ਹੋਰੋਵ੍ਹੇਨੂਆ ਖੇਤਰ ਵਿੱਚ ਸ਼ੁੱਕਰਵਾਰ ਨੂੰ ਹੋਏ ਸੜਕ ਹਾਦਸੇ ਦੌਰਾਨ ਇੱਕ ਐਂਬੂਲੈਂਸ ਐਮਰਜੈਂਸੀ ਕਾਲ ਲਈ ਜਾ ਰਹੀ ਸੀ ਜਦੋਂ ਇਸ ਦੀ ਇੱਕ ਟਰੱਕ ਨਾਲ ਟੱਕਰ ਹੋ ਗਈ। ਸਟੇਟ ਹਾਈਵੇ 1 ’ਤੇ, ਲੇਵਿਨ ਦੇ ਉੱਤਰ ਵੱਲ, ਸੇਂਟ ਜੌਨ ਦੀ ਰੈਪਿਡ ਰਿਸਪਾਂਸ ਐਂਬੂਲੈਂਸ ਅਤੇ ਐਲਪੀਜੀ ਗੈਸ ਡਿਲਿਵਰੀ ਟਰੱਕ ਵਿਚਾਲੇ ਟੱਕਰ ਹੋ ਗਈ, ਜਿਸ ਕਾਰਨ ਸੇਂਟ ਜੌਨ ਦਾ ਇੱਕ ਪੈਰਾਮੈਡਿਕ ਅਤੇ ਗੈਸ ਟਰੱਕ ਦਾ ਡਰਾਈਵਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ। ਨੇੜੇ ਕੰਮ ਕਰ ਰਹੇ ਮਜ਼ਦੂਰਾਂ ਨੇ ਮੀਡੀਆ ਨੂੰ ਦੱਸਿਆ ਕਿ ਹਾਦਸੇ ਤੋਂ ਥੋੜ੍ਹੇ ਸਮੇਂ ਪਹਿਲਾਂ ਉਨ੍ਹਾਂ ਨੇ ਸੇਂਟ ਜੌਨ ਦਾ ਵਾਹਨ ਉੱਤਰ ਵੱਲ ਜਾਂਦਾ ਦੇਖਿਆ, ਜਿਸ ’ਤੇ ਐਮਰਜੈਂਸੀ ਲਾਈਟਾਂ ਚੱਲ ਰਹੀਆਂ ਸਨ।
ਸੇਂਟ ਜੌਨ ਨੇ ਪੁਸ਼ਟੀ ਕੀਤੀ ਕਿ ਹਾਦਸੇ ਵਿੱਚ ਸ਼ਾਮਲ ਰੈਪਿਡ ਰਿਸਪਾਂਸ ਵਾਹਨ “ਲਾਈਟਾਂ ਅਤੇ ਸਾਇਰਨ” ਚਲਾ ਇੱਕ ਹੋਰ ਘਟਨਾ ਵੱਲ ਜਾ ਰਿਹਾ ਸੀ। ਸੇਂਟ ਜੌਨ ਦੀ ਵੈਬਸਾਈਟ ਅਨੁਸਾਰ “ਲਾਈਟਾਂ ਅਤੇ ਸਾਇਰਨ” ਉਹਨਾਂ ਕਾਲਾਂ ਲਈ ਵਰਤੇ ਜਾਂਦੇ ਹਨ ਜੋ ਤੁਰੰਤ ਜਾਨ ਲਈ ਖਤਰਨਾਕ ਜਾਂ ਸਮੇਂ ਲਈ ਬਹੁਤ ਮਹੱਤਵਪੂਰਨ ਹੁੰਦੀਆਂ ਹਨ। ਸੇਂਟ ਜੌਨ ਦੇ ਏਰੀਆ ਓਪਰੇਸ਼ਨ ਮੈਨੇਜਰ ਗੈਰਥ ਕੋਲਿੰਗਜ਼ ਨੇ ਕਿਹਾ, “ਰੈਪਿਡ ਰਿਸਪਾਂਸ ਯੂਨਿਟ ਵਿੱਚ ਮੌਜੂਦ ਪੈਰਾਮੈਡਿਕ ਅਤੇ ਦੂਜੇ ਵਾਹਨ ਦੇ ਡਰਾਈਵਰ ਦੋਵਾਂ ਦਾ ਇਲਾਜ ਕੀਤਾ ਗਿਆ ਅਤੇ ਉਨ੍ਹਾਂ ਨੂੰ ਐਂਬੂਲੈਂਸ ਰਾਹੀਂ ਪਾਲਮਰਸਟਨ ਨਾਰਥ ਹਸਪਤਾਲ ਭੇਜਿਆ ਗਿਆ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕਰ ਰਹੀ ਪੁਲਿਸ ਦੀ ਸੇਂਟ ਜੌਨ ਵੱਲੋਂ ਪੂਰੀ ਮਦਦ ਕੀਤੀ ਜਾਵੇਗੀ।