ਨਿਊਜ਼ੀਲੈਂਡ ਦੇ Auckland ਵਿੱਚ ਇੱਕ ਵਿਅਕਤੀ ਨੇ 15 ਵੱਖ-ਵੱਖ ਪਹਿਚਾਣਾਂ ਦੀ ਵਰਤੋਂ ਕਰਕੇ ਕੋਵਿਡ-19 ਰਾਹਤ ਫੰਡ ਵਿੱਚ ਵੱਡੀ ਧੋਖਾਧੜੀ ਕੀਤੀ, ਜਿਸ ‘ਚ ਉਸਨੇ ਆਪਣੇ ਮ੍ਰਿਤਕ ਪਿਤਾ ਦੀ ਪਹਿਚਾਣ ਵੀ ਸ਼ਾਮਿਲ ਕੀਤੀ ਸੀ। ਦੋਸ਼ੀ Harry Singh ਨੂੰ ਅਦਾਲਤ ਵੱਲੋਂ 10 ਮਹੀਨੇ ਦੀ ਹੋਮ ਡਿਟੈਨਸ਼ਨ ਦੀ ਸਜ਼ਾ ਸੁਣਾਈ ਗਈ ਹੈ। ਮਾਮਲੇ ਦੀ ਸੁਣਵਾਈ Auckland District Court ਵਿੱਚ ਹੋਈ, ਜਿੱਥੇ ਸਾਹਮਣੇ ਆਇਆ ਕਿ ਸਿੰਘ ਨੇ ਮਈ 2020 ਤੋਂ ਮਾਰਚ 2022 ਤੱਕ Inland Revenue ਕੋਲ 23 ਝੂਠੀਆਂ ਅਰਜ਼ੀਆਂ ਦਿੱਤੀਆਂ। ਇਹ ਅਰਜ਼ੀਆਂ ਉਸਨੇ ਆਪਣੇ, ਪਰਿਵਾਰਕ ਮੈਂਬਰਾਂ, ਦੋਸਤਾਂ, ਪੁਰਾਣੇ ਗਾਹਕਾਂ ਅਤੇ ਉਹਨਾਂ ਕੰਪਨੀਆਂ ਦੇ ਨਾਮ ‘ਤੇ ਦਾਇਰ ਕੀਤੀਆਂ ਜੋ ਕਦੇ ਚੱਲੀਆਂ ਹੀ ਨਹੀਂ ਸਨ।
ਜਾਂਚ ਮੁਤਾਬਕ, ਉਸਨੇ ਵੱਖ-ਵੱਖ ਕੋਵਿਡ ਸਹਾਇਤਾ ਯੋਜਨਾਵਾਂ ਰਾਹੀਂ ਕੁੱਲ $108,000 ਹਾਸਿਲ ਕੀਤੇ, ਜਦਕਿ 23 ਅਰਜ਼ੀਆਂ ਦੀ ਕੁੱਲ ਧੋਖਾਧੜੀ ਰਕਮ $224,400 ਤੱਕ ਪਹੁੰਚਦੀ ਹੈ। ਅਦਾਲਤ ਨੇ ਉਸਨੂੰ $50,000 ਤੋਂ ਵੱਧ ਮੁਆਵਜ਼ਾ ਭਰਨ ਦੇ ਹੁਕਮ ਵੀ ਦਿੱਤੇ ਹਨ। ਅਧਿਕਾਰੀਆਂ ਮੁਤਾਬਿਕ, ਇਹ ਸਕੀਮਾਂ “ਹਾਈ ਟਰਸਟ ਮਾਡਲ” ‘ਤੇ ਆਧਾਰਿਤ ਸਨ, ਜਿੱਥੇ ਅਰਜ਼ੀਦਾਰਾਂ ਦੇ ਬਿਆਨਾਂ ‘ਤੇ ਭਰੋਸਾ ਕੀਤਾ ਜਾਂਦਾ ਸੀ। ਸਿੰਘ ਵੱਲੋਂ ਪ੍ਰਾਪਤ ਕੀਤੀ ਗਈ ਰਕਮ ਨੂੰ ਨਿੱਜੀ ਖਰਚਿਆਂ ਅਤੇ ਪਰਿਵਾਰਕ ਵਾਹਨ ਲਈ ਲੋਨ ਚੁਕਾਉਣ ਵਿੱਚ ਵਰਤਿਆ ਗਿਆ। ਇਹ ਮਾਮਲਾ ਦਰਸਾਉਂਦਾ ਹੈ ਕਿ ਮਹਾਮਾਰੀ ਦੌਰਾਨ ਦਿੱਤੀਆਂ ਗਈਆਂ ਸਹਾਇਤਾ ਯੋਜਨਾਵਾਂ ਦਾ ਗਲਤ ਫਾਇਦਾ ਚੁੱਕਣ ਵਾਲਿਆਂ ਖ਼ਿਲਾਫ਼ ਕਾਨੂੰਨ ਕਿੰਨਾ ਸਖ਼ਤ ਰਵੱਈਆ ਅਪਣਾ ਰਿਹਾ ਹੈ।