ਪੁਲਿਸ ਇੱਕ ਨਵੀਂ ਤਕਨਾਲੋਜੀ ਦਾ ਟ੍ਰਾਇਲ ਕਰਨ ਜਾ ਰਹੀ ਹੈ, ਜਿਸ ਰਾਹੀਂ ਆਮ ਮੋਬਾਈਲ ਫੋਨ ਨੂੰ ਲਾਈਵ ਨੰਬਰ ਪਲੇਟ ਸਕੈਨਰ ਵਿੱਚ ਬਦਲਿਆ ਜਾ ਸਕੇਗਾ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਤਕਨਾਲੋਜੀ ਘੱਟ ਖਰਚੇ ਵਿੱਚ ਫਰੰਟਲਾਈਨ ਅਧਿਕਾਰੀਆਂ ਦੇ ਕੰਮ ਕਰਨ ਦੇ ਢੰਗ ਨੂੰ ਬਦਲ ਸਕਦੀ ਹੈ।
ਡਾਇਰੈਕਟਰ ਆਫ ਡਿਪਲਾਇਮੈਂਟ ਸੁਪਰਡੈਂਟ ਇਆਨ ਚੈਪਮੈਨ ਨੇ ਇਸਨੂੰ “ਅਸਲ ਗੇਮਚੇਂਜਰ” ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਇਹ ਤਕਨਾਲੋਜੀ ਪੁਲਿਸ ਅਧਿਕਾਰੀਆਂ ਨੂੰ ਚੋਰੀ ਹੋਏ ਵਾਹਨਾਂ ਜਾਂ ਪੁਲਿਸ ਦੀ ਨਿਗਰਾਨੀ ਹੇਠ ਵਿਅਕਤੀਆਂ ਬਾਰੇ ਤੁਰੰਤ ਜਾਣਕਾਰੀ ਦੇਣ ਵਿੱਚ ਮਦਦ ਕਰੇਗੀ।
ਉਨ੍ਹਾਂ ਕਿਹਾ ਕਿ ਜਦੋਂ ਪੁਲਿਸ ਕਿਸੇ ਵਾਹਨ ਨੂੰ ਰੋਕਦੀ ਹੈ ਤਾਂ ਅਕਸਰ ਅੰਦਰ ਬੈਠੇ ਲੋਕਾਂ ਬਾਰੇ ਬਹੁਤ ਘੱਟ ਜਾਂ ਕੋਈ ਜਾਣਕਾਰੀ ਨਹੀਂ ਹੁੰਦੀ। ਅਜਿਹੇ ਹਾਲਾਤਾਂ ਵਿੱਚ ਇਹ ਤਕਨਾਲੋਜੀ ਅਧਿਕਾਰੀਆਂ ਦੀ ਸੁਰੱਖਿਆ ਵਧਾ ਸਕਦੀ ਹੈ।
ਪੁਲਿਸ ਵੱਲੋਂ ਪਹਿਲਾਂ ਹੀ ਕੁਝ ਗੱਡੀਆਂ ਵਿੱਚ ਆਟੋਮੈਟਿਕ ਨੰਬਰ ਪਲੇਟ ਰਿਕੋਗਨਿਸ਼ਨ (ANPR) ਤਕਨਾਲੋਜੀ ਵਰਤੀ ਜਾ ਰਹੀ ਹੈ। ਇਨ੍ਹਾਂ ਵਾਹਨਾਂ ਦੀ ਛੱਤ ਉੱਤੇ ਕੈਮਰੇ ਲਗਾਏ ਜਾਂਦੇ ਹਨ ਅਤੇ ਇੱਕ ਗੱਡੀ ਵਿੱਚ ਇਹ ਸਿਸਟਮ ਲਗਾਉਣ ਦਾ ਖਰਚਾ ਲਗਭਗ 30,000 ਡਾਲਰ ਹੈ।
ਇਸ ਦੇ ਮੁਕਾਬਲੇ ਮੋਬਾਈਲ ਐਪ ਰਾਹੀਂ ਇਹੀ ਸਮਰੱਥਾ ਮੁਹੱਈਆ ਕਰਵਾਉਣਾ ਕਾਫ਼ੀ ਸਸਤਾ ਹੋਵੇਗਾ। ਚੈਪਮੈਨ ਮੁਤਾਬਕ ਜੇ ਛੇ ਹਫ਼ਤਿਆਂ ਦਾ ਪਾਇਲਟ ਸਫਲ ਰਹਿੰਦਾ ਹੈ ਤਾਂ ਲਗਭਗ 150,000 ਡਾਲਰ ਦੇ ਖਰਚੇ ਨਾਲ ਇਹ ਤਕਨਾਲੋਜੀ ਫਰੰਟਲਾਈਨ ਪੁਲਿਸ ਦੇ ਹਰ ਮੋਬਾਈਲ ਫੋਨ ਵਿੱਚ ਮੁਹੱਈਆ ਕਰਵਾਈ ਜਾ ਸਕਦੀ ਹੈ।
ਪੁਲਿਸ ਐਸੋਸੀਏਸ਼ਨ ਦੇ ਪ੍ਰਧਾਨ ਸਟੀਵ ਵਾਟ ਨੇ ਵੀ ਪਾਇਲਟ ਪ੍ਰੋਗਰਾਮ ਦਾ ਸਮਰਥਨ ਕੀਤਾ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਅਧਿਕਾਰੀਆਂ ਦੀ ਸੁਰੱਖਿਆ ਵਧੇਗੀ, ਕੰਮਕਾਜ ਦੀ ਉਤਪਾਦਕਤਾ ਵਿੱਚ ਸੁਧਾਰ ਹੋਵੇਗਾ ਅਤੇ ਡਿਊਟੀ ਦੌਰਾਨ ਪੁਲਿਸ ਨੂੰ ਰੀਅਲ-ਟਾਈਮ ਜਾਣਕਾਰੀ ਮਿਲ ਸਕੇਗੀ।
ਹਾਲਾਂਕਿ ਕ੍ਰਿਮਿਨੋਲੋਜਿਸਟ ਐਮੀ ਰਾਕੇਟੇ ਨੇ ਇਸ ਤਕਨਾਲੋਜੀ ਨੂੰ ਲੈ ਕੇ ਪ੍ਰਾਈਵੇਸੀ ਨਾਲ ਜੁੜੀਆਂ ਚਿੰਤਾਵਾਂ ਜ਼ਾਜ਼ਾਹਿਰ ਹਰ ਕੀਤੀਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਪੁਲਿਸ ਵੱਲੋਂ ਲੋਕਾਂ ਦੀ ਗਤੀਵਿਧੀ ਬਾਰੇ ਜਾਣਕਾਰੀ ਹਾਸਿਲ ਕਰਨ ਵੱਲ ਇੱਕ ਵੱਡਾ ਕਦਮ ਹੋ ਸਕਦਾ ਹੈ।
ਚੈਪਮੈਨ ਨੇ ਇਨ੍ਹਾਂ ਚਿੰਤਾਵਾਂ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਸਿਸਟਮ ਨੂੰ ਇਸ ਤਰੀਕੇ ਨਾਲ ਤਿਆਰ ਕੀਤਾ ਗਿਆ ਹੈ ਕਿ ਘੱਟ ਤੋਂ ਘੱਟ ਡਾਟਾ ਇਕੱਠਾ ਕੀਤਾ ਜਾਵੇ। ਉਨ੍ਹਾਂ ਮੁਤਾਬਕ ਤਕਨਾਲੋਜੀ ਰਾਹੀਂ ਫੁਟੇਜ ਜਾਂ ਤਸਵੀਰਾਂ ਰਿਕਾਰਡ ਨਹੀਂ ਕੀਤੀਆਂ ਜਾਣਗੀਆਂ।
ਚੋਰੀ ਹੋਏ ਵਾਹਨਾਂ ਅਤੇ ਪੁਲਿਸ ਦੀ ਦਿਲਚਸਪੀ ਵਾਲੇ ਵਿਅਕਤੀਆਂ ਤੋਂ ਇਲਾਵਾ ਇਹ ਐਪ ਉਨ੍ਹਾਂ ਵਾਹਨਾਂ ਬਾਰੇ ਵੀ ਚਿਤਾਵਨੀ ਦੇਵੇਗੀ ਜਿਨ੍ਹਾਂ ਦੀ ਵਾਰੰਟ ਆਫ ਫਿਟਨੈੱਸ (WOF) ਜਾਂ ਰਜਿਸਟ੍ਰੇਸ਼ਨ ਮਿਆਦ ਪੁੱਗ ਚੁੱਕੀ ਹੈ। ਹਾਲਾਂਕਿ ਇਸ ਲਈ ਮਿਆਦ ਖਤਮ ਹੋਏ ਦੋ ਮਹੀਨੇ ਤੋਂ ਵੱਧ ਹੋਣਾ ਲਾਜ਼ਮੀ ਹੋਵੇਗਾ।
ਇਸ ਤਕਨਾਲੋਜੀ ਦਾ ਪਾਇਲਟ ਪ੍ਰੋਗਰਾਮ ਛੇ ਹਫ਼ਤਿਆਂ ਤੱਕ ਚੱਲੇਗਾ ਅਤੇ ਇਸ ਵਿੱਚ ਦੇਸ਼ ਦੇ ਸ਼ਹਿਰੀ ਤੇ ਪੇਂਡੂ ਇਲਾਕਿਆਂ ਤੋਂ ਲਗਭਗ 50 ਫਰੰਟਲਾਈਨ ਪੁਲਿਸ ਕਰਮਚਾਰੀ ਹਿੱਸਾ ਲੈਣਗੇ।