ਆਕਲੈਂਡ ਦੇ ਵਸਨੀਕਾਂ ਨੂੰ ਆਉਣ ਵਾਲੇ ਸਾਲਾਂ ਵਿੱਚ ਪਾਣੀ ਦੇ ਬਿੱਲਾਂ ਵਿੱਚ ਵਾਧੇ ਲਈ ਤਿਆਰ ਰਹਿਣਾ ਪਵੇਗਾ। Watercare ਨੇ ਆਪਣੇ ਇਤਿਹਾਸ ਦੇ ਸਭ ਤੋਂ ਵੱਡੇ ਬੁਨਿਆਦੀ ਢਾਂਚਾ ਨਿਵੇਸ਼ ਪ੍ਰੋਗਰਾਮ ਦਾ ਐਲਾਨ ਕਰਦਿਆਂ ਅਗਲੇ 10 ਸਾਲਾਂ ਵਿੱਚ $15.2 ਬਿਲੀਅਨ ਖਰਚ ਕਰਨ ਦੀ ਯੋਜਨਾ ਪੇਸ਼ ਕੀਤੀ ਹੈ। ਸੰਸਥਾ ਦਾ ਕਹਿਣਾ ਹੈ ਕਿ ਕਈ ਸਾਲਾਂ ਤੋਂ ਲੋੜੀਂਦਾ ਨਿਵੇਸ਼ ਨਾ ਹੋਣ ਕਾਰਨ ਆਕਲੈਂਡ ਦੇ ਪੁਰਾਣੇ ਪਾਣੀ ਅਤੇ ਗੰਦੇ ਪਾਣੀ ਦੇ ਨੈੱਟਵਰਕ ਨੂੰ ਵੱਡੇ ਪੱਧਰ ‘ਤੇ ਅਪਗ੍ਰੇਡ ਕਰਨ ਦੀ ਲੋੜ ਹੈ।
ਇਸ ਯੋਜਨਾ ਤਹਿਤ 1,000 ਤੋਂ ਵੱਧ ਪ੍ਰੋਜੈਕਟਾਂ ‘ਤੇ ਕੰਮ ਕੀਤਾ ਜਾਵੇਗਾ, ਜਿਨ੍ਹਾਂ ਵਿੱਚ ਲਗਭਗ $4 ਬਿਲੀਅਨ ਦਾ ਨਵਾਂ ਅਤੇ ਤੇਜ਼ੀ ਨਾਲ ਕੀਤਾ ਜਾਣ ਵਾਲਾ ਨਿਵੇਸ਼ ਸ਼ਾਮਿਲ ਹੈ। Watercare ਦੇ ਮੁੱਖ ਕਾਰਜਕਾਰੀ ਜੇਮੀ ਸਿੰਕਲੇਅਰ ਨੇ ਕਿਹਾ ਕਿ ਇਨ੍ਹਾਂ ਪ੍ਰੋਜੈਕਟਾਂ ਦੇ ਨਾਲ ਪਾਣੀ ਦੀਆਂ ਦਰਾਂ ਵਿੱਚ ਸਮੇਂ-ਸਮੇਂ ‘ਤੇ ਵਾਧਾ ਹੋਵੇਗਾ, ਹਾਲਾਂਕਿ ਇਹ ਕਿੰਨਾ ਹੋਵੇਗਾ, ਇਸ ਬਾਰੇ ਅਜੇ ਕੁਝ ਕਹਿਣਾ ਜਲਦੀ ਹੋਵੇਗਾ ਕਿਉਂਕਿ ਕੀਮਤਾਂ ਦਾ ਨਿਰਧਾਰਨ ਨਿਯਮਕ ਸੰਸਥਾਵਾਂ ਵੱਲੋਂ ਕੀਤਾ ਜਾਂਦਾ ਹੈ।
ਸਭ ਤੋਂ ਵੱਡੇ ਪ੍ਰੋਜੈਕਟਾਂ ਵਿੱਚ $1.7 ਬਿਲੀਅਨ ਦਾ ਵਾਇਕਾਟੋ ਵਾਟਰ ਸਪਲਾਈ ਪ੍ਰੋਗਰਾਮ ਸ਼ਾਮਿਲ ਹੈ। ਇਸ ਤਹਿਤ ਨਵਾਂ ਰਾਅ ਵਾਟਰ ਇੰਟੇਕ, 50 ਕਿਲੋਮੀਟਰ ਲੰਬੀ ਪਾਈਪਲਾਈਨ, ਪੁਕੇਕੋਹੇ ਵੈਸਟ ਵਿੱਚ ਨਵਾਂ ਰਿਜ਼ਰਵਾਇਰ ਅਤੇ ਨਵਾਂ ਵਾਟਰ ਟ੍ਰੀਟਮੈਂਟ ਪਲਾਂਟ ਬਣਾਇਆ ਜਾਵੇਗਾ। 2033 ਤੱਕ ਇਹ ਪ੍ਰੋਜੈਕਟ ਪੂਰਾ ਹੋਣ ਤੋਂ ਬਾਅਦ ਵਾਇਕਾਟੋ ਦਰਿਆ ਤੋਂ ਆਕਲੈਂਡ ਨੂੰ ਮਿਲਣ ਵਾਲੇ ਸਾਫ਼ ਪੀਣਯੋਗ ਪਾਣੀ ਦੀ ਸਪਲਾਈ 200 ਮਿਲੀਅਨ ਲੀਟਰ ਤੋਂ ਵੱਧ ਕੇ 300 ਮਿਲੀਅਨ ਲੀਟਰ ਪ੍ਰਤੀ ਦਿਨ ਹੋ ਜਾਵੇਗੀ।
ਇਸ ਤੋਂ ਇਲਾਵਾ Waitematā Harbour ਵਿੱਚ ਪਾਣੀ ਦੀ ਗੁਣਵੱਤਾ ਸੁਧਾਰਨ ਲਈ $1.6 ਬਿਲੀਅਨ, Rosedale Wastewater Treatment Plant ਦੇ ਅਪਗ੍ਰੇਡ ਲਈ $600 ਮਿਲੀਅਨ ਅਤੇ ਪੁਰਾਣੇ ਪਾਣੀ ਅਤੇ ਸੀਵਰੇਜ ਨੈੱਟਵਰਕ ਨੂੰ ਨਵਾਂ ਕਰਨ ਲਈ $4.3 ਬਿਲੀਅਨ ਦਾ ਨਿਵੇਸ਼ ਵੀ ਕੀਤਾ ਜਾਵੇਗਾ।
ਆਕਲੈਂਡ ਦੀ ਡਿਪਟੀ ਮੇਅਰ ਡੈਸਲੀ ਸਿਮਪਸਨ ਨੇ ਕਿਹਾ ਕਿ ਹੁਣ ਬੁਨਿਆਦੀ ਢਾਂਚੇ ਵਿੱਚ ਨਿਵੇਸ਼ ਨੂੰ ਹੋਰ ਟਾਲਿਆ ਨਹੀਂ ਜਾ ਸਕਦਾ। ਉਨ੍ਹਾਂ ਦੇ ਅਨੁਸਾਰ ਇਹ ਪ੍ਰੋਜੈਕਟ ਵਿਕਲਪ ਨਹੀਂ, ਸਗੋਂ ਸ਼ਹਿਰ ਦੇ ਭਵਿੱਖ ਅਤੇ ਵਧਦੀ ਆਬਾਦੀ ਦੀਆਂ ਲੋੜਾਂ ਨੂੰ ਪੂਰਾ ਕਰਨ ਲਈ ਬਹੁਤ ਜ਼ਰੂਰੀ ਹਨ। ਉੱਧਰ ਸਥਾਨਕ ਸਰਕਾਰ ਮੰਤਰੀ ਸਾਈਮਨ ਵਾਟਸ ਨੇ ਕਿਹਾ ਕਿ ਨਵੇਂ ਫੰਡਿੰਗ ਮਾਡਲ ਨਾਲ ਇਹ ਯੋਜਨਾ ਸੰਭਵ ਹੋਈ ਹੈ ਅਤੇ ਇਸ ਨਾਲ ਆਕਲੈਂਡ ਦੇ ਵਿਕਾਸ ਨੂੰ ਮਜ਼ਬੂਤ ਸਹਾਰਾ ਮਿਲੇਗਾ।