ਆਕਲੈਂਡ ਦੇ ਇੱਕ ਵਿਅਕਤੀ ਨੂੰ ਕੋਵਿਡ-19 ਰਾਹਤ ਸਕੀਮਾਂ ਨਾਲ ਸਬੰਧਿਤ 1.7 ਮਿਲੀਅਨ ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਦੇ ਦੋਸ਼ ਵਿੱਚ ਲਗਭਗ ਛੇ ਸਾਲ ਦੀ ਕੈਦ ਹੋਈ ਹੈ। ਲੂਕ ਡੈਨੀਅਲ ਰਿਵਰਸ, ਜਿਸਨੂੰ ਮਾਈ ਕਿਊ ਵੀ ਕਿਹਾ ਜਾਂਦਾ ਹੈ, ਨੂੰ 29 ਦੋਸ਼ਾਂ ਵਿੱਚ ਦੋਸ਼ੀ ਮੰਨਿਆ ਗਿਆ ਹੈ। ਜਿਨ੍ਹਾਂ ‘ਚ ਵੇਜ ਸਬਸਿਡੀ ਅਤੇ ਸਮਾਲ ਬਿਜ਼ਨਸ ਕੈਸ਼ਫਲੋ ਸਕੀਮ ਧੋਖਾਧੜੀ ਅਤੇ ਮਨੀ ਲਾਂਡਰਿੰਗ ਸ਼ਾਮਿਲ ਹਨ। ਉਸਨੂੰ ਆਕਲੈਂਡ ਜ਼ਿਲ੍ਹਾ ਅਦਾਲਤ ਵਿੱਚ 5 ਸਾਲ ਅਤੇ 11 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ।
ਰਿਵਰਸ ਨੇ ਅੱਠ ਕੰਪਨੀਆਂ ਵੱਲੋਂ 28 ਵੇਜ ਸਬਸਿਡੀ ਅਰਜ਼ੀਆਂ ਦਿੱਤੀਆਂ ਸਨ, ਜਿਨ੍ਹਾਂ ਵਿੱਚੋਂ 12 ਅਰਜ਼ੀਆਂ ਧੋਖਾਧੜੀ ਵਾਲੀਆਂ ਸਨ। ਉਸਨੂੰ ਵੇਜ ਸਬਸਿਡੀ ਫੰਡ ਵਿੱਚ $906,818.40 ਪ੍ਰਾਪਤ ਹੋਏ ਅਤੇ ਉਸਨੇ ਹੋਰ $724,106.60 ਪ੍ਰਾਪਤ ਕਰਨ ਦੀ ਅਸਫਲ ਕੋਸ਼ਿਸ਼ ਕੀਤੀ ਸੀ। ਅਰਜ਼ੀਆਂ ਦਾ ਸਮਰਥਨ ਕਰਨ ਲਈ, ਰਿਵਰਸ ਨੇ ਜਾਅਲੀ ਦਸਤਾਵੇਜ਼ ਬਣਾਏ ਅਤੇ ਜਾਅਲੀ IRD ਨੰਬਰ ਬਣਾਏ, ਅਤੇ ਟੈਕਸ ਏਜੰਟ ਵਜੋਂ ਪ੍ਰਾਪਤ ਕੀਤੇ ਮਾਸੂਮ ਵਿਅਕਤੀਆਂ ਦੇ ਨਿੱਜੀ ਵੇਰਵਿਆਂ ਦੀ ਵਰਤੋਂ ਵੀ ਕੀਤੀ ਸੀ।
ਇਸ ਮਗਰੋਂ ਰਾਹਤ ਸਕੀਮਾਂ ਰਾਹੀਂ ਪ੍ਰਾਪਤ ਕੀਤਾ ਸਾਰਾ ਪੈਸਾ ਰਿਵਰਸ ਦੁਆਰਾ ਨਿਯੰਤਰਿਤ ਬੈਂਕ ਖਾਤਿਆਂ ਵਿੱਚ ਚਲਾ ਗਿਆ ਸੀ, ਜਿਸ ਵਿੱਚ ਵੱਡੀ ਰਕਮ ਫਿਰ ਲੀ ਝਾਂਗ ਅਤੇ ਮਾਈ ਕਿਊ ਦੇ ਜਾਅਲੀ ਨਾਮ ਹੇਠ ਸਿੰਗਾਪੁਰ ਦੇ ਬੈਂਕ ਖਾਤਿਆਂ ਵਿੱਚ ਟ੍ਰਾਂਸਫਰ ਕੀਤੀ ਗਈ। ਇਹ ਦੋਸ਼ ਸਮਾਜਿਕ ਵਿਕਾਸ ਮੰਤਰਾਲੇ (MSD) ਅਤੇ ਅੰਦਰੂਨੀ ਮਾਲੀਆ (IR) ਦੁਆਰਾ ਲਗਾਏ ਗਏ ਸਨ। MSD ਨੇ ਕਿਹਾ ਕਿ ਇਹ ਇੱਕ ਵੱਡੇ ਪੱਧਰ ‘ਤੇ ਧੋਖਾਧੜੀ ਦੀ ਇੱਕ ਉਦਾਹਰਣ ਹੈ ਜੋ ਪਹਿਲਾਂ ਤੋਂ ਸੋਚੀ-ਸਮਝੀ, ਸੂਝਵਾਨ ਅਤੇ ਸਿਰਫ਼ ਨਿੱਜੀ ਵਿੱਤੀ ਲਾਭ ਲਈ ਸੀ। IR ਨੇ ਕਿਹਾ ਕਿ ਰਿਵਰਸ ਨੇ ਉਨ੍ਹਾਂ ਲੋਕਾਂ ਲਈ IRD ਨੰਬਰ ਪ੍ਰਾਪਤ ਕਰਨ ਲਈ ਜਾਅਲੀ ਦਸਤਾਵੇਜ਼ਾਂ ਦੀ ਵਰਤੋਂ ਕੀਤੀ ਸੀ ਜਿਨ੍ਹਾਂ ਨੇ ਕਦੇ ਨਿਊਜ਼ੀਲੈਂਡ ਵਿੱਚ ਪੈਰ ਨਹੀਂ ਰੱਖਿਆ ਸੀ, ਮਹਾਂਮਾਰੀ ਦੌਰਾਨ ਇੱਥੇ ਕੰਮ ਕਰਨਾ ਤਾਂ ਦੂਰ ਦੀ ਗੱਲ ਹੈ।