ਨਿਊਜ਼ੀਲੈਂਡ ਦੇ ਕ੍ਰਾਇਸਟਚਰਚ ਵਿੱਚ ਇੱਕ 15 ਸਾਲਾ ਨਾਬਾਲਿਗ ਵੱਲੋਂ ਚਲਾਈ ਜਾ ਰਹੀ ਚੋਰੀ ਦੀ ਕਾਰ ਪੁਲਿਸ ਵੱਲੋਂ ਕੀਤੀ ਜਾ ਰਹੀ ਪਿੱਛੇਦਾਰੀ ਦੌਰਾਨ ਟ੍ਰੇਨ ਨਾਲ ਟਕਰਾ ਗਈ।ਇਸ ਹਾਦਸੇ ਵਿੱਚ ਟ੍ਰੇਨ ਡਰਾਈਵਰ ਨੂੰ ਰੀੜ੍ਹ ਦੀ ਹੱਡੀ ਦੀ ਗੰਭੀਰ ਸੱਟ ਲੱਗੀ, ਜਦਕਿ ਨਾਬਾਲਿਗ ਡਰਾਈਵਰ ਬਚ ਗਿਆ। ਇੰਡਿਪੈਂਡੈਂਟ ਪੁਲਿਸ ਕੰਡਕਟ ਅਥਾਰਟੀ (IPCA) ਦੀ ਰਿਪੋਰਟ ਅਨੁਸਾਰ, 2023 ਵਿੱਚ ਵਾਪਰੇ ਇਸ ਮਾਮਲੇ ਦੌਰਾਨ ਦੋ ਪੁਲਿਸ ਅਧਿਕਾਰੀਆਂ ਨੇ ਹਨੇਰੇ ਅਤੇ ਮੀਂਹ ਵਾਲੀ ਰਾਤ ਵਿੱਚ ਨਿਯਮਾਂ ਦੇ ਉਲਟ ਤੇਜ਼ ਰਫ਼ਤਾਰ ਨਾਲ ਚੋਰੀ ਦੀਆਂ ਕਾਰਾਂ ਦਾ ਪਿੱਛਾ ਕੀਤਾ ਸੀ। ਰਿਪੋਰਟ ਮੁਤਾਬਿਕ ਸਵੇਰੇ ਕਰੀਬ 4 ਵਜੇ ਇੱਕ ਪੁਲਿਸ ਅਧਿਕਾਰੀ ਨੇ ਰਿਕਕਾਰਟਨ ਇਲਾਕੇ ਵਿੱਚ ਦੋ ਕਾਰਾਂ ਨੂੰ ਤੇਜ਼ੀ ਨਾਲ ਭੱਜਦੇ ਦੇਖਿਆ, ਜਿਨ੍ਹਾਂ ਵਿੱਚੋਂ ਇੱਕ ਕਾਰ ਚੋਰੀ ਦੀ ਸੀ। ਅਧਿਕਾਰੀ ਨੇ ਬਿਨਾਂ ਲਾਈਟਾਂ ਅਤੇ ਸਾਇਰਨ ਚਾਲੂ ਕੀਤੇ ਕਾਰਾਂ ਦਾ ਪਿੱਛਾ ਕੀਤਾ।
ਬਾਅਦ ਵਿੱਚ ਦੂਜੇ ਪੁਲਿਸ ਅਧਿਕਾਰੀ ਨੇ ਵੀ ਦੂਰੀ ਬਣਾਈ ਰੱਖਦੇ ਹੋਏ ਕਾਰਾਂ ਦਾ ਪਿੱਛਾ ਕੀਤਾ। ਉਸ ਨੇ ਵੀ ਕੁਝ ਸਮੇਂ ਤੱਕ ਲਾਈਟਾਂ ਅਤੇ ਸਾਇਰਨ ਨਹੀਂ ਚਲਾਏ ਅਤੇ ਰਿਹਾਇਸ਼ੀ ਇਲਾਕੇ ਵਿੱਚ ਕਰੀਬ 106 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਔਸਤ ਰਫ਼ਤਾਰ ਨਾਲ ਗੱਡੀ ਚਲਾਈ। ਪੁਲਿਸ ਵੱਲੋਂ ਲਗਾਏ ਗਏ ਰੋਡ ਸਪਾਈਕਸ ਤੋਂ ਬਚਦੇ ਹੋਏ ਦੋਵੇਂ ਚੋਰੀ ਦੀਆਂ ਕਾਰਾਂ ਲਿੰਕਨ ਰੋਡ ਵੱਲ ਨਿਕਲ ਗਈਆਂ। ਇਸ ਦੌਰਾਨ ਦੋਵੇਂ ਡਰਾਈਵਰ ਰੇਲਵੇ ਕ੍ਰਾਸਿੰਗ ਦੇ ਚੇਤਾਵਨੀ ਸੰਕੇਤਾਂ ਨੂੰ ਅਣਡਿੱਠਾ ਕਰਦੇ ਹੋਏ ਪੱਟੜੀ ਪਾਰ ਕਰਨ ਲੱਗੇ, ਜਿੱਥੇ ਦੂਜੀ ਕਾਰ ਟ੍ਰੇਨ ਨਾਲ ਟਕਰਾ ਗਈ।
IPCA ਨੇ ਕਿਹਾ ਕਿ ਪੁਲਿਸ ਅਧਿਕਾਰੀਆਂ ਨੇ ਡਰਾਈਵਰਾਂ ਨੂੰ ਸਿੱਧੇ ਤੌਰ ‘ਤੇ ਰੁਕਣ ਦਾ ਸੰਕੇਤ ਨਹੀਂ ਦਿੱਤਾ ਸੀ, ਇਸ ਲਈ ਇਹ ਘਟਨਾ ਅਧਿਕਾਰਕ “ਪੁਲਿਸ ਪੁਰਸਿਊਟ” ਨਹੀਂ ਮੰਨੀ ਗਈ। ਹਾਲਾਂਕਿ ਅਥਾਰਟੀ ਨੇ ਸਾਫ਼ ਕੀਤਾ ਕਿ ਮੌਸਮ ਅਤੇ ਸੜਕ ਹਾਲਾਤਾਂ ਨੂੰ ਦੇਖਦੇ ਹੋਏ ਇਸ ਤਰ੍ਹਾਂ ਤੇਜ਼ ਰਫ਼ਤਾਰ ਨਾਲ ਪਿੱਛਾ ਕਰਨਾ ਜਾਇਜ਼ ਨਹੀਂ ਸੀ।
ਰਿਪੋਰਟ ਵਿੱਚ ਪੁਲਿਸ ਨੀਤੀਆਂ ਵਿੱਚ ਮੌਜੂਦ ਖਾਮੀਆਂ ਵੱਲ ਵੀ ਧਿਆਨ ਦਿਵਾਇਆ ਗਿਆ ਹੈ ਅਤੇ ਕਿਹਾ ਗਿਆ ਹੈ ਕਿ “ਸਿਗਨਲ ਟੂ ਸਟਾਪ” ਦੀ ਸਪਸ਼ਟ ਪਰਿਭਾਸ਼ਾ ਨਾ ਹੋਣ ਕਾਰਨ ਅਜਿਹੀਆਂ ਸਥਿਤੀਆਂ ਵਿੱਚ ਗਲਤਫਹਿਮੀਆਂ ਪੈਦਾ ਹੁੰਦੀਆਂ ਹਨ।
ਕੈਂਟਰਬਰੀ ਜ਼ਿਲ੍ਹਾ ਕਮਾਂਡਰ ਸੁਪਰਿੰਟੈਂਡੈਂਟ ਟੋਨੀ ਹਿੱਲ ਨੇ ਕਿਹਾ ਕਿ ਪੁਲਿਸ ਨੇ ਰਿਪੋਰਟ ਦੀਆਂ ਸਿਫ਼ਾਰਸ਼ਾਂ ਨੂੰ ਸਵੀਕਾਰ ਕਰ ਲਿਆ ਹੈ ਅਤੇ ਅਧਿਕਾਰੀਆਂ ਨੂੰ ਤੇਜ਼ ਰਫ਼ਤਾਰ ਡ੍ਰਾਈਵਿੰਗ ਅਤੇ ਖ਼ਤਰੇ ਦੇ ਪ੍ਰਬੰਧਨ ਬਾਰੇ ਵਾਧੂ ਟ੍ਰੇਨਿੰਗ ਦਿੱਤੀ ਜਾ ਰਹੀ ਹੈ।
IPCA ਨੇ ਆਪਣੇ ਨਤੀਜਿਆਂ ਵਿੱਚ ਕਿਹਾ ਕਿ:
ਅਫਸਰ A ਅਤੇ B ਨੇ ਨੀਤੀ ਅਨੁਸਾਰ ਅਧਿਕਾਰਕ ਪਿੱਛਾ ਨਹੀਂ ਕੀਤਾ, ਪਰ ਉਨ੍ਹਾਂ ਦੀ ਕਾਰਵਾਈ ਜਾਇਜ਼ ਨਹੀਂ ਸੀ।
ਅਫਸਰ B ਵੱਲੋਂ ਤੇਜ਼ ਰਫ਼ਤਾਰ ਨਾਲ ਡ੍ਰਾਈਵਿੰਗ ਕਰਨਾ ਖ਼ਤਰਨਾਕ ਸੀ।
ਅਫਸਰ D ਵੱਲੋਂ ਰੋਡ ਸਪਾਈਕਸ ਵਰਤਣਾ ਠੀਕ ਸੀ, ਪਰ ਉਹਨਾਂ ਦੀ ਤੈਨਾਤੀ ਸੁਰੱਖਿਅਤ ਢੰਗ ਨਾਲ ਨਹੀਂ ਕੀਤੀ ਗਈ।