ਪਿਛਲੇ ਦਿਨੀ ਇਜ਼ਰਾਈਲ ਜਾ ਰਹੀ FlyDubai ਦੀ ਇੱਕ ਉਡਾਣ ਵਿੱਚ ਕਥਿਤ ਹਾਈਜੈਕਿੰਗ ਦੀ ਕੋਸ਼ਿਸ਼ ਦੌਰਾਨ ਪਾਇਲਟ ਕੈਪਟਨ ਸਮਿਤ ਮਚਛਰ ’ਤੇ ਚਾਕੂ ਨਾਲ ਹਮਲਾ ਕੀਤਾ ਗਿਆ ਸੀ। ਦੱਸ ਦੇਈਏ ਕੈਪਟਨ ਮਚਛਰ ਨੇ ਨਿਊਜ਼ੀਲੈਂਡ ਦੇ ਡੁਨੇਡਿਨ ਸਥਿਤ Mainland Air ਫਲਾਈਟ ਸਕੂਲ ਤੋਂ ਪਾਇਲਟ ਦੀ ਸਿਖਲਾਈ ਹਾਸਲ ਕੀਤੀ ਸੀ।
ਰਿਪੋਰਟਾਂ ਮੁਤਾਬਕ ਕੈਪਟਨ ਮਚਛਰ ਨੇ 2008 ਵਿੱਚ ਕਰੀਬ 18 ਮਹੀਨੇ Mainland Air ਵਿੱਚ ਸਿਖਲਾਈ ਲਈ ਅਤੇ ਇਸ ਤੋਂ ਬਾਅਦ ਭਾਰਤ ਵਾਪਸ ਜਾ ਕੇ ਆਪਣਾ ਹਵਾਬਾਜ਼ੀ ਕਰੀਅਰ ਜਾਰੀ ਰੱਖਿਆ। ਫਲਾਈਟ ਸਕੂਲ ਦੇ ਮੁੱਖ ਕਾਰਜਕਾਰੀ ਫਿਲਿਪ ਕੀਨ ਨੇ ਕਿਹਾ ਕਿ ਮਚਛਰ ਇੱਕ ਮਜ਼ਬੂਤ ਵਿਦਿਆਰਥੀ ਸਨ ਅਤੇ ਹੋਰ ਸਿਖਿਆਰਥੀਆਂ ਵਿੱਚੋਂ ਖਾਸ ਤੌਰ ’ਤੇ ਨਜ਼ਰ ਆਉਂਦੇ ਸਨ।
ਇਹ FlyDubai ਉਡਾਣ ਸੰਯੁਕਤ ਅਰਬ ਅਮੀਰਾਤ ਤੋਂ ਤੇਲ ਅਵੀਵ ਜਾ ਰਹੀ ਸੀ ਅਤੇ ਇਸ ਵਿੱਚ ਕਰੀਬ 170 ਯਾਤਰੀ ਸਵਾਰ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਸਹਿ-ਪਾਇਲਟ ਨੇ ਕੈਪਟਨ ਮਚਛਰ ’ਤੇ ਹਮਲਾ ਕੀਤਾ ਅਤੇ ਜਹਾਜ਼ ਨੂੰ ਹੇਠਾਂ ਲਿਆਉਣ ਦੀ ਕੋਸ਼ਿਸ਼ ਕੀਤੀ। ਇਸ ਦੌਰਾਨ ਜਹਾਜ਼ ਲਗਭਗ ਇੱਕ ਮਿੰਟ ਵਿੱਚ 33,000 ਫੁੱਟ ਤੋਂ 17,000 ਫੁੱਟ ਦੀ ਉਚਾਈ ਤੱਕ ਆ ਗਿਆ, ਜਿਸ ਕਾਰਨ ਯਾਤਰੀਆਂ ਵਿੱਚ ਦਹਿਸ਼ਤ ਫੈਲ ਗਈ।
ਕੈਬਿਨ ਵਿੱਚ ਬਣੀ ਵੀਡੀਓ ਵਿੱਚ ਇੱਕ ਪਾਇਲਟ ਦੀ ਕਮੀਜ਼ ’ਤੇ ਖੂਨ ਦਿਖਾਈ ਦੇ ਰਿਹਾ ਹੈ ਅਤੇ ਉਸ ਨੂੰ ਜਹਾਜ਼ ਦੇ ਗਲਿਆਰੇ ਵਿੱਚ ਇਲਾਜ ਦਿੱਤਾ ਜਾ ਰਿਹਾ ਹੈ। ਇੱਕ ਹੋਰ ਵਿਅਕਤੀ ਨੂੰ ਫਰਸ਼ ’ਤੇ ਕਾਬੂ ਕੀਤੇ ਹੋਏ ਵੀ ਦਿਖਾਇਆ ਗਿਆ।
Mainland Air ਦੇ ਮੁੱਖ ਕਾਰਜਕਾਰੀ ਫਿਲਿਪ ਕੀਨ ਨੇ ਕਿਹਾ ਕਿ ਘਟਨਾ ਦੀਆਂ ਖ਼ਬਰਾਂ ਦੇਖਦੇ ਹੀ ਉਨ੍ਹਾਂ ਨੇ ਆਪਣੇ ਪੁਰਾਣੇ ਵਿਦਿਆਰਥੀ ਨੂੰ ਪਛਾਣ ਲਿਆ। ਉਨ੍ਹਾਂ ਮੁਤਾਬਕ ਮਚਛਰ ਨੇ ਪੜ੍ਹਾਈ ਦੌਰਾਨ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ ਸੀ। ਕੀਨ ਨੇ ਕਿਹਾ ਕਿ ਉਹ ਅਜੇ ਵੀ ਮਚਛਰ ਦੇ ਸੰਪਰਕ ਵਿੱਚ ਸਨ ਅਤੇ ਉਹ ਭਾਰਤ ਵਿੱਚ ਵਿਦਿਆਰਥੀਆਂ ਦੀ ਭਰਤੀ ਲਈ ਸਕੂਲ ਦੀ ਮਦਦ ਵੀ ਕਰਦੇ ਰਹੇ ਹਨ।
ਦੋ ਆਫ-ਡਿਊਟੀ ਪਾਇਲਟਾਂ ਵੱਲੋਂ ਹਮਲਾਵਰ ਨੂੰ ਕਾਬੂ ਕਰਨ ਦੀ ਰਿਪੋਰਟ
ਰਿਪੋਰਟਾਂ ਅਨੁਸਾਰ, ਜਹਾਜ਼ ਵਿੱਚ ਮੌਜੂਦ ਇੱਕ ਯਾਤਰੀ ਅਤੇ ਇੱਕ ਕਰੂ ਮੈਂਬਰ ਨੇ ਕਾਕਪਿਟ ਵਿੱਚ ਦਾਖਲ ਹੋ ਕੇ ਹਮਲਾਵਰ ਨੂੰ ਕਾਬੂ ਕਰਨ ਵਿੱਚ ਮਦਦ ਕੀਤੀ। ਇਸ ਤੋਂ ਬਾਅਦ ਹੋਰ ਕਰੂ ਮੈਂਬਰਾਂ ਨੇ ਵੀ ਜਹਾਜ਼ ਦਾ ਕੰਟਰੋਲ ਸੰਭਾਲ ਲਿਆ ਅਤੇ ਉਡਾਣ ਨੂੰ ਸਾਊਦੀ ਅਰਬ ਵਿੱਚ ਸੁਰੱਖਿਅਤ ਉਤਾਰਿਆ ਗਿਆ।
Aviation Herald ਦੀ ਰਿਪੋਰਟ ਮੁਤਾਬਕ ਦੋ ਆਫ-ਡਿਊਟੀ ਪਾਇਲਟ, ਜੋ ਯਾਤਰੀਆਂ ਵਜੋਂ ਜਹਾਜ਼ ਵਿੱਚ ਸਵਾਰ ਸਨ, ਨੇ ਵੀ ਹਮਲਾਵਰ ਨੂੰ ਕਾਬੂ ਕਰਨ ਵਿੱਚ ਭੂਮਿਕਾ ਨਿਭਾਈ। ਇਨ੍ਹਾਂ ਵਿੱਚੋਂ ਇੱਕ ਦੱਖਣੀ ਅਫ਼ਰੀਕਾ ਅਤੇ ਦੂਜਾ ਨਿਊਜ਼ੀਲੈਂਡ ਦਾ ਨਾਗਰਿਕ ਦੱਸਿਆ ਗਿਆ ਹੈ। ਹਾਲਾਂਕਿ, ਨਿਊਜ਼ੀਲੈਂਡ ਦੇ ਅਧਿਕਾਰੀਆਂ ਨੇ ਇਸ ਜਾਣਕਾਰੀ ਦੀ ਅਜੇ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ।
ਨਿਊਜ਼ੀਲੈਂਡ ਦੇ ਵਿਦੇਸ਼ ਮੰਤਰਾਲੇ ਨੇ ਕਿਹਾ ਕਿ ਉਸ ਨੂੰ ਇੱਕ ਨਿਊਜ਼ੀਲੈਂਡ ਨਾਗਰਿਕ ਦੇ ਜਹਾਜ਼ ਵਿੱਚ ਹੋਣ ਸਬੰਧੀ ਰਿਪੋਰਟਾਂ ਦੀ ਜਾਣਕਾਰੀ ਹੈ, ਪਰ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ। ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਕਿਹਾ ਕਿ ਉਨ੍ਹਾਂ ਨੂੰ ਮਿਲੀ ਮੁੱਢਲੀ ਜਾਣਕਾਰੀ ਮੁਤਾਬਕ ਜਹਾਜ਼ ਵਿੱਚ ਕੋਈ ਨਿਊਜ਼ੀਲੈਂਡ ਨਾਗਰਿਕ ਨਹੀਂ ਸੀ ਅਤੇ ਅਧਿਕਾਰੀ ਮਾਮਲੇ ਦੀ ਜਾਂਚ ਜਾਰੀ ਰੱਖ ਰਹੇ ਹਨ।
ਕਾਕਪਿਟ ਸੁਰੱਖਿਆ ’ਤੇ ਵੀ ਸਵਾਲ
ਹਵਾਈ ਜਹਾਜ਼ਾਂ ਵਿੱਚ ਸੁਰੱਖਿਆ ਕਾਰਨਾਂ ਕਰਕੇ ਉਡਾਣ ਦੌਰਾਨ ਕਾਕਪਿਟ ਦਾ ਦਰਵਾਜ਼ਾ ਲਾਕ ਰਹਿੰਦਾ ਹੈ। 11 ਸਤੰਬਰ 2001 ਦੇ ਅੱਤਵਾਦੀ ਹਮਲਿਆਂ ਤੋਂ ਬਾਅਦ ਇਹ ਪ੍ਰਬੰਧ ਹਵਾਬਾਜ਼ੀ ਉਦਯੋਗ ਵਿੱਚ ਮਿਆਰੀ ਸੁਰੱਖਿਆ ਉਪਾਅ ਬਣ ਗਿਆ ਸੀ।
ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੋਇਆ ਕਿ ਯਾਤਰੀ ਅਤੇ ਕਰੂ ਮੈਂਬਰ FlyDubai ਦੇ ਕਾਕਪਿਟ ਵਿੱਚ ਕਿਵੇਂ ਦਾਖਲ ਹੋਏ। ਇਹ ਵੀ ਅਧਿਕਾਰਤ ਤੌਰ ’ਤੇ ਸਪੱਸ਼ਟ ਨਹੀਂ ਕੀਤਾ ਗਿਆ ਕਿ ਜਹਾਜ਼ ਨੂੰ ਸੁਰੱਖਿਅਤ ਲੈਂਡਿੰਗ ਤੱਕ ਕਿਸ ਪਾਇਲਟ ਨੇ ਉਡਾਇਆ।