ਕ੍ਰਾਈਸਟਚਰਚ ਤੋਂ ਸਿਡਨੀ ਜਾਣ ਵਾਲੀ ਏਅਰ ਨਿਊਜ਼ੀਲੈਂਡ ਦੀ ਇੱਕ ਉਡਾਣ ਨੂੰ ਅੱਜ ਸਵੇਰੇ ਸਿਡਨੀ ਹਵਾਈ ਅੱਡੇ ‘ਤੇ ਪਹੁੰਚਣ ‘ਤੇ ਐਮਰਜੈਂਸੀ ਸੇਵਾਵਾਂ ਵੱਲੋਂ ਸੰਪਰਕ ਕੀਤਾ ਗਿਆ ਸੀ, ਕਿਉਂਕਿ ਉਡਾਣ ਦੌਰਾਨ ਤਕਨੀਕੀ ਸਮੱਸਿਆ ਦੀ ਰਿਪੋਰਟ ਆਈ ਸੀ। ਏਅਰਬੱਸ ਏ320 ਦੁਆਰਾ ਸੰਚਾਲਿਤ ਫਲਾਈਟ NZ221, ਨੂੰ ਤਸਮਾਨ ਪਾਰ ਕਰਦੇ ਸਮੇਂ ਇਹ ਸਮੱਸਿਆ ਆਈ ਸੀ। ਏਅਰ ਨਿਊਜ਼ੀਲੈਂਡ ਦੇ ਮੁੱਖ ਸੁਰੱਖਿਆ ਅਤੇ ਜੋਖਮ ਅਧਿਕਾਰੀ ਨਾਥਨ ਮੈਕਗ੍ਰਾ ਨੇ ਇੱਕ ਬਿਆਨ ਵਿੱਚ ਘਟਨਾ ਦੀ ਪੁਸ਼ਟੀ ਕੀਤੀ ਹੈ।
ਮੈਕਗ੍ਰਾ ਨੇ ਕਿਹਾ ਕਿ, “ਕ੍ਰਾਈਸਟਚਰਚ ਤੋਂ ਸਿਡਨੀ ਜਾਣ ਵਾਲੀ NZ221 ਨੇ ਉਡਾਣ ਦੌਰਾਨ ਇੱਕ ਤਕਨੀਕੀ ਸਮੱਸਿਆ ਦੀ ਰਿਪੋਰਟ ਕੀਤੀ। ਐਮਰਜੈਂਸੀ ਸੇਵਾਵਾਂ ਵੱਲੋਂ ਜਹਾਜ਼ ਪਹੁੰਚਣ ‘ਤੇ ਜਾਂਚ ਕੀਤੀ ਗਈ। ਹਾਲਾਂਕਿ ਰਾਹਤ ਰਹੀ ਕਿ ਜਹਾਜ਼ ਸੁਰੱਖਿਅਤ ਢੰਗ ਨਾਲ ਉਤਰਿਆ, ਅਤੇ ਸਾਡੀ ਇੰਜੀਨੀਅਰਿੰਗ ਟੀਮ ਹੁਣ ਇਹ ਯਕੀਨੀ ਬਣਾਉਣ ਲਈ ਜਾਂਚ ਕਰੇਗੀ ਕਿ ਜਹਾਜ਼ ਸੇਵਾ ਵਿੱਚ ਵਾਪਸ ਆਉਣ ਲਈ ਸੁਰੱਖਿਅਤ ਹੈ ਜਾ ਨਹੀਂ।” ਜ਼ਿਕਰਯੋਗ ਹੈ ਕਿ ਇੱਥੇ ਪਾਇਲਟ ਦੇ ਵੱਲੋਂ ਦਿਖਾਈ ਗਈ ਸਿਆਣਪ ਨੇ ਸੈਂਕੜੇ ਲੋਕਾਂ ਦੀ ਜ਼ਿੰਦਗੀ ਬਚਾਈ ਹੈ।