ਅਲਾਸਕਾ ਵਿੱਚ ਇੱਕ ਚਾਰਟਰ ਜਹਾਜ਼ ਹਾਦਸੇ ਦਾ ਸ਼ਿਕਾਰ ਹੋ ਗਿਆ, ਜਿਸ ਵਿੱਚ ਸਵਾਰ ਦੋ ਪਾਇਲਟਾਂ ਅਤੇ ਛੇ ਯਾਤਰੀਆਂ ਸਮੇਤ ਸਾਰੇ 8 ਲੋਕਾਂ ਦੀ ਮੌਤ ਹੋ ਗਈ। ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (NTSB) ਮੁਤਾਬਕ ਜਹਾਜ਼ ਨੇ ਐਂਕਰੇਜ ਤੋਂ ਉਡਾਣ ਭਰੀ ਸੀ ਅਤੇ ਵੀਰਵਾਰ ਦੁਪਹਿਰ ਕੇਪ ਨਿਊਵੈਨਹੈਮ ਨੇੜੇ ਲੈਂਡਿੰਗ ਦੀ ਤਿਆਰੀ ਦੌਰਾਨ ਹਾਦਸਾਗ੍ਰਸਤ ਹੋ ਗਿਆ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਅਲਾਸਕਾ ਰੈਸਕਿਊ ਕੋਆਰਡੀਨੇਸ਼ਨ ਸੈਂਟਰ ਨੇ ਇਲਾਕੇ ਵਿੱਚ ਖੋਜ ਅਤੇ ਬਚਾਅ ਮੁਹਿੰਮ ਸ਼ੁਰੂ ਕਰ ਦਿੱਤੀ। ਇਹ Cessna 441 ਮਾਡਲ ਦਾ ਜਹਾਜ਼ ਸੀ, ਜੋ ਐਂਕਰੇਜ ਤੋਂ ਲਗਭਗ 450 ਮੀਲ ਦੂਰ ਕੇਪ ਨਿਊਵੈਨਹੈਮ ਵੱਲ ਜਾ ਰਿਹਾ ਸੀ। ਸਥਾਨਕ ਸਮੇਂ ਮੁਤਾਬਕ ਦੁਪਹਿਰ ਕਰੀਬ 12:15 ਵਜੇ ਮੰਜ਼ਿਲ ਨੇੜੇ ਪਹੁੰਚਣ ਸਮੇਂ ਇਹ ਹਾਦਸੇ ਦਾ ਸ਼ਿਕਾਰ ਹੋ ਗਿਆ।
ਰਿਪੋਰਟਾਂ ਮੁਤਾਬਕ ਬਚਾਅ ਟੀਮਾਂ ਨੇ ਘਟਨਾ ਤੋਂ ਤੁਰੰਤ ਬਾਅਦ ਪੁਸ਼ਟੀ ਕੀਤੀ ਕਿ ਜਹਾਜ਼ ਵਿੱਚ ਸਵਾਰ ਕੋਈ ਵੀ ਵਿਅਕਤੀ ਜ਼ਿੰਦਾ ਨਹੀਂ ਬਚਿਆ।
ਅਲਾਸਕਾ ਕਮਾਂਡ ਮੁਤਾਬਕ ਜਹਾਜ਼ ਕੇਪ ਨਿਊਵੈਨਹੈਮ ਹਵਾਈ ਅੱਡੇ ਨੇੜੇ ਹਾਦਸਾਗ੍ਰਸਤ ਹੋਇਆ। ਇਹ ਅਮਰੀਕੀ ਹਵਾਈ ਸੈਨਾ ਨਾਲ ਸਬੰਧਤ ਹਵਾਈ ਅੱਡਾ ਹੈ, ਜੋ ਲੌਂਗ ਰੇਂਜ ਰਡਾਰ ਸਾਈਟ ਤੱਕ ਪਹੁੰਚ ਪ੍ਰਦਾਨ ਕਰਦਾ ਹੈ। ਇੱਥੇ ਰਨਵੇ ਲਗਭਗ 4,000 ਫੁੱਟ ਲੰਬਾ ਹੈ ਅਤੇ 2,300 ਫੁੱਟ ਤੋਂ ਵੱਧ ਉੱਚੇ ਪਹਾੜ ਦੀ ਢਲਾਨ ’ਤੇ ਸਥਿਤ ਹੈ।
ਹਵਾਈ ਅੱਡੇ ਦੇ ਆਲੇ-ਦੁਆਲੇ ਉੱਚੇ ਪਹਾੜ ਹੋਣ ਕਾਰਨ ਲੈਂਡਿੰਗ ਦੌਰਾਨ ਅਚਾਨਕ ਹੇਠਾਂ ਉਤਰਨਾ ਕਾਫ਼ੀ ਮੁਸ਼ਕਿਲ ਅਤੇ ਖ਼ਤਰਨਾਕ ਮੰਨਿਆ ਜਾਂਦਾ ਹੈ। ਹਾਲਾਂਕਿ, ਫਿਲਹਾਲ ਹਾਦਸੇ ਦੀ ਮੁੱਖ ਵਜ੍ਹਾ ਸਾਹਮਣੇ ਨਹੀਂ ਆਈ ਹੈ।
ਫੈਡਰਲ ਏਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (FAA) ਅਤੇ NTSB ਵੱਲੋਂ ਹਾਦਸੇ ਦੀ ਜਾਂਚ ਕੀਤੀ ਜਾਵੇਗੀ। ਹਾਦਸਾਗ੍ਰਸਤ ਜਹਾਜ਼ ‘ਸਿਕਿਊਰਿਟੀ ਏਵੀਏਸ਼ਨ’ ਕੰਪਨੀ ਦਾ ਦੋ ਇੰਜਣਾਂ ਵਾਲਾ Cessna Conquest ਟਰਬੋਪ੍ਰਾਪ ਜਹਾਜ਼ ਸੀ। ਇਸ ਹਵਾਈ ਅੱਡੇ ’ਤੇ ਸਿਰਫ਼ ਫੌਜੀ ਅਤੇ ਕੁਝ ਚਾਰਟਰ ਜਹਾਜ਼ਾਂ ਨੂੰ ਹੀ ਲੈਂਡ ਕਰਨ ਦੀ ਇਜਾਜ਼ਤ ਹੈ।