ਨਿਊਜ਼ੀਲੈਂਡ ਵਿੱਚ 1 ਅਕਤੂਬਰ ਤੋਂ ਸੜਕਾਂ ਨਾਲ ਜੁੜੇ ਚਾਰ ਨਵੇਂ ਨਿਯਮ ਲਾਗੂ ਹੋ ਗਏ ਹਨ। ਇਨ੍ਹਾਂ ਤਹਿਤ ਵਾਹਨਾਂ ਵੱਲੋਂ ਹੋਰ ਸੜਕ ਉਪਭੋਗਤਾਵਾਂ ਨੂੰ ਓਵਰਟੇਕ ਕਰਨ, ਬੱਚਿਆਂ ਦੇ ਸਾਈਕਲ ਚਲਾਉਣ, ਈ-ਸਕੂਟਰਾਂ ਅਤੇ ਬੱਸਾਂ ਨੂੰ ਰਸਤਾ ਦੇਣ ਸਬੰਧੀ ਨਿਯਮਾਂ ਵਿੱਚ ਬਦਲਾਅ ਕੀਤਾ ਗਿਆ ਹੈ।
ਟਰਾਂਸਪੋਰਟ ਮੰਤਰੀ ਕ੍ਰਿਸ ਬਿਸ਼ਪ ਨੇ ਕਿਹਾ ਕਿ ਇਨ੍ਹਾਂ ਤਬਦੀਲੀਆਂ ਦਾ ਮਕਸਦ ਸੜਕਾਂ ਨੂੰ ਸੁਰੱਖਿਅਤ ਬਣਾਉਣਾ, ਨਿਯਮਾਂ ਨੂੰ ਸਪੱਸ਼ਟ ਕਰਨਾ ਅਤੇ ਰੋਜ਼ਾਨਾ ਆਵਾਜਾਈ ਵਿੱਚ ਆ ਰਹੀਆਂ ਬੇਲੋੜੀਆਂ ਰੁਕਾਵਟਾਂ ਨੂੰ ਘਟਾਉਣਾ ਹੈ।
1. ਓਵਰਟੇਕ ਕਰਦੇ ਸਮੇਂ 1.5 ਮੀਟਰ ਦੀ ਦੂਰੀ ਲਾਜ਼ਮੀ
ਹੁਣ ਜਦੋਂ ਕੋਈ ਡਰਾਈਵਰ ਸਾਈਕਲ ਸਵਾਰ, ਪੈਦਲ ਯਾਤਰੀ, ਘੋੜਸਵਾਰ ਜਾਂ ਕਿਸੇ ਹੋਰ ਅਜਿਹੇ ਸੜਕ ਉਪਭੋਗਤਾ ਨੂੰ ਓਵਰਟੇਕ ਕਰੇਗਾ ਜੋ ਮੋਟਰ ਵਾਹਨ ਨਹੀਂ ਚਲਾ ਰਿਹਾ, ਤਾਂ ਘੱਟੋ-ਘੱਟ 1.5 ਮੀਟਰ ਦਾ ਫਾਸਲਾ ਰੱਖਣਾ ਲਾਜ਼ਮੀ ਹੋਵੇਗਾ।
ਇਹ ਨਿਯਮ ਉਸ ਸਮੇਂ ਲਾਗੂ ਹੋਵੇਗਾ ਜਦੋਂ ਦੋਵੇਂ ਇੱਕੋ ਦਿਸ਼ਾ ਵਿੱਚ ਅਤੇ ਇੱਕੋ ਲੇਨ ਵਿੱਚ ਜਾ ਰਹੇ ਹੋਣ।
ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ (NZTA) ਮੁਤਾਬਿਕ, ਜੇਕਰ ਸੁਰੱਖਿਅਤ ਢੰਗ ਨਾਲ ਓਵਰਟੇਕ ਕਰਨ ਲਈ ਲੋੜੀਂਦੀ ਜਗ੍ਹਾ ਨਾ ਹੋਵੇ ਤਾਂ ਡਰਾਈਵਰ ਨੂੰ ਪਿੱਛੇ ਰਹਿ ਕੇ ਇੰਤਜ਼ਾਰ ਕਰਨਾ ਚਾਹੀਦਾ ਹੈ। ਵੱਡੇ ਵਾਹਨ ਦੇ ਲੰਘਣ ਨਾਲ ਪੈਦਾ ਹੋਣ ਵਾਲੀ ਹਵਾ ਵੀ ਸਾਈਕਲ ਸਵਾਰਾਂ ਦਾ ਸੰਤੁਲਨ ਪ੍ਰਭਾਵਿਤ ਕਰ ਸਕਦੀ ਹੈ।
2. 12 ਸਾਲ ਤੱਕ ਦੇ ਬੱਚੇ ਫੁੱਟਪਾਥ ‘ਤੇ ਸਾਈਕਲ ਚਲਾ ਸਕਣਗੇ
ਹੁਣ 12 ਸਾਲ ਜਾਂ ਇਸ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਫੁੱਟਪਾਥ ‘ਤੇ ਸਾਈਕਲ ਚਲਾਉਣ ਦੀ ਇਜਾਜ਼ਤ ਹੋਵੇਗੀ।
ਇਸ ਤੋਂ ਇਲਾਵਾ, ਮਾਪੇ ਜਾਂ ਦੇਖਭਾਲ ਕਰਨ ਵਾਲੇ ਵਿਅਕਤੀ ਵੀ ਬੱਚਿਆਂ ਦੇ ਨਾਲ ਫੁੱਟਪਾਥ ‘ਤੇ ਸਾਈਕਲ ਚਲਾ ਸਕਣਗੇ।
ਸਰਕਾਰ ਨੇ ਲੋਕਾਂ ਤੋਂ ਮਿਲੇ ਸੁਝਾਵਾਂ ਤੋਂ ਬਾਅਦ ਇਸ ਪ੍ਰਸਤਾਵ ਵਿੱਚ ਤਬਦੀਲੀ ਕੀਤੀ ਹੈ। ਮੰਤਰੀ ਕ੍ਰਿਸ ਬਿਸ਼ਪ ਨੇ ਕਿਹਾ ਕਿ ਜੇਕਰ ਬੱਚਿਆਂ ਨੂੰ ਤਾਂ ਫੁੱਟਪਾਥ ‘ਤੇ ਸਾਈਕਲ ਚਲਾਉਣ ਦੀ ਇਜਾਜ਼ਤ ਹੋਵੇ ਪਰ ਉਨ੍ਹਾਂ ਦੇ ਨਾਲ ਜਾਣ ਵਾਲੇ ਮਾਪਿਆਂ ਨੂੰ ਸੜਕ ‘ਤੇ ਹੀ ਸਾਈਕਲ ਚਲਾਉਣੀ ਪਵੇ, ਤਾਂ ਇਹ ਪ੍ਰਬੰਧ ਅਧੂਰਾ ਰਹਿੰਦਾ।
ਹਾਲਾਂਕਿ, ਕੁਝ ਲੋਕਾਂ ਨੇ ਇਸ ਬਦਲਾਅ ਨਾਲ ਫੁੱਟਪਾਥ ‘ਤੇ ਪੈਦਲ ਚੱਲਣ ਵਾਲਿਆਂ, ਖਾਸ ਕਰਕੇ ਬਜ਼ੁਰਗਾਂ ਅਤੇ ਅਪਾਹਜ ਵਿਅਕਤੀਆਂ ਦੀ ਸੁਰੱਖਿਆ ਬਾਰੇ ਚਿੰਤਾ ਵੀ ਜ਼ਾਹਿਰ ਕੀਤੀ ਹੈ।
3. ਈ-ਸਕੂਟਰ ਹੁਣ ਸਾਈਕਲ ਲੇਨਾਂ ਵਿੱਚ ਚੱਲ ਸਕਣਗੇ
ਨਵੇਂ ਨਿਯਮਾਂ ਤਹਿਤ ਕੁਝ ਈ-ਸਕੂਟਰਾਂ ਨੂੰ ਸਾਈਕਲ ਲੇਨਾਂ ਵਿੱਚ ਚਲਾਉਣ ਦੀ ਇਜਾਜ਼ਤ ਮਿਲ ਗਈ ਹੈ।
ਇਸ ਤੋਂ ਪਹਿਲਾਂ ਅਜਿਹੇ ਈ-ਸਕੂਟਰਾਂ ਨੂੰ ਫੁੱਟਪਾਥ ਅਤੇ ਸੜਕ ‘ਤੇ ਚਲਾਉਣ ਦੀ ਇਜਾਜ਼ਤ ਸੀ, ਪਰ ਸਾਈਕਲ ਲੇਨਾਂ ਦੀ ਵਰਤੋਂ ਕਰਨਾ ਗੈਰਕਾਨੂੰਨੀ ਸੀ।
NZTA ਮੁਤਾਬਕ ਇਹ ਨਿਯਮ ਉਨ੍ਹਾਂ ਈ-ਸਕੂਟਰਾਂ ਲਈ ਹੈ ਜੋ ਮੋਟਰ ਵਾਹਨ ਦੀ ਸ਼੍ਰੇਣੀ ਵਿੱਚ ਨਹੀਂ ਆਉਂਦੇ।
4. ਬੱਸਾਂ ਨੂੰ ਰਸਤਾ ਦੇਣਾ ਹੋਵੇਗਾ
60 ਕਿਲੋਮੀਟਰ ਪ੍ਰਤੀ ਘੰਟਾ ਜਾਂ ਇਸ ਤੋਂ ਘੱਟ ਸਪੀਡ ਲਿਮਿਟ ਵਾਲੀਆਂ ਸੜਕਾਂ ‘ਤੇ ਜਦੋਂ ਬੱਸ ਕਿਸੇ ਬੱਸ ਸਟਾਪ ਤੋਂ ਚੱਲਣ ਲਈ ਸੜਕ ‘ਤੇ ਆ ਰਹੀ ਹੋਵੇ, ਸਾਈਡ ਤੋਂ ਨਿਕਲ ਰਹੀ ਹੋਵੇ ਜਾਂ ਬੱਸ ਲੇਨ ਤੋਂ ਬਾਹਰ ਆ ਰਹੀ ਹੋਵੇ, ਤਾਂ ਹੋਰ ਡਰਾਈਵਰਾਂ ਨੂੰ ਬੱਸ ਨੂੰ ਰਸਤਾ ਦੇਣਾ ਹੋਵੇਗਾ।
ਬੱਸ ਡਰਾਈਵਰ ਨੂੰ ਆਪਣਾ ਇਰਾਦਾ ਘੱਟੋ-ਘੱਟ ਤਿੰਨ ਸਕਿੰਟ ਪਹਿਲਾਂ ਇੰਡੀਕੇਟਰ ਰਾਹੀਂ ਦੱਸਣਾ ਹੋਵੇਗਾ, ਤਾਂ ਜੋ ਹੋਰ ਡਰਾਈਵਰਾਂ ਨੂੰ ਪ੍ਰਤੀਕਿਰਿਆ ਦੇਣ ਅਤੇ ਬੱਸ ਡਰਾਈਵਰ ਨੂੰ ਰਸਤਾ ਸਾਫ਼ ਹੋਣ ਦੀ ਜਾਂਚ ਕਰਨ ਲਈ ਸਮਾਂ ਮਿਲ ਸਕੇ।
ਘਾਹ ਵਾਲੇ ਬਰਮ ‘ਤੇ ਪਾਰਕਿੰਗ ਬਾਰੇ ਪ੍ਰਸਤਾਵ ਵਾਪਸ
ਸਰਕਾਰ ਨੇ ਪਹਿਲਾਂ ਸਥਾਨਕ ਕੌਂਸਲਾਂ ਨੂੰ ਘਾਹ ਵਾਲੇ ਬਰਮ ‘ਤੇ ਵਾਹਨ ਪਾਰਕ ਕਰਨ ਵਾਲਿਆਂ ਨੂੰ ਜੁਰਮਾਨਾ ਕਰਨ ਲਈ ਵਧੇਰੇ ਅਧਿਕਾਰ ਦੇਣ ਦਾ ਪ੍ਰਸਤਾਵ ਰੱਖਿਆ ਸੀ।
ਪਰ ਲੋਕਾਂ ਤੋਂ ਮਿਲੇ ਫੀਡਬੈਕ ਤੋਂ ਬਾਅਦ ਸਰਕਾਰ ਨੇ ਇਸ ਪ੍ਰਸਤਾਵ ਨੂੰ ਅੱਗੇ ਨਾ ਵਧਾਉਣ ਦਾ ਫੈਸਲਾ ਕੀਤਾ ਹੈ।
ਸਰਕਾਰ ਮੁਤਾਬਿਕ ਇਹ ਤਬਦੀਲੀਆਂ ਵਿਆਪਕ ਲੈਂਡ ਟਰਾਂਸਪੋਰਟ ਨਿਯਮਾਂ ਵਿੱਚ ਸੁਧਾਰ ਦਾ ਹਿੱਸਾ ਹਨ। ਆਉਣ ਵਾਲੇ ਸਮੇਂ ਵਿੱਚ ਡਿਜੀਟਲ ਡਰਾਈਵਰ ਲਾਇਸੈਂਸ ਦੀ ਸ਼ੁਰੂਆਤ ਵੀ ਇਸ ਸੁਧਾਰ ਦਾ ਹਿੱਸਾ ਹੈ।