ਆਕਲੈਂਡ ਵਿੱਚ ਇੱਕ ਜੋੜੇ ਨੂੰ ਹਜ਼ਾਰਾਂ ਗੈਰਕਾਨੂੰਨੀ ਹਥਿਆਰ ਅਤੇ ਨਸ਼ੇ ਨਾਲ ਜੁੜੇ ਸਾਮਾਨ ਦੀ ਆਯਾਤ ਤੇ ਵਿਕਰੀ ਕਰਨ ਦੇ ਦੋਸ਼ਾਂ ‘ਚ ਸਜ਼ਾ ਸੁਣਾਈ ਗਈ ਹੈ। ਮੰਗਲਵਾਰ ਨੂੰ Auckland District Court ਵਿੱਚ ਸੁਣਵਾਈ ਦੌਰਾਨ 50 ਸਾਲਾ ਵਿਅਕਤੀ ਨੂੰ 8 ਮਹੀਨੇ ਦੀ ਘਰੇਲੂ ਨਜ਼ਰਬੰਦੀ ਦੀ ਸਜ਼ਾ ਮਿਲੀ, ਜਦਕਿ 49 ਸਾਲਾ ਔਰਤ ਨੂੰ 1200 ਡਾਲਰ ਜੁਰਮਾਨਾ ਭਰਨ ਦੇ ਹੁਕਮ ਦਿੱਤੇ ਗਏ। ਉਨ੍ਹਾਂ ਦੀ ਕੰਪਨੀ Kai Yuan 365 Limited ਨੂੰ 45,000 ਡਾਲਰ ਜੁਰਮਾਨਾ ਲਗਾਇਆ ਗਿਆ ਅਤੇ ਮਨਾਹੀ ਵਾਲਾ ਸਮਾਨ ਆਯਾਤ ਕਰਨ ਦੇ ਚਾਰ ਅਤੇ ਵੇਚਣ ਦੇ ਇੱਕ ਦੋਸ਼ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ।
ਕਸਟਮ ਅਧਿਕਾਰੀਆਂ ਮੁਤਾਬਿਕ, ਜੂਨ 2025 ਵਿੱਚ ਜਾਂਚ ਦੌਰਾਨ ਜੋੜੇ ਦੇ ਘਰ, ਕਾਰੋਬਾਰ ਅਤੇ ਸਟੋਰੇਜ ਸਥਾਨਾਂ ‘ਤੇ ਛਾਪੇ ਮਾਰੇ ਗਏ, ਜਿੱਥੇ ਵੱਡੀ ਮਾਤਰਾ ਵਿੱਚ ਫਲਿਕ ਨਾਈਫ, ਬਟਰਫਲਾਈ ਨਾਈਫ, ਥ੍ਰੋਇੰਗ ਨਾਈਫ, ਨਕਲ-ਡੱਸਟਰ ਅਤੇ ਮਿਲਟਰੀ ਸਟਾਈਲ ਏਅਰਗਨ ਬਰਾਮਦ ਹੋਏ। ਇਹ ਸਾਰਾ ਸਮਾਨ ਚੀਨ ਤੋਂ ਸਮੁੰਦਰੀ ਰਸਤੇ ਰਾਹੀਂ ਭੇਜਿਆਂ ਅਤੇ ਲਿਆਂਦਾ ਗਿਆ ਸੀ। ਅਕਤੂਬਰ 2022 ਤੋਂ ਫਰਵਰੀ 2025 ਤੱਕ ਹਜ਼ਾਰਾਂ ਪਬੰਦੀਸ਼ੁਦਾ ਚੀਜ਼ਾਂ, ਜਿਵੇਂ ਚਾਕੂ, ਬੇਓਨੈਟ ਅਤੇ ਮੈਥਐਮਫੇਟਾਮਾਈਨ ਨਾਲ ਸੰਬੰਧਿਤ ਉਪਕਰਣ ਜ਼ਬਤ ਕੀਤੇ ਗਏ।
ਕਸਟਮ ਵਿਭਾਗ ਦੀ ਅਧਿਕਾਰੀ Kylie Campbell ਨੇ ਕਿਹਾ ਕਿ ਜੋੜੇ ਨੂੰ ਪੂਰੀ ਜਾਣਕਾਰੀ ਸੀ ਕਿ ਉਹ ਕਾਨੂੰਨ ਦੀ ਉਲੰਘਣਾ ਕਰ ਰਹੇ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਕਈ ਲੋਕਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਕੁਝ ਕਿਸਮ ਦੇ ਚਾਕੂ, ਨਕਲ-ਡੱਸਟਰ ਅਤੇ ਏਅਰਗਨ ਨਿਊਜ਼ੀਲੈਂਡ ਵਿੱਚ ਪਬੰਦੀਸ਼ੁਦਾ ਹਨ ਅਤੇ ਬਿਨਾਂ ਪੁਲਿਸ ਮਨਜ਼ੂਰੀ ਦੇ ਇਹਨਾਂ ਦੀ ਆਯਾਤ ਗੈਰਕਾਨੂੰਨੀ ਹੈ। ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਚਾਕੂ ਨਾਲ ਜੁੜੇ ਅਪਰਾਧ ਜਨਤਕ ਸੁਰੱਖਿਆ ਲਈ ਵੱਡਾ ਖ਼ਤਰਾ ਹਨ ਅਤੇ ਜੇ ਕਿਸੇ ਨੂੰ ਗੈਰਕਾਨੂੰਨੀ ਹਥਿਆਰਾਂ ਦੀ ਸਮੱਗਲੀ ਬਾਰੇ ਜਾਣਕਾਰੀ ਹੋਵੇ ਤਾਂ ਉਹ ਕਸਟਮ ਵਿਭਾਗ ਨਾਲ ਸੰਪਰਕ ਕਰੇ।