ਜੇਕਰ ਤੁਸੀਂ ਵੀ ਘਰ ‘ਚ ਕਾਰ ਧੋਂਦੇ ਹੋ ਤਾਂ ਆਕਲੈਂਡ ਵਾਸੀਆਂ ਲਈ ਇਹ ਇੱਕ ਵੱਡੀ ਖ਼ਬਰ ਹੈ ਦਰਅਸਲ ਅਜਿਹਾ ਕਰਨਾ ਤੁਹਾਨੂੰ ਮਹਿੰਗਾ ਪੈ ਸਕਦਾ ਹੈ। ਆਕਲੈਂਡ ਵਾਸੀਆਂ ਨੂੰ ਘਰ ‘ਚ ਖੁਦ ਕਾਰ ਧੋਣਾ ਵੀ $1500 ‘ਚ ਪੈ ਸਕਦਾ ਹੈ। Auckland Council ਦੇ ਨਿਯਮਾਂ ਮੁਤਾਬਿਕ ਘਰੇਲੂ ਕਾਰ ਵਾਸ਼ ਤੋਂ ਨਿਕਲਣ ਵਾਲਾ ਪਾਣੀ ਗੈਰਕਾਨੂੰਨੀ ਤੌਰ ‘ਤੇ ਸਟਾਰਮਵਾਟਰ ਸਿਸਟਮ ‘ਚ ਚਲਾ ਜਾਂਦਾ ਹੈ। ਸੋਸ਼ਲ ਮੀਡੀਆ ‘ਤੇ ਵਾਇਰਲ ਮਾਮਲੇ ਮੁਤਾਬਿਕ ਇੱਕ ਵਿਅਕਤੀ ਨੂੰ ਆਪਣੇ ਡਰਾਈਵੇ ‘ਤੇ ਕਾਰ ਧੋਣ ਲਈ $750 ਦਾ ਜੁਰਮਾਨਾ ਕੀਤਾ ਗਿਆ ਹੈ।
ਆਕਲੈਂਡ ਕੌਂਸਲ ਦੇ ਐਕਟਿੰਗ ਕਾਮਪਲਾਇੰਸ ਮੈਨੇਜਰ Jesse Hindt ਨੇ ਇੱਕ ਬਿਆਨ ‘ਚ ਕਿਹਾ ਕਿ, ਕਾਰ ਧੋਣ ਵਾਲਾ ਪਾਣੀ ਸਟਾਰਮਵਾਟਰ ਡਰੇਨਾਂ ‘ਚ ਜਾਂਦਾ ਹੈ, ਇਹ ਡਰੇਨ ਸਿੱਧੇ ਨਦੀਆਂ, ਦਰਿਆਵਾਂ ਅਤੇ ਸਮੁੰਦਰ ਨਾਲ ਜੁੜੇ ਹੁੰਦੇ ਹਨ। ਇਸ ਪਾਣੀ ‘ਚ ਡਿਟਰਜੈਂਟ, ਤੇਲ ਅਤੇ ਫਿਊਲ ਦੇ ਅੰਸ਼, ਧਾਤਾਂ ਅਤੇ ਮਿੱਟੀ ਹੁੰਦੇ ਹਨ, ਜੋ ਜਲਜੀਵਨ ਲਈ ਜ਼ਹਿਰੀਲੇ ਹਨ। ਬਾਇਓਡੀਗ੍ਰੇਡੇਬਲ ਡਿਟਰਜੈਂਟ ਵੀ ਜਲਮਾਰਗਾਂ ਨੂੰ ਪ੍ਰਦੂਸ਼ਿਤ ਕਰਦੇ ਹਨ।
Resource Management Act (RMA) ਅਨੁਸਾਰ, ਪਾਣੀ ‘ਚ ਪ੍ਰਦੂਸ਼ਕ ਛੱਡਣਾ ਗੈਰਕਾਨੂੰਨੀ ਹੈ, ਵਿਅਕਤੀਆਂ ਲਈ ਜੁਰਮਾਨਾ: $1500 ਹੈ ਜਦਕਿ ਕੰਪਨੀਆਂ ਲਈ: $3000 ਹੈ। ਸਤੰਬਰ 2025 ਵਿੱਚ RMA ਦੇ ਜੁਰਮਾਨੇ ਵਧਾਏ ਗਏ ਸਨ, ਇਸ ਲਈ ਹੁਣ ਸਜ਼ਾਵਾਂ ਹੋਰ ਸਖ਼ਤ ਹਨ। ਕੌਂਸਲ ਕਹਿੰਦੀ ਹੈ ਕਿ ਫੰਡਰੇਜ਼ਰ ਜਾਂ ਕਮਿਊਨਿਟੀ ਕਾਰ ਵਾਸ਼ ਵੀ ਤਦੋਂ ਹੀ ਕਾਨੂੰਨੀ ਹਨ ਜੇ ਪਾਣੀ ਸਟਾਰਮਵਾਟਰ ਸਿਸਟਮ ‘ਚ ਨਾ ਜਾਵੇ, ਢੁੱਕਵੇਂ ਕੰਟਰੋਲ ਲਗਾਏ ਜਾਣ।