ਵੈਲਿੰਗਟਨ: ਰੇਲਵੇ ਕੌਰੀਡੋਰ ਵਿੱਚੋਂ ਤਾਂਬੇ ਦੀ ਕੇਬਲ ਚੋਰੀ ਕਰਨ ਦੀ ਕੋਸ਼ਿਸ਼ ਅਤੇ ਸਿਗਨਲਿੰਗ ਸਿਸਟਮ ਨੂੰ ਨੁਕਸਾਨ ਪਹੁੰਚਾਉਣ ਦੇ ਮਾਮਲੇ ਵਿੱਚ ਪੁਲਿਸ ਨੇ 54 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
3 ਜੁਲਾਈ ਨੂੰ ਤੜਕੇ ਕਰੀਬ 4 ਵਜੇ ਪੁਲਿਸ ਨੂੰ ਟਾਵਾ ਦੇ ਤਾਕਾਪੂ ਰੋਡ ਸਟੇਸ਼ਨ ਨੇੜੇ ਇੱਕ ਵਿਅਕਤੀ ਵੱਲੋਂ ਗੈਰਕਾਨੂੰਨੀ ਤੌਰ ’ਤੇ ਰੇਲਵੇ ਕੌਰੀਡੋਰ ਵਿੱਚ ਦਾਖ਼ਲ ਹੋਣ ਦੀ ਸੂਚਨਾ ਮਿਲੀ ਸੀ। ਇਸ ਦੌਰਾਨ ਇੱਕ ਭਾਰੀ ਸਿਗਨਲਿੰਗ ਕੇਬਲ ਨੁਕਸਾਨੀ ਗਈ, ਪਰ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਕਥਿਤ ਦੋਸ਼ੀ ਮੌਕੇ ਤੋਂ ਫਰਾਰ ਹੋ ਗਿਆ।
ਕੇਬਲ ਕੱਟੇ ਜਾਣ ਕਾਰਨ ਰੇਲਵੇ ਸਿਗਨਲਾਂ ਵਿੱਚ ਖਰਾਬੀ ਆ ਗਈ, ਜਿਸ ਦੇ ਚਲਦਿਆਂ ਐਮਰਜੈਂਸੀ ਮੁਰੰਮਤ ਹੋਣ ਤੱਕ ਰੇਲ ਸੇਵਾਵਾਂ ਨੂੰ ਮੁਅੱਤਲ ਕਰਨਾ ਪਿਆ।
ਵੈਲਿੰਗਟਨ ਪੁਲਿਸ ਦੀ ਇਨਵੈਸਟੀਗੇਸ਼ਨ ਸਪੋਰਟ ਯੂਨਿਟ ਨੇ ਮੰਗਲਵਾਰ ਨੂੰ ਪੋਰੀਰੂਆ ਸਥਿਤ ਇੱਕ ਪਤੇ ’ਤੇ ਸਰਚ ਵਾਰੰਟ ਤਹਿਤ ਕਾਰਵਾਈ ਕਰਦਿਆਂ 54 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ। ਉਹ 2 ਸਤੰਬਰ ਨੂੰ ਪੋਰੀਰੂਆ ਡਿਸਟ੍ਰਿਕਟ ਕੋਰਟ ਵਿੱਚ ਆਵਾਜਾਈ ਨੂੰ ਖ਼ਤਰੇ ਵਿੱਚ ਪਾਉਣ ਦੇ ਦੋਸ਼ ਦਾ ਸਾਹਮਣਾ ਕਰੇਗਾ।
ਇਸੇ ਘਟਨਾ ਸਬੰਧੀ ਪਿਛਲੇ ਮਹੀਨੇ ਇੱਕ 43 ਸਾਲਾ ਵਿਅਕਤੀ ਨੂੰ ਵੀ ਚਾਰਜ ਕੀਤਾ ਗਿਆ ਸੀ।
ਕਿਵੀਰੇਲ ਦੇ ਵੈਲਿੰਗਟਨ ਮੈਟਰੋ ਜਨਰਲ ਮੈਨੇਜਰ ਐਂਡੀ ਲਿਓਨ ਨੇ ਕਿਹਾ ਕਿ ਰੇਲਵੇ ਉਪਕਰਨਾਂ ਨਾਲ ਛੇੜਛਾੜ ਕਰਨ ਵਾਲਾ ਕੋਈ ਵੀ ਵਿਅਕਤੀ ਆਪਣੇ ਨਾਲ-ਨਾਲ ਹੋਰਨਾਂ ਦੀ ਜਾਨ ਨੂੰ ਵੀ ਗੰਭੀਰ ਖ਼ਤਰੇ ਵਿੱਚ ਪਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਰੇਲਵੇ ਕੌਰੀਡੋਰ ਵਿੱਚੋਂ ਤਾਂਬਾ ਚੋਰੀ ਕਰਨਾ ਬਹੁਤ ਗੰਭੀਰ ਅਪਰਾਧ ਹੈ। ਇਸ ਨਾਲ ਸੁਰੱਖਿਆ ਨੂੰ ਖ਼ਤਰਾ ਪੈਦਾ ਹੋਣ ਦੇ ਨਾਲ-ਨਾਲ ਰੇਲ ਸੇਵਾਵਾਂ ਵਿੱਚ ਦੇਰੀ, ਵਾਧੂ ਖਰਚੇ ਅਤੇ ਆਮ ਲੋਕਾਂ ਲਈ ਵੱਡੀ ਪਰੇਸ਼ਾਨੀ ਹੁੰਦੀ ਹੈ।
ਕਾਪਿਟੀ ਮਾਨਾ ਏਰੀਆ ਕਮਾਂਡਰ ਰੇਨੀ ਪਰਕਿਨਸ ਨੇ ਦੱਸਿਆ ਕਿ ਬੁਨਿਆਦੀ ਢਾਂਚੇ ਨੂੰ ਹੋਏ ਨੁਕਸਾਨ ਦੀ ਲਾਗਤ ਲਗਭਗ 3,000 ਡਾਲਰ ਹੈ। ਹਾਲਾਂਕਿ, ਸਵੇਰੇ ਰੇਲ ਰਾਹੀਂ ਸਫ਼ਰ ਕਰਨ ਵਾਲੇ ਯਾਤਰੀਆਂ ਦੀ ਦੇਰੀ ਅਤੇ ਉਤਪਾਦਕਤਾ ਦੇ ਨੁਕਸਾਨ ਦਾ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੈ।
ਉਨ੍ਹਾਂ ਕਿਹਾ ਕਿ ਇਹ ਬਹੁਤ ਨਿਰਾਸ਼ਾਜਨਕ ਹੈ ਕਿ ਕੁਝ ਲੋਕ ਜਨਤਕ ਆਵਾਜਾਈ ਸੇਵਾਵਾਂ ਨੂੰ ਨੁਕਸਾਨ ਪਹੁੰਚਾ ਰਹੇ ਹਨ ਅਤੇ ਹੋਰਨਾਂ ਦੀ ਜ਼ਿੰਦਗੀ ਨੂੰ ਖ਼ਤਰੇ ਵਿੱਚ ਪਾਉਣ ਤੋਂ ਵੀ ਨਹੀਂ ਹਿਚਕਚਾ ਰਹੇ।