ਨਿਊਜ਼ੀਲੈਂਡ ਦੇ ਕ੍ਰਾਈਸਟਚਰਚ ਹਵਾਈ ਅੱਡੇ ‘ਤੇ ਐਤਵਾਰ ਸਵੇਰੇ ਇੱਕ ਅਜਿਹਾ ਵਾਕਿਆ ਵਾਪਰਿਆ ਜਿਸ ਕਾਰਨ ਦਰਜਨਾਂ ਯਾਤਰੀਆਂ ਨੂੰ ਕਈ ਘੰਟਿਆਂ ਦੀ ਦੇਰੀ ਦਾ ਸਾਹਮਣਾ ਕਰਨਾ ਪਿਆ। ਏਅਰ ਨਿਊਜ਼ੀਲੈਂਡ ਦੀ ਆਕਲੈਂਡ ਜਾਣ ਵਾਲੀ ਫਲਾਈਟ NZ582 ਉਡਾਣ ਭਰਨ ਤੋਂ ਪਹਿਲਾਂ ਹੀ ਰਨਵੇਅ ਦੇ ਨੇੜੇ ਘਾਹ ਵਾਲੇ ਹਿੱਸੇ ਵਿੱਚ ਫਸ ਗਈ ਸੀ। ਜਾਣਕਾਰੀ ਅਨੁਸਾਰ ਜਹਾਜ਼ ਨੂੰ ਪੁਸ਼ਬੈਕ ਪ੍ਰਕਿਰਿਆ ਦੌਰਾਨ ਟੈਕਸੀਵੇ ਦੇ ਕਿਨਾਰੇ ਮੌਜੂਦ ਨਰਮ ਜ਼ਮੀਨ ਵੱਲ ਧੱਕ ਦਿੱਤਾ ਗਿਆ, ਜਿਸ ਕਾਰਨ ਇਸਦੇ ਮੁੱਖ ਪਹੀਏ ਮਿੱਟੀ ਵਿੱਚ ਧੱਸ ਗਏ। ਫਲਾਈਟ ਨੇ ਸਵੇਰੇ 5:45 ਵਜੇ ਰਵਾਨਾ ਹੋਣਾ ਸੀ, ਪਰ ਤਕਨੀਕੀ ਰੁਕਾਵਟ ਕਾਰਨ ਉਡਾਣ ਸੰਭਵ ਨਾ ਹੋ ਸਕੀ।
ਜਹਾਜ਼ ਵਿੱਚ ਸਵਾਰ ਯਾਤਰੀਆਂ ਨੇ ਦੱਸਿਆ ਕਿ ਸ਼ੁਰੂ ਵਿੱਚ ਕਪਤਾਨ ਵੱਲੋਂ ਜਹਾਜ਼ ਨੂੰ ਬਾਹਰ ਕੱਢਣ ਲਈ ਕਈ ਟੱਗ ਵਾਹਨਾਂ ਦੀ ਮਦਦ ਲੈਣ ਦੀ ਗੱਲ ਕੀਤੀ ਗਈ ਸੀ, ਪਰ ਬਾਅਦ ਵਿੱਚ ਫਲਾਈਟ ਨੂੰ ਰੱਦ ਕਰਦੇ ਹੋਏ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਢੰਗ ਨਾਲ ਜਹਾਜ਼ ਤੋਂ ਉਤਾਰ ਲਿਆ ਗਿਆ।
ਕ੍ਰਾਈਸਟਚਰਚ ਹਵਾਈ ਅੱਡਾ ਪ੍ਰਬੰਧਨ ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਜਹਾਜ਼ ਪੁਸ਼ਬੈਕ ਦੌਰਾਨ ਘਾਹ ਵਾਲੇ ਹਿੱਸੇ ਵਿੱਚ ਚਲਾ ਗਿਆ ਸੀ ਅਤੇ ਇਸਨੂੰ ਸੁਰੱਖਿਅਤ ਤਰੀਕੇ ਨਾਲ ਹਟਾਉਣ ਲਈ ਕਾਰਵਾਈ ਕੀਤੀ ਗਈ। ਯਾਤਰੀਆਂ ਦਾ ਸਮਾਨ ਜਹਾਜ਼ ਵਿੱਚ ਹੀ ਰਿਹਾ ਕਿਉਂਕਿ ਜਹਾਜ਼ ਨੂੰ ਵਾਪਸ ਗੇਟ ਤੱਕ ਲਿਆਉਣ ਤੋਂ ਪਹਿਲਾਂ ਸਮਾਨ ਉਤਾਰਨਾ ਸੰਭਵ ਨਹੀਂ ਸੀ।
ਏਅਰ ਨਿਊਜ਼ੀਲੈਂਡ ਦੇ ਚੀਫ਼ ਸੇਫਟੀ ਐਂਡ ਰਿਸਕ ਅਫਸਰ ਨਾਥਨ ਮੈਕਗ੍ਰਾ ਨੇ ਕਿਹਾ ਕਿ ਸਾਰੇ ਯਾਤਰੀ ਸੁਰੱਖਿਅਤ ਹਨ ਅਤੇ ਉਨ੍ਹਾਂ ਨੂੰ ਉਨ੍ਹਾਂ ਦੀ ਮੰਜ਼ਿਲ ਤੱਕ ਪਹੁੰਚਾਉਣ ਲਈ ਬਦਲਵੀਂ ਉਡਾਣਾਂ ਦਾ ਪ੍ਰਬੰਧ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਨੇ ਯਾਤਰੀਆਂ ਵੱਲੋਂ ਦਿਖਾਏ ਗਏ ਧੀਰਜ ਅਤੇ ਸਹਿਯੋਗ ਲਈ ਧੰਨਵਾਦ ਵੀ ਪ੍ਰਗਟ ਕੀਤਾ।