ਕਸੂਤਾ ਫਸਿਆ ਪੈਟਰੋਲ ਪੰਪਾਂ ਤੋਂ ਬਿਨਾਂ ਪੈਸੇ ਦਿੱਤੇ ਗੱਡੀ ਭਜਾਉਣ ਵਾਲਾ ਸੁਰੱਖਿਆ ਗਾਰਡ, ਲਾਇਸੈਂਸ ਰੱਦ !

ਨਿਊਜ਼ੀਲੈਂਡ ਵਿੱਚ ਪੈਟਰੋਲ ਪੰਪਾਂ ਤੋਂ ਵਾਰ-ਵਾਰ ਬਿਨਾਂ ਭੁਗਤਾਨ ਕੀਤੇ ਗੱਡੀ ਭਜਾਉਣ ਅਤੇ ਵੀਜ਼ਾ ਦੀ ਮਿਆਦ ਖ਼ਤਮ ਹੋਣ ਦੇ ਬਾਵਜੂਦ ਦੇਸ਼ ਵਿੱਚ ਰਹਿਣ ਵਾਲੇ ਇੱਕ ਸੁਰੱਖਿਆ ਗਾਰਡ ਦਾ ਲਾਇਸੈਂਸ ਰੱਦ ਕਰ ਦਿੱਤਾ ਗਿਆ ਹੈ।

ਪ੍ਰਾਈਵੇਟ ਸਕਿਊਰਿਟੀ ਪਰਸੋਨਲ ਲਾਇਸੈਂਸਿੰਗ ਅਥਾਰਟੀ ਦੀ ਅਧਿਕਾਰੀ ਟ੍ਰਿਸ਼ ਮੈਕਕੌਨਲ ਨੇ ਮੰਗਲਵਾਰ ਨੂੰ ਗੁਰਲੀਨ ਬਾਹੀਆ ਦਾ ਸਰਟੀਫਿਕੇਟ ਆਫ ਅਪਰੂਵਲ (COA) ਰੱਦ ਕਰਨ ਦਾ ਫੈਸਲਾ ਸੁਣਾਇਆ।

ਪੁਲਿਸ ਨੇ Private Security Personnel and Private Investigators Act 2010 ਤਹਿਤ ਬਾਹੀਆ ਦਾ ਲਾਇਸੈਂਸ ਰੱਦ ਕਰਨ ਦੀ ਅਰਜ਼ੀ ਦਿੱਤੀ ਸੀ। ਪੁਲਿਸ ਮੁਤਾਬਿਕ ਦਸੰਬਰ 2025 ਤੋਂ ਲੈ ਕੇ ਹੁਣ ਤੱਕ ਉਹ ਕਥਿਤ ਤੌਰ ’ਤੇ 9 ਵਾਰ ਪੈਟਰੋਲ ਪੰਪਾਂ ਤੋਂ ਬਿਨਾਂ ਪੈਸੇ ਦਿੱਤੇ ਗੱਡੀ ਭਜਾ ਚੁੱਕਾ ਹੈ।

ਬਾਹੀਆ ਨੇ ਦਸੰਬਰ 2025, ਅਪ੍ਰੈਲ 2026 ਅਤੇ ਮਈ 2026 ਵਿੱਚ ਹੋਈਆਂ ਤਿੰਨ ਚੋਰੀਆਂ ਨੂੰ ਮੰਨਿਆ ਸੀ। ਇਨ੍ਹਾਂ ਮਾਮਲਿਆਂ ਵਿੱਚ ਉਸ ਨੂੰ ਪੁਲਿਸ ਵੱਲੋਂ ਰਸਮੀ ਚਿਤਾਵਨੀ ਵੀ ਦਿੱਤੀ ਗਈ ਸੀ।

ਪੁਲਿਸ ਨੇ ਦੱਸਿਆ ਕਿ ਇਸ ਦੇ ਬਾਵਜੂਦ ਬਾਹੀਆ ਵੱਲੋਂ ਕਥਿਤ ਤੌਰ ’ਤੇ ਅਜਿਹੀਆਂ ਘਟਨਾਵਾਂ ਜਾਰੀ ਰਹੀਆਂ। 22 ਅਤੇ 28 ਅਗਸਤ ਦੀਆਂ ਘਟਨਾਵਾਂ ਸਬੰਧੀ ਉਸ ’ਤੇ ਅਪਰਾਧਿਕ ਦੋਸ਼ ਲਗਾਏ ਜਾਣ ਦੀ ਕਾਰਵਾਈ ਚੱਲ ਰਹੀ ਹੈ, ਜਦਕਿ ਚਾਰ ਹੋਰ ਕਥਿਤ ਘਟਨਾਵਾਂ ਵਿੱਚ ਅਜੇ ਤੱਕ ਚਾਰਜ ਨਹੀਂ ਲਗਾਏ ਗਏ।

ਇਸ ਤੋਂ ਇਲਾਵਾ ਪੁਲਿਸ ਨੇ ਅਥਾਰਟੀ ਨੂੰ ਦੱਸਿਆ ਕਿ ਬਾਹੀਆ ਦਾ ਵੀਜ਼ਾ ਵੀ ਮਿਆਦ ਪੁੱਗਣ ਕਾਰਨ ਖ਼ਤਮ ਹੋ ਚੁੱਕਾ ਸੀ ਅਤੇ ਉਹ ਨਿਊਜ਼ੀਲੈਂਡ ਵਿੱਚ ਗੈਰ-ਕਾਨੂੰਨੀ ਤੌਰ ’ਤੇ ਰਹਿ ਰਿਹਾ ਸੀ।

ਬਾਹੀਆ ਨੇ ਰਿਮੋਟ ਸੁਣਵਾਈ ਵਿੱਚ ਹਾਜ਼ਰੀ ਨਹੀਂ ਭਰੀ ਅਤੇ ਨਾ ਹੀ ਉਸ ਨੇ ਪੁਲਿਸ ਦੀ ਸ਼ਿਕਾਇਤ ਦੇ ਵਿਰੋਧ ਵਿੱਚ ਕੋਈ ਲਿਖਤੀ ਜਵਾਬ ਦਿੱਤਾ।

ਫੈਸਲਾ ਸੁਣਾਉਂਦਿਆਂ ਮੈਕਕੌਨਲ ਨੇ ਕਿਹਾ ਕਿ ਬਾਹੀਆ ਵਿੱਚ ਬੇਈਮਾਨੀ ਨਾਲ ਜੁੜੇ ਅਪਰਾਧ ਕਰਨ ਦੀ ਪ੍ਰਵਿਰਤੀ ਵਧ ਰਹੀ ਹੈ। ਉਨ੍ਹਾਂ ਨੇ ਇਸ ਗੱਲ ’ਤੇ ਵੀ ਚਿੰਤਾ ਜਤਾਈ ਕਿ ਜਿਨ੍ਹਾਂ ਥਾਵਾਂ ’ਤੇ ਇਹ ਘਟਨਾਵਾਂ ਹੋਈਆਂ, ਉਹ ਅਜਿਹੇ ਸਥਾਨ ਹਨ ਜਿੱਥੇ ਉਹ ਸੁਰੱਖਿਆ ਗਾਰਡ ਵਜੋਂ ਡਿਊਟੀ ਦੌਰਾਨ ਜ਼ਿੰਮੇਵਾਰੀ ਨਿਭਾ ਸਕਦਾ ਸੀ।

ਅਥਾਰਟੀ ਨੇ ਕਿਹਾ ਕਿ ਪੈਟਰੋਲ ਪੰਪਾਂ ਤੋਂ ਪੈਟਰੋਲ ਚੋਰੀ ਕਰਨ ਦੀ ਉਸ ਦੀ ਹਾਲੀਆ ਲੜੀ ਦੇ ਮੱਦੇਨਜ਼ਰ ਉਹ ਹੁਣ ਇੱਕ ਜ਼ਿੰਮੇਵਾਰ ਸੁਰੱਖਿਆ ਕਰਮਚਾਰੀ ਵਜੋਂ ਯੋਗ ਨਹੀਂ ਰਿਹਾ।

ਕਿਉਂਕਿ ਬਾਹੀਆ ਦਾ ਵੀਜ਼ਾ ਵੀ ਖ਼ਤਮ ਹੋ ਚੁੱਕਾ ਹੈ ਅਤੇ ਉਹ ਨਿਊਜ਼ੀਲੈਂਡ ਵਿੱਚ ਕਾਨੂੰਨੀ ਤੌਰ ’ਤੇ ਰਹਿਣ ਜਾਂ ਕੰਮ ਕਰਨ ਦੇ ਯੋਗ ਨਹੀਂ ਹੈ, ਇਸ ਲਈ ਉਸ ਦਾ ਸਰਟੀਫਿਕੇਟ ਆਫ ਅਪਰੂਵਲ ਰੱਦ ਕਰਨਾ ਉਚਿਤ ਸਜ਼ਾ ਕਰਾਰ ਦਿੱਤਾ ਗਿਆ।

ਅਥਾਰਟੀ ਨੇ ਬਾਹੀਆ ਨੂੰ ਹੁਕਮ ਦਿੱਤਾ ਹੈ ਕਿ ਫੈਸਲੇ ਦੀ ਪ੍ਰਾਪਤੀ ਤੋਂ 7 ਦਿਨਾਂ ਦੇ ਅੰਦਰ ਆਪਣਾ ਸੁਰੱਖਿਆ ਪਛਾਣ ਕਾਰਡ ਲਾਇਸੈਂਸਿੰਗ ਅਥਾਰਟੀ ਕੋਲ ਵਾਪਸ ਜਮ੍ਹਾਂ ਕਰਵਾਏ।