ਇਸ ਸਮੇਂ Kaikōura ਤੋਂ ਇੱਕ ਮੰਦਭਾਗੀ ਖਬਰ ਸਾਹਮਣੇ ਆਈ ਹੈ। Kaikōura ਵਿੱਚ ਇੱਕ ਕਿਸ਼ਤੀ ਪਲਟਣ ਤੋਂ ਬਾਅਦ ਪੰਜ ਲੋਕਾਂ ਦੀ ਮੌਤ ਹੋ ਗਈ ਹੈ ਜਦਕਿ ਛੇ ਨੂੰ ਬਚਾ ਲਿਆ ਗਿਆ ਹੈ। ਇਹ ਘਟਨਾ ਅੱਜ ਗੂਜ਼ ਬੇ ਦੇ ਕੋਲ ਵਾਪਰੀ ਹੈ। ਪੁਲਿਸ ਨੇ ਪੁਸ਼ਟੀ ਕੀਤੀ ਹੈ ਕਿ ਟੱਕਰ ਤੋਂ ਬਾਅਦ ਕਿਸ਼ਤੀ ਪਲਟ ਗਈ ਸੀ, ਪਰ ਇਹ ਪੁਸ਼ਟੀ ਨਹੀਂ ਕੀਤੀ ਕਿ ਇਹ ਇੱਕ whale ਨਾਲ ਟਕਰਾਈ ਸੀ ਜਾ ਨਹੀਂ। ਜਹਾਜ਼ ‘ਚ ਕਪਤਾਨ ਸਮੇਤ 11 ਲੋਕ ਸਵਾਰ ਸਨ। ਮੰਨਿਆ ਜਾਂ ਰਿਹਾ ਹੈ ਕਿ ਜਹਾਜ਼ ‘ਤੇ ਸਵਾਰ ਸਮੂਹ ਪੰਛੀ ਦੇਖਣ ਦਾ ਸ਼ੌਕੀਨ ਸੀ ਅਤੇ ਉਨ੍ਹਾਂ ਨੇ ਇਸ ਖੇਤਰ ਦੀ ਯਾਤਰਾ ਕਰਦੇ ਸਮੇਂ ਜਹਾਜ਼ ਨੂੰ ਕਿਰਾਏ ‘ਤੇ ਲਿਆ ਸੀ।
ਇੱਕ ਗੋਤਾਖੋਰ ਟੀਮ ਫਿਲਹਾਲ ਪੰਜ ਲਾਸ਼ਾਂ ਨੂੰ ਬਰਾਮਦ ਕਰਨ ਲਈ ਕੰਮ ਕਰ ਰਹੀ ਹੈ ਅਤੇ ਰਸਮੀ ਪਛਾਣ ਦੀ ਪ੍ਰਕਿਰਿਆ ਚੱਲ ਰਹੀ ਹੈ। ਜਿਨ੍ਹਾਂ ਛੇ ਨੂੰ ਬਚਾਇਆ ਗਿਆ ਸੀ, ਉਨ੍ਹਾਂ ਨੂੰ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਹੈ। Kaikōura ਦੇ ਮੇਅਰ ਕ੍ਰੇਗ ਮੈਕਲ ਨੇ ਕਿਹਾ, “ਇਹ ਇੱਕ ਦੁਖਦਾਈ ਘਟਨਾ ਹੈ ਜੋ ਬਹੁਤ ਸਾਰੀਆਂ ਜ਼ਿੰਦਗੀਆਂ ਨੂੰ ਪ੍ਰਭਾਵਿਤ ਕਰਦੀ ਹੈ, ਸਭ ਤੋਂ ਵੱਧ ਪਰਿਵਾਰ ਅਤੇ ਅਜ਼ੀਜ਼ਾਂ ਨੂੰ। ਤੁਹਾਡੇ ਸਾਰਿਆਂ ਲਈ ਦਿਲੋਂ ਦੁੱਖ ਅਤੇ ਹਮਦਰਦੀ।”