਸ਼ੀਨਰੀ ਦੀ ਵਰਤੋਂ ਤੋਂ ਪਹਿਲਾਂ ਗਾਰਡਾਂ ਦੀ ਜਾਂਚ ਅਤੇ ਮੇਨਟੇਨੈਂਸ ਪ੍ਰਕਿਰਿਆ ਅਸਲ ਵਿੱਚ ਲਾਗੂ ਕੀਤੀ ਜਾ ਰਹੀ ਸੀ।
Nigel Formosa ਨੇ ਕਿਹਾ ਕਿ ਸਿਰਫ਼ ਕਾਗਜ਼ਾਂ ’ਤੇ ਸੁਰੱਖਿਆ ਨਿਯਮ ਬਣਾਉਣਾ ਕਾਫ਼ੀ ਨਹੀਂ। ਇਹ ਵੀ ਯਕੀਨੀ ਬਣਾਉਣਾ ਲਾਜ਼ਮੀ ਹੈ ਕਿ ਮਸ਼ੀਨਰੀ ਦੇ ਗਾਰਡ ਮੌਜੂਦ ਹੋਣ, ਸਹੀ ਹਾਲਤ ਵਿੱਚ ਹੋਣ ਅਤੇ ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ ਉਨ੍ਹਾਂ ਦੀ ਜਾਂਚ ਕੀਤੀ ਜਾਵੇ।
ਨਿਊਜ਼ੀਲੈਂਡ ਵਿੱਚ ਖੇਤੀਬਾੜੀ ਅਜੇ ਵੀ ਸਭ ਤੋਂ ਵੱਧ ਜੋਖਮ ਵਾਲੇ ਉਦਯੋਗਾਂ ਵਿੱਚੋਂ ਇੱਕ ਹੈ ਅਤੇ ਮਸ਼ੀਨਰੀ ਨਾਲ ਜੁੜੇ ਹਾਦਸਿਆਂ ਕਾਰਨ ਲਗਾਤਾਰ ਗੰਭੀਰ ਸੱਟਾਂ ਲੱਗ ਰਹੀਆਂ ਹਨ।
WorkSafe ਨੇ ਚੇਤਾਵਨੀ ਦਿੱਤੀ ਕਿ ਖੇਤ ਦਾ ਕੋਈ ਵੀ ਕੰਮ ਇੰਨਾ ਜ਼ਰੂਰੀ ਨਹੀਂ ਕਿ ਚੱਲਦੀ ਮਸ਼ੀਨਰੀ ਦੇ ਆਲੇ-ਦੁਆਲੇ ਸੁਰੱਖਿਆ ਨਾਲ ਸਮਝੌਤਾ ਕੀਤਾ ਜਾਵੇ। ਮਸ਼ੀਨਰੀ ਦੇ ਗਾਰਡਾਂ ਦੀ ਕੁਝ ਮਿੰਟਾਂ ਦੀ ਜਾਂਚ ਕਿਸੇ ਕਰਮਚਾਰੀ ਅਤੇ ਉਸ ਦੇ ਪਰਿਵਾਰ ਨੂੰ ਜ਼ਿੰਦਗੀ ਭਰ ਦੇ ਦਰਦ ਤੋਂ ਬਚਾ ਸਕਦੀ ਹੈ।