ਬੇ ਆਫ ਪਲੈਂਟੀ: ਨਿਊਜ਼ੀਲੈਂਡ ਵਿੱਚ ਦੋ ਭਾਰਤੀ ਪ੍ਰਵਾਸੀ ਕਾਮਿਆਂ ਤੋਂ ਲੰਬੇ ਘੰਟੇ ਕੰਮ ਕਰਵਾਉਣ ਅਤੇ ਘੱਟ ਜਾਂ ਬਿਨਾਂ ਤਨਖਾਹ ਦੇਣ ਦੇ ਮਾਮਲੇ ਵਿੱਚ NZ Dream Contracting Limited ਅਤੇ ਇਸ ਦੇ ਡਾਇਰੈਕਟਰ ਗੁਰਪ੍ਰੀਤ ਸਿੰਘ ਨੂੰ ਵੱਡਾ ਝਟਕਾ ਲੱਗਾ ਹੈ।
Employment Relations Authority ਨੇ ਦੋਵਾਂ ਕਾਮਿਆਂ ਨੂੰ ਕੁੱਲ $23,219.50 ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ। ਇਸ ਵਿੱਚ ਘੱਟੋ-ਘੱਟ ਤਨਖਾਹ, ਛੁੱਟੀਆਂ ਦੀ ਤਨਖਾਹ ਅਤੇ ਗੈਰ-ਕਾਨੂੰਨੀ ਕਟੌਤੀਆਂ ਦੀ ਰਕਮ ਸ਼ਾਮਲ ਹੈ।
ਅਥਾਰਟੀ ਮੁਤਾਬਕ, ਭਾਰਤ ਤੋਂ ਆਏ ਕੁਲਵਿੰਦਰ ਸਿੰਘ ਅਤੇ ਜਸਕਰਨ ਸਿੰਘ ਤੋਂ ਉਨ੍ਹਾਂ ਦੇ ਵੀਜ਼ਾ ਤਹਿਤ ਦੱਸੇ ਕੰਮ ਦੀ ਬਜਾਏ ਕੀਵੀਫਰੂਟ ਬਾਗਾਂ ਵਿੱਚ ਪ੍ਰੂਨਿੰਗ ਕਰਵਾਈ ਗਈ। ਦੋਵਾਂ ਨੇ ਹਫ਼ਤੇ ਦੇ ਸੱਤ ਦਿਨ ਤੱਕ ਲੰਬੇ ਘੰਟਿਆਂ ਵਿੱਚ ਕੰਮ ਕੀਤਾ।
ਜਸਕਰਨ ਨੂੰ ਪਹਿਲੇ ਮਹੀਨੇ ਦੀ ਤਨਖਾਹ ਨਾ ਮਿਲਣ ਤੋਂ ਇਲਾਵਾ ਤਨਖਾਹ ਵਿੱਚੋਂ $1,500 ਨਕਦ ਵਾਪਸ ਕਰਨ ਲਈ ਵੀ ਕਿਹਾ ਗਿਆ। ਅਥਾਰਟੀ ਨੇ ਇਸ ਨੂੰ ਗੈਰ-ਕਾਨੂੰਨੀ ਕਰਾਰ ਦਿੱਤਾ।
ਦੂਜੇ ਪਾਸੇ, ਕੁਲਵਿੰਦਰ ਨੇ ਹਫ਼ਤੇ ਵਿੱਚ 59.5 ਘੰਟਿਆਂ ਤੱਕ ਕੰਮ ਕੀਤਾ ਅਤੇ ਜਨਤਕ ਛੁੱਟੀਆਂ ‘ਤੇ ਕੰਮ ਕਰਨ ਦੇ ਬਾਵਜੂਦ ਕਾਨੂੰਨੀ ਦਰ ‘ਤੇ ਭੁਗਤਾਨ ਨਹੀਂ ਮਿਲਿਆ।
ਇਸ ਤੋਂ ਪਹਿਲਾਂ ਅਗਸਤ ਵਿੱਚ ਅਥਾਰਟੀ ਨੇ ਦੋਵਾਂ ਤੋਂ ਨੌਕਰੀ ਅਤੇ ਵਰਕ ਵੀਜ਼ਾ ਦਿਵਾਉਣ ਦੇ ਬਦਲੇ ਲਏ ਗਏ ਕਥਿਤ ਗੈਰ-ਕਾਨੂੰਨੀ ਪ੍ਰੀ-ਇੰਪਲਾਇਮੈਂਟ ਪ੍ਰੀਮੀਅਮ ਵਜੋਂ ਕੁੱਲ $104,000 ਵਾਪਸ ਕਰਨ ਦੇ ਹੁਕਮ ਵੀ ਦਿੱਤੇ ਸਨ।
ਅਥਾਰਟੀ ਨੇ ਕੰਪਨੀ ਵੱਲੋਂ ਪੇਸ਼ ਕੀਤੀਆਂ ਟਾਈਮਸ਼ੀਟਾਂ ਨੂੰ ਭਰੋਸੇਯੋਗ ਨਹੀਂ ਮੰਨਿਆ। ਫੈਸਲੇ ਮੁਤਾਬਕ ਕੁਲਵਿੰਦਰ ਨੂੰ $13,101.65 ਅਤੇ ਜਸਕਰਨ ਨੂੰ $10,117.85 ਦੇਣੇ ਹੋਣਗੇ।
ਜੇ ਕੰਪਨੀ 28 ਦਿਨਾਂ ਵਿੱਚ ਭੁਗਤਾਨ ਨਹੀਂ ਕਰਦੀ ਤਾਂ ਗੁਰਪ੍ਰੀਤ ਸਿੰਘ ਨਿੱਜੀ ਤੌਰ ‘ਤੇ ਰਕਮ ਲਈ ਜ਼ਿੰਮੇਵਾਰ ਹੋਣਗੇ। ਜੁਰਮਾਨਿਆਂ ਅਤੇ ਕਾਨੂੰਨੀ ਖਰਚਿਆਂ ਬਾਰੇ ਫੈਸਲਾ ਬਾਅਦ ਵਿੱਚ ਕੀਤਾ ਜਾਵੇਗਾ।