ਨਿਊਜ਼ੀਲੈਂਡ ਦੀ ਕੌਮੀ ਏਅਰਲਾਈਨ Air New Zealand ਨੇ ਚਿਤਾਵਨੀ ਦਿੱਤੀ ਹੈ ਕਿ ਵਧ ਰਹੀਆਂ ਜੈੱਟ ਫਿਊਲ ਕੀਮਤਾਂ ਅਤੇ ਮੱਧ-ਪੂਰਬ ਵਿੱਚ ਜਾਰੀ ਤਣਾਅ ਕਾਰਨ ਕੰਪਨੀ ਨੂੰ 2026 ਵਿੱਤੀ ਸਾਲ ਦੌਰਾਨ ਭਾਰੀ ਨੁਕਸਾਨ ਝੱਲਣਾ ਪੈ ਸਕਦਾ ਹੈ। ਏਅਰਲਾਈਨ ਅਨੁਸਾਰ ਟੈਕਸ ਤੋਂ ਪਹਿਲਾਂ ਨੁਕਸਾਨ 340 ਮਿਲੀਅਨ ਤੋਂ 390 ਮਿਲੀਅਨ ਡਾਲਰ ਤੱਕ ਹੋ ਸਕਦਾ ਹੈ। ਕੰਪਨੀ ਵੱਲੋਂ NZX ਨੂੰ ਜਾਰੀ ਬਿਆਨ ਵਿੱਚ ਦੱਸਿਆ ਗਿਆ ਕਿ ਇਹ ਅੰਦਾਜ਼ਾ ਜੈੱਟ ਫਿਊਲ ਦੀ ਔਸਤ ਕੀਮਤ 145 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ਦੇ ਆਧਾਰ ‘ਤੇ ਲਗਾਇਆ ਗਿਆ ਹੈ। Air New Zealand ਨੇ ਕਿਹਾ ਕਿ ਪਿਛਲੇ ਕੁਝ ਹਫ਼ਤਿਆਂ ਦੌਰਾਨ ਫਿਊਲ ਦੀਆਂ ਕੀਮਤਾਂ ਵਿੱਚ ਤੇਜ਼ ਉਛਾਲ ਦੇਖਿਆ ਗਿਆ ਹੈ ਅਤੇ ਕੁਝ ਸਮੇਂ ਲਈ ਇਹ 230 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ਤੱਕ ਪਹੁੰਚ ਗਈਆਂ।
ਏਅਰਲਾਈਨ ਮੁਤਾਬਕ ਮੱਧ-ਪੂਰਬ ਵਿੱਚ ਤਣਾਅ ਵਧਣ ਤੋਂ ਪਹਿਲਾਂ ਜੈੱਟ ਫਿਊਲ ਦੀ ਕੀਮਤ ਲਗਭਗ 85 ਤੋਂ 90 ਡਾਲਰ ਪ੍ਰਤੀ ਬੈਰਲ ਸੀ, ਪਰ ਮੌਜੂਦਾ ਹਾਲਾਤਾਂ ਨੇ ਕੰਪਨੀ ਦੇ ਖਰਚਿਆਂ ਵਿੱਚ ਵੱਡਾ ਵਾਧਾ ਕਰ ਦਿੱਤਾ ਹੈ। ਇਸ ਕਾਰਨ 2026 ਦੇ ਦੂਜੇ ਹਿੱਸੇ ਵਿੱਚ ਫਿਊਲ ‘ਤੇ ਖਰਚ ਲਗਭਗ 980 ਮਿਲੀਅਨ ਡਾਲਰ ਤੱਕ ਪਹੁੰਚ ਸਕਦਾ ਹੈ। ਕੰਪਨੀ ਦੇ ਮੁਖੀ Nikhil Ravishankar ਨੇ ਕਿਹਾ ਕਿ ਹਾਲਾਤਾਂ ਨੂੰ ਦੇਖਦੇ ਹੋਏ ਨੌਕਰੀਆਂ ਵਿੱਚ ਕਟੌਤੀ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਉਨ੍ਹਾਂ ਦੱਸਿਆ ਕਿ ਕੰਪਨੀ ਹੁਣ ਲਾਗਤ ਘਟਾਉਣ ਅਤੇ ਭਵਿੱਖ ਲਈ ਕਾਰੋਬਾਰ ਨੂੰ ਮਜ਼ਬੂਤ ਬਣਾਉਣ ਦੀ ਯੋਜਨਾ ‘ਤੇ ਕੰਮ ਕਰ ਰਹੀ ਹੈ।
ਉਨ੍ਹਾਂ ਇਹ ਵੀ ਮੰਨਿਆ ਕਿ ਅਨੁਮਾਨਿਤ ਨੁਕਸਾਨ ਦਾ ਵੱਡਾ ਹਿੱਸਾ ਫਿਊਲ ਸੰਕਟ ਨਾਲ ਜੁੜਿਆ ਹੋਇਆ ਹੈ, ਜਦਕਿ ਬਾਕੀ ਨੁਕਸਾਨ ਕੰਪਨੀ ਦੀ ਅੰਦਰੂਨੀ ਕਾਰਗੁਜ਼ਾਰੀ ਅਤੇ ਹੋਰ ਵਪਾਰਕ ਚੁਣੌਤੀਆਂ ਕਾਰਨ ਹੋ ਸਕਦਾ ਹੈ।