ਨਿਊਜ਼ੀਲੈਂਡ ਕੌਂਸਲ ਆਫ਼ ਸਿੱਖ ਅਫੇਅਰਜ਼ ਨੇ ਵਾਇਕਾਟੋ ਵਿੱਚ ਹਾਲ ਹੀ ਵਿੱਚ ਹੋਈ ਹਾਕਾ ਘਟਨਾ ਤੋਂ ਬਾਅਦ ਭਾਰਤੀ ਕਮਿਊਨਿਟੀ ਦੇ ਮੈਂਬਰਾਂ ਨੂੰ ਪਹੁੰਚੀ ਠੇਸ ਬਾਰੇ ਉਠਾਈਆਂ ਗਈਆਂ ਚਿੰਤਾਵਾਂ ਦੇ ਸਬੰਧ ਵਿੱਚ ਚੇ ਵਿਲਸਨ ਵੱਲੋਂ ਦਿੱਤੀ ਮਾਫ਼ੀ ਨੂੰ ਸਵੀਕਾਰ ਕੀਤਾ ਹੈ। ਕੌਂਸਲ ਨੇ ਇਸ ਗੱਲ ਦੀ ਕਦਰ ਕੀਤੀ ਹੈ ਕਿ ਠੇਸ ਪਹੁੰਚਣ ਦੀ ਗੱਲ ਮੰਨੀ ਗਈ ਹੈ ਅਤੇ ਸਿੱਧੇ ਤੇ ਇਮਾਨਦਾਰ ਤਰੀਕੇ ਨਾਲ ਗੱਲਬਾਤ ਕਰਨ ਦੀ ਤਿਆਰੀ ਦਿਖਾਈ ਗਈ ਹੈ।
ਕੌਂਸਲ ਨੇ ਕਿਹਾ ਕਿ ਅਸੀਂ ਪ੍ਰਗਟਾਵੇ ਦੇ ਕਲਾਤਮਕ ਅਤੇ ਸੱਭਿਆਚਾਰਕ ਰੂਪਾਂ ਦਾ ਸਤਿਕਾਰ ਕਰਦੇ ਹਾਂ, ਜਿਸ ਵਿੱਚ ਤਿੱਖੀ ਰਾਜਨੀਤਿਕ ਆਲੋਚਨਾ ਵੀ ਸ਼ਾਮਿਲ ਹੈ। ਹਾਲਾਂਕਿ, ਚਿੰਤਾ ਉਸ ਵੇਲੇ ਪੈਦਾ ਹੁੰਦੀ ਹੈ ਜਦੋਂ ਰਾਜਨੀਤਿਕ ਆਲੋਚਨਾ ਨਸਲੀ ਜਾਂ ਕਮਿਊਨਿਟੀ ਅਰਥ ਲੈ ਲੈਂਦੀ ਹੈ ਅਤੇ ਇਸ ਨਾਲ ਵੱਡੇ ਪੱਧਰ ‘ਤੇ ਲੋਕਾਂ ਨੂੰ ਠੇਸ ਪਹੁੰਚਦੀ ਹੈ।
29 ਅਪ੍ਰੈਲ 2026 ਨੂੰ ਵੈਲਿੰਗਟਨ ਵਿੱਚ ਕੌਂਸਲ ਦੇ ਇੱਕ ਪ੍ਰਤੀਨਿਧੀ ਨੇ ਚੇ ਵਿਲਸਨ ਨਾਲ ਮੁਲਾਕਾਤ ਕੀਤੀ, ਜਿਸ ਦਾ ਮਕਸਦ ਇਸ ਮਾਮਲੇ ਨੂੰ ਸੁਲਝਾਉਣ ਅਤੇ ਅਗਲੇ ਕਦਮਾਂ ‘ਤੇ ਚਰਚਾ ਕਰਨਾ ਸੀ। ਇਸ ਤੋਂ ਬਾਅਦ ਅੱਜ ਹੈਮਿਲਟਨ ਵਿੱਚ ਜੁਝਾਰ (ਜੇ) ਸਿੰਘ ਰੰਧਾਵਾ—ਜੋ ਕਿ ਵਾਇਕਾਟੋ ਦੇ ਇੱਕ ਵਪਾਰੀ ਅਤੇ ਜਸਟਿਸ ਆਫ਼ ਪੀਸ ਹਨ—ਨਾਲ ਇਕ ਹੋਰ ਮੀਟਿੰਗ ਹੋਈ।
ਇਸ ਮੀਟਿੰਗ ਵਿੱਚ ਇਹ ਵੀ ਚਰਚਾ ਕੀਤੀ ਗਈ ਕਿ ਇਸ ਮੁਸ਼ਕਲ ਸਥਿਤੀ ਨੂੰ ਕਿਵੇਂ ਸਕਾਰਾਤਮਕ ਸਮਾਜਿਕ ਸਾਂਝ ਵਿੱਚ ਬਦਲਿਆ ਜਾ ਸਕਦਾ ਹੈ। ਸਾਰਿਆਂ ਪੱਖਾਂ ਨੇ ਆਉਣ ਵਾਲੇ ਦੋ ਤੋਂ ਤਿੰਨ ਹਫ਼ਤਿਆਂ ਵਿੱਚ ਵਾਇਕਾਟੋ ਵਿੱਚ ਇੱਕ “ਹੁਈ” (ਸੰਵਾਦਕ ਮੀਟਿੰਗ) ਕਰਵਾਉਣ ‘ਤੇ ਸਹਿਮਤੀ ਜਤਾਈ ਹੈ।
ਇਸ ਹੁਈ ਦਾ ਮਕਸਦ ਆਪਸੀ ਆਦਰ, ਗੱਲਬਾਤ, ਸਮਝੌਤਾ, ਅਤੇ ਕਮਿਊਨਿਟੀਆਂ ਵਿਚਕਾਰ ਮਜ਼ਬੂਤ ਸਬੰਧ ਬਣਾਉਣਾ ਹੋਵੇਗਾ। ਕੌਂਸਲ ਦਾ ਮੰਨਣਾ ਹੈ ਕਿ ਜਦੋਂ ਠੇਸ ਨੂੰ ਮੰਨਿਆ ਜਾਵੇ ਅਤੇ ਮਾਫ਼ੀ ਮੰਗੀ ਜਾਵੇ, ਤਾਂ ਗੱਲਬਾਤ ਅਤੇ ਸਬੰਧ ਮਜ਼ਬੂਤ ਕਰਨ ਲਈ ਮੌਕਾ ਬਣਦਾ ਹੈ।
ਕੌਂਸਲ ਨੇ ਉਮੀਦ ਜਤਾਈ ਹੈ ਕਿ ਇਸ ਪ੍ਰਕਿਰਿਆ ਨਾਲ ਰਾਜਨੀਤਿਕ ਪ੍ਰਤੀਕਿਰਿਆ ਕਮਿਊਨਿਟੀ ਨੂੰ ਨੁਕਸਾਨ ਨਹੀਂ ਪਹੁੰਚਾਏਗੀ ਅਤੇ ਆਪਸੀ ਸਤਿਕਾਰ ਰਾਹੀਂ ਕੁਝ ਸਕਾਰਾਤਮਕ ਨਤੀਜੇ ਸਾਹਮਣੇ ਆਉਣਗੇ। ਹੁਈ ਬਾਰੇ ਹੋਰ ਵੇਰਵੇ ਜਲਦੀ ਸਾਂਝੇ ਕੀਤੇ ਜਾਣਗੇ।