ਨਿਊਜੀਲੈਂਡ ਸਰਕਾਰ ਨੇ ਸ਼ਰਾਬ ਦੇ ਸ਼ੌਕੀਨਾਂ ਨੂੰ ਇੱਕ ਵੱਡਾ ਝਟਕਾ ਦਿੱਤਾ ਹੈ। ਦਰਅਸਲ ਸਰਕਾਰ ਨੇ ਅਲਕੋਹਲ ਐਕਸਾਈਜ਼ ਟੈਕਸ ਵਿੱਚ ਵਾਧਾ ਕਰ ਦਿੱਤਾ ਹੈ। ਸਰਕਾਰ ਨੇ ਅਲਕੋਹਲ ਐਕਸਾਈਜ਼ ਟੈਕਸ ਨੂੰ 6.9 ਪ੍ਰਤੀਸ਼ਤ ਤੱਕ ਵਾਧਾ ਦਿੱਤਾ ਹੈ, ਜੋ 30 ਸਾਲਾਂ ਵਿੱਚ ਸਭ ਤੋਂ ਵੱਡਾ ਵਾਧਾ ਹੈ। ਸਰਕਾਰ ਦੇ ਇਸ ਫੈਸਲੇ ਕਾਰਨ ਡਰ ਹੈ ਕਿ ਕਈ ਵਾਈਨਰੀਆਂ ਖਤਮ ਹੋ ਜਾਣਗੀਆਂ। ਕੁਮੇਯੂ ਰਿਵਰ ਵਾਈਨਯਾਰਡ ਦੇ ਮਾਰਕੀਟਿੰਗ ਡਾਇਰੈਕਟਰ ਪਾਲ ਬ੍ਰਾਜ਼ਕੋਵਿਚ ਦਾ ਪਰਿਵਾਰ ਕਰੀਬ 80 ਸਾਲਾਂ ਤੋਂ ਵਾਈਨ ਬਣਾਉਣ ਦਾ ਕੰਮ ਕਰ ਰਿਹਾ ਹੈ ਅਤੇ ਇਹ ਤਾਜ਼ਾ ਟੈਕਸ ਵਾਧਾ ਇੱਕ ਵੱਡਾ ਝਟਕਾ ਹੈ। ਉਨ੍ਹਾਂ ਕਿਹਾ ਕਿ “ਇਹ ਕਾਫ਼ੀ ਵੱਡਾ ਹੈ, ਇਸ ਲਈ ਹਾਂ ਮੈਂ ਕਾਫ਼ੀ ਹੈਰਾਨ ਹਾਂ।”
ਉਨ੍ਹਾਂ ਕਿਹਾ ਕਿ ਇਸ ਫੈਸਲੇ ਕਾਰਨ ਉਨ੍ਹਾਂ ਦਾ ਕਾਰੋਬਾਰ ਬੰਦ ਹੋਣ ਕਿਨਾਰੇ ਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਵਾਈਨਰੀਆਂ ਹੁਣ ਅੰਗੂਰ ਉਗਾਉਣ ਦੀ ਲਾਗਤ ਨਾਲੋਂ ਜ਼ਿਆਦਾ ਐਕਸਾਈਜ਼ ਟੈਕਸ ਅਦਾ ਕਰ ਰਹੀਆਂ ਹਨ। ਦੱਸ ਦੇਈਏ ਕਿ ਸ਼ੁੱਕਰਵਾਰ ਤੋਂ, ਲਗਭਗ 7 ਪ੍ਰਤੀਸ਼ਤ ਟੈਕਸ ਵਾਧਾ ਨਿਊਜ਼ੀਲੈਂਡ ਦੇ ਅੰਦਰ ਵਿਕਣ ਵਾਲੀਆਂ ਸਾਰੀਆਂ ਅਲਕੋਹਲਾਂ ‘ਤੇ ਲਾਗੂ ਹੋ ਗਿਆ ਹੈ। ਉੱਥੇ ਹੀ ਸਰਕਾਰ ਦੇ ਇਸ ਫੈਸਲੇ ਤੋਂ ਸ਼ਰਾਬ ਦਾ ਕਾਰੋਬਾਰ ਕਰਨ ਵਾਲੇ ਕਾਰੋਬਾਰੀ ਨਿਰਾਸ਼ ਨਜ਼ਰ ਆ ਰਹੇ ਹਨ। ਐਕਸਾਈਜ਼ ਟੈਕਸ ਵਾਧਾ ਜੀਐਸਟੀ ਤੋਂ ਵੱਖਰਾ ਹੈ, ਅਤੇ ਸਾਰੇ ਅਲਕੋਹਲ ‘ਤੇ ਲਾਗੂ ਹੁੰਦਾ ਹੈ।