bay of plenty ‘ਚ ਸੜਕਾਂ ਦੀ ਹਾਲਤ ਤਰਸਯੋਗ ਬਣਦੀ ਹੋਈ ਨਜ਼ਰ ਆ ਰਹੀ ਹੈ। ਦਰਅਸਲ ਸੜਕ ‘ਤੇ ਪਏ ਟੋਏ ਲਗਾਤਾਰ ਵੱਧਦੇ ਜਾ ਰਹੇ ਨੇ ਜਿਸ ਕਾਰਨ ਆਵਾਜਾਈ ਵਿੱਚ ਵਿਘਨ ਪੈ ਰਿਹਾ ਹੈ, ਇਸ ਲਈ ਬੇਅ ਆਫ਼ ਪਲੈਂਟੀ ਕੈਮਾਈ ਰੇਂਜਾਂ ਉੱਤੇ ਟ੍ਰੈਫਿਕ ਪ੍ਰਬੰਧਨ ਲਾਗੂ ਕਰਨਾ ਪਿਆ ਹੈ। ਕੱਲ੍ਹ ਦੀ ਇੱਕ ਫੁਟੇਜ ਵਿੱਚ ਦਿਖਾਇਆ ਗਿਆ ਹੈ ਕਿ ਭਾਰੀ ਮੀਂਹ ਵਿੱਚ ਸਟੇਟ ਹਾਈਵੇਅ 29 ਦੇ ਪਾਸੇ ਘੱਟੋ-ਘੱਟ ਇੱਕ ਦਰਜਨ ਵਾਹਨਾਂ ਦੀ ਕਤਾਰ ਲੱਗੀ ਹੋਈ ਸੀ। ਲੋਕ ਆਪਣੇ ਵਾਹਨਾਂ ਦੇ ਨੁਕਸਾਨ ਦਾ ਮੁਲਾਂਕਣ ਕਰਦੇ ਦਿਖਾਈ ਦੇ ਰਹੇ।
ਠੇਕੇਦਾਰਾਂ ਦੇ ਵੱਲੋਂ ਵੀ ਸੜਕ ਦੇ ਲਗਭਗ 10-ਮੀਟਰ ਹਿੱਸੇ ਵਿੱਚ ਟੋਇਆਂ ਦੀ ਇੱਕ ਲੜੀ ਲੱਭੀ ਗਈ ਹੈ। ਵਾਕਾ ਕੋਟਾਹੀ ਨੇ ਕਿਹਾ ਕਿ ਠੇਕੇਦਾਰਾਂ ਨੇ ਟੋਇਆਂ ਨੂੰ ਭਰਨ ਲਈ ਟ੍ਰੈਫਿਕ ਦੀ ਇੱਕ ਲੇਨ ਨੂੰ ਬਦਲ ਦਿੱਤਾ ਹੈ। ਰੀਜਨ ਸਿਸਟਮ ਮੈਨੇਜਰ ਰੋਜਰ ਬ੍ਰੈਡੀ ਨੇ ਕਿਹਾ ਕਿ ਭਾਰੀ ਮੀਂਹ ਅਤੇ ਆਵਾਜਾਈ ਕਾਰਨ ਸੜਕ ਤੇਜ਼ੀ ਨਾਲ ਖ਼ਰਾਬ ਹੋਈ ਹੈ। ਅਗਲੇ ਮਹੀਨੇ, ਸੜਕ ਦੇ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ SH29 ਦੇ ਖਾਸ ਖੇਤਰਾਂ ਦੀ ਮੁਰੰਮਤ ਕੀਤੀ ਜਾਵੇਗੀ, ਜਿਸ ਬਾਰੇ ਬ੍ਰੈਡੀ ਦਾ ਕਹਿਣਾ ਹੈ ਕਿ ਭਵਿੱਖ ਵਿੱਚ ਟੋਇਆਂ ਹੋਣ ਦੀ ਸੰਭਾਵਨਾ ਘੱਟ ਜਾਵੇਗੀ। ਉੱਥੇ ਹੀ ਇਸ ਸਬੰਧੀ ਪੁਲਿਸ ਦੇ ਵੱਲੋਂ ਵੀ ਡ੍ਰਾਇਵਰਾਂ ਨੂੰ ਇੱਕ ਚਿਤਾਵਨੀ ਵੀ ਜਾਰੀ ਕੀਤੀ ਗਈ ਹੈ।