ਵੈਲਿੰਗਟਨ, 14 ਸਤੰਬਰ 2026: ਨਿਊਜ਼ੀਲੈਂਡ ਦੇ ਗਵਰਨਮੈਂਟ ਹਾਊਸ, ਵੈਲਿੰਗਟਨ ਵਿੱਚ 14 ਸਤੰਬਰ ਨੂੰ ਇਨਵੈਸਟੀਚਰ ਸਮਾਰੋਹ ਕਰਵਾਇਆ ਗਿਆ। ਇਸ ਮੌਕੇ ਵੱਖ-ਵੱਖ ਖੇਤਰਾਂ ਵਿੱਚ ਯੋਗਦਾਨ ਪਾਉਣ ਵਾਲੇ 12 ਵਿਅਕਤੀਆਂ ਨੂੰ ਸਨਮਾਨਿਤ ਕੀਤਾ ਗਿਆ।
ਪੰਜ ਵਿਅਕਤੀਆਂ ਨੂੰ ਨਿਊਜ਼ੀਲੈਂਡ ਆਰਡਰ ਆਫ ਮੈਰਿਟ ਦੇ ਅਫਸਰ (ONZM) ਦੇ ਸਨਮਾਨ ਨਾਲ ਨਿਵਾਜਿਆ ਗਿਆ ਹੈ। ਇਨ੍ਹਾਂ ਵਿੱਚ ਕਾਰੋਬਾਰ ਲਈ ਸਕਾਟ ਓ’ਡੋਨੇਲ, ਮਾਓਰੀ ਮਿੱਟੀ ਕਲਾ ਲਈ ਬਾਏ ਰਿਡਲ, ਨਸਲੀ ਭਾਈਚਾਰਿਆਂ ਅਤੇ ਮਹਿਲਾਵਾਂ ਲਈ ਸੇਵਾਵਾਂ ਵਾਸਤੇ ਅਰਚਨਾ ਟੰਡਨ, ਸਿੱਖਣ ਵਿੱਚ ਅਸਮਰੱਥ ਲੋਕਾਂ ਲਈ ਸੇਵਾਵਾਂ ਵਾਸਤੇ ਹਾਮਿਸ਼ ਟੇਵਰਨਰ ਅਤੇ ਹਾਕੀ ਲਈ ਸੇਵਾਵਾਂ ਵਾਸਤੇ ਸ਼ੈਰਨ ਵਿਲੀਅਮਸਨ ਨੂੰ ਸਨਮਾਨਿਤ ਕੀਤਾ ਗਿਆ ਹੈ। ਇਨ੍ਹਾਂ ਸਾਰੇ ਸਨਮਾਨਿਤ ਵਿਅਕਤੀਆਂ ਨੂੰ ਉਨ੍ਹਾਂ ਦੇ ਅਹੁਦੇ ਨਾਲ ਸਬੰਧਤ ਅਧਿਕਾਰਤ ਵਾਰੰਟ ਵੀ ਪ੍ਰਦਾਨ ਕੀਤੇ ਗਏ।
ਤਿੰਨ ਵਿਅਕਤੀਆਂ ਨੂੰ MNZM ਅਤੇ ਤਿੰਨ ਹੋਰਾਂ ਨੂੰ KSM ਸਨਮਾਨ ਦਿੱਤੇ ਗਏ। ਇਹ ਸਨਮਾਨ ਸਿੱਖਿਆ, ਸੰਗੀਤ, ਮਾਓਰੀ ਮਾਨਸਿਕ ਸਿਹਤ ਤੇ ਨਸ਼ਾ ਮੁਕਤੀ ਸੇਵਾਵਾਂ, ਨਿਊਏ ਭਾਈਚਾਰੇ ਅਤੇ ਪੇਂਡੂ ਭਾਈਚਾਰਿਆਂ ਵਿੱਚ ਯੋਗਦਾਨ ਲਈ ਦਿੱਤੇ ਗਏ।
ਇਸ ਤੋਂ ਇਲਾਵਾ ਇੱਕ ਵਿਅਕਤੀ ਨੂੰ ਅੰਟਾਰਕਟਿਕ ਕਾਨੂੰਨ ਅਤੇ ਵਾਤਾਵਰਣ ਸੁਰੱਖਿਆ ਦੇ ਖੇਤਰ ਵਿੱਚ ਸੇਵਾਵਾਂ ਲਈ ਨਿਊਜ਼ੀਲੈਂਡ ਅੰਟਾਰਕਟਿਕ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ।
ਅਰਚਨਾ ਟੰਡਨ ਨੂੰ ਨਿਊਜ਼ੀਲੈਂਡ ਆਰਡਰ ਆਫ ਮੈਰਿਟ ਦਾ ਸਨਮਾਨ
ਅਰਚਨਾ ਟੰਡਨ, JP ਨੂੰ ਨਸਲੀ ਭਾਈਚਾਰਿਆਂ ਅਤੇ ਮਹਿਲਾਵਾਂ ਲਈ ਉਨ੍ਹਾਂ ਦੀਆਂ ਸੇਵਾਵਾਂ ਵਾਸਤੇ ONZM ਨਾਲ ਸਨਮਾਨਿਤ ਕੀਤਾ ਗਿਆ। ਟੰਡਨ ਨੇ 1997 ਤੋਂ ਨਸਲੀ ਭਾਈਚਾਰਿਆਂ ਅਤੇ ਬਹੁ-ਸੱਭਿਆਚਾਰਕ ਵਿਕਾਸ ਲਈ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ। ਉਨ੍ਹਾਂ ਨੇ ਸਮਾਜਿਕ ਏਕਤਾ, ਮਹਿਲਾ ਸਸ਼ਕਤੀਕਰਨ, ਪ੍ਰਵਾਸੀਆਂ ਦੇ ਮੁੜ ਵਸੇਬੇ ਅਤੇ ਵੱਖ-ਵੱਖ ਸੱਭਿਆਚਾਰਾਂ ਤੇ ਧਰਮਾਂ ਵਿਚਕਾਰ ਸਮਝ ਵਧਾਉਣ ਲਈ ਕੰਮ ਕੀਤਾ।
ਉਨ੍ਹਾਂ ਨੇ ਨਿਊਜ਼ੀਲੈਂਡ ਫੈਡਰੇਸ਼ਨ ਆਫ ਮਲਟੀਕਲਚਰਲ ਵੁਮੈਨਜ਼ ਕੌਂਸਲਜ਼, ਕ੍ਰਾਈਸਟਚਰਚ ਮਾਈਗ੍ਰੈਂਟ ਸੈਂਟਰ, ਕ੍ਰਾਈਸਟਚਰਚ ਰੀਸੈਟਲਮੈਂਟ ਸਰਵਿਸਿਜ਼ ਅਤੇ ਸ਼ਕਤੀ ਐਥਨਿਕ ਵੁਮੈਨਜ਼ ਸਪੋਰਟ ਗਰੁੱਪ ਸਮੇਤ ਕਈ ਸੰਸਥਾਵਾਂ ਵਿੱਚ ਆਗੂ ਭੂਮਿਕਾਵਾਂ ਨਿਭਾਈਆਂ ਹਨ। ਉਹ ਇਸ ਸਮੇਂ ਕ੍ਰਾਈਸਟਚਰਚ ਮਲਟੀਕਲਚਰਲ ਕੌਂਸਲ ਅਤੇ ਕੈਂਟਰਬਰੀ ਇੰਡੀਅਨ ਵੁਮੈਨ ਗਰੁੱਪ ਟਰੱਸਟ ਨਾਲ ਵੀ ਜੁੜੀ ਹੋਏ ਹਨ।
ਟੰਡਨ ਨੇ Many Voices – Christchurch Multicultural Festival ਅਤੇ ਲਿੰਕਨ ਦੇ ਸਾਲਾਨਾ ਮਲਟੀਕਲਚਰਲ ਫੈਸਟੀਵਲ ਦੀ ਅਗਵਾਈ ਕੀਤੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ Living Between Two Cultures, Indian Women’s Expo, ਸਾਲਾਨਾ ਦੀਵਾਲੀ, ਕਰਵਾ ਚੌਥ, ਸਵੈ-ਰੱਖਿਆ, ਯੋਗਾ, ਅੰਤਰ-ਸੱਭਿਆਚਾਰਕ ਪੇਰੈਂਟਿੰਗ ਅਤੇ ਸਿਹਤ ਸਬੰਧੀ ਪ੍ਰੋਗਰਾਮਾਂ ਵਰਗੀਆਂ ਪਹਿਲਕਦਮੀਆਂ ਦੀ ਅਗਵਾਈ ਕੀਤੀ।
ਉਨ੍ਹਾਂ ਵੱਲੋਂ ਤਿਆਰ ਅਤੇ ਅਗਵਾਈ ਕੀਤੇ Women’s Wellbeing Framework ਨੂੰ 24 ਖੇਤਰੀ ਬਹੁ-ਸੱਭਿਆਚਾਰਕ ਕੌਂਸਲਾਂ ਵੱਲੋਂ ਅਪਣਾਇਆ ਗਿਆ। ਉਨ੍ਹਾਂ ਨੇ ਘਰੇਲੂ ਹਿੰਸਾ ਅਤੇ ਬੱਚਿਆਂ ਨਾਲ ਦੁਰਵਿਵਹਾਰ ਵਿਰੁੱਧ ਮੁਹਿੰਮਾਂ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਈ।
ਕ੍ਰਾਈਸਟਚਰਚ ਭੂਚਾਲਾਂ, ਕੋਵਿਡ-19 ਮਹਾਮਾਰੀ ਅਤੇ 2019 ਦੇ ਅੱਤਵਾਦੀ ਹਮਲਿਆਂ ਦੌਰਾਨ ਵੀ ਟੰਡਨ ਨੇ ਭਾਈਚਾਰਿਆਂ ਨੂੰ ਇਕੱਠਾ ਕਰਕੇ ਸਹਾਇਤਾ ਅਤੇ ਜਾਗਰੂਕਤਾ ਮੁਹਿੰਮਾਂ ਵਿੱਚ ਯੋਗਦਾਨ ਪਾਇਆ।