ਡੂਨੇਡਿਨ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਥੇ ਕੰਮ ਕਰ ਰਹੇ ਇੱਕ ਸੁਰੱਖਿਆ ਗਾਰਡ ਨੂੰ ਦਰਦ ਦੀ ਦਵਾਈ ਲੈਣ ਕਾਰਨ ਨੌਕਰੀ ਤੋਂ ਕੱਢੇ ਜਾਣ ਦੇ ਮਾਮਲੇ ਵਿੱਚ $45,000 ਤੋਂ ਵੱਧ ਮੁਆਵਜ਼ਾ ਦਿੱਤਾ ਗਿਆ ਹੈ।
ਕਾਰਲ ਸਿੰਕਲੇਅਰ-ਵਾਕਰ ਨੇ ਜੂਨ 2022 ਤੋਂ ਜੂਨ 2024 ਤੱਕ Alert Monitoring Otago (1994) Ltd ਵਿੱਚ ਪੈਟਰੋਲ ਅਫ਼ਸਰ ਵਜੋਂ ਕੰਮ ਕੀਤਾ ਸੀ। 23 ਜੂਨ 2024 ਨੂੰ ਉਸਨੂੰ ਜਨਰਲ ਮੈਨੇਜਰ ਜੈਨੀ ਬਕਿੰਗਹਾਮ ਨਾਲ ਮੀਟਿੰਗ ਲਈ ਬੁਲਾਇਆ ਗਿਆ, ਜਿੱਥੇ ਉਸਨੂੰ “ਗੰਭੀਰ ਬਦਸਲੂਕੀ” ਦੇ ਦੋਸ਼ ਹੇਠ ਤੁਰੰਤ ਨੌਕਰੀ ਤੋਂ ਕੱਢ ਦਿੱਤਾ ਗਿਆ। ਕੰਪਨੀ ਨੇ ਕਿਹਾ ਕਿ ਉਹ ਕੰਮ ਦੌਰਾਨ ਦਵਾਈ ਲੈ ਰਿਹਾ ਸੀ, ਜੋ ਉਸਦੇ ਰੁਜ਼ਗਾਰ ਸਮਝੌਤੇ ਅਨੁਸਾਰ ਮਨਾਹੀ ਸੀ ਕਿਉਂਕਿ ਉਸਨੂੰ ਡਰਾਈਵਿੰਗ ਕਰਨੀ ਪੈਂਦੀ ਸੀ। ਇਸ ਤੋਂ ਇਲਾਵਾ, ਉਸ ’ਤੇ ਕਈ ਵਾਰ ਦੇਰੀ ਨਾਲ ਆਉਣ ਅਤੇ ਸਾਈਟਾਂ ਦੀ ਜਾਂਚ ਸਬੰਧੀ ਦਸਤਾਵੇਜ਼ ਪੂਰੇ ਨਾ ਕਰਨ ਦੇ ਦੋਸ਼ ਵੀ ਲਗਾਏ ਗਏ ਸਨ।
ਇੱਕ ਰਿਪੋਰਟ ਅਨੁਸਾਰ ਮੀਟਿੰਗ ਦੌਰਾਨ ਬਹੁਤ ਘੱਟ ਗੱਲਬਾਤ ਹੋਈ ਅਤੇ ਸਿੰਕਲੇਅਰ-ਵਾਕਰ ਨੂੰ ਆਪਣਾ ਪੱਖ ਰੱਖਣ ਦਾ ਮੌਕਾ ਨਹੀਂ ਦਿੱਤਾ ਗਿਆ ਸੀ।
ਇਸ ਘਟਨਾ ਕ੍ਰਮ ਤੋਂ ਬਾਅਦ ਉਸਨੇ “ਨਾਜਾਇਜ਼ ਬਰਖਾਸਤਗੀ” ਵਿਰੁੱਧ ਨਿੱਜੀ ਸ਼ਿਕਾਇਤ ਦਰਜ ਕਰਵਾਈ, ਪਰ ਕੰਪਨੀ ਨੇ ਕੋਈ ਜਵਾਬ ਨਾ ਦਿੱਤਾ। ਇਸ ਤੋਂ ਬਾਅਦ ਮਾਮਲਾ Employment Relations Authority ਤੱਕ ਪਹੁੰਚਿਆ। ਅਥਾਰਟੀ ਦੀ ਸੁਣਵਾਈ ਦੌਰਾਨ ਕੰਪਨੀ ਨੇ ਸ਼ੁਰੂ ਵਿੱਚ ਹਿੱਸਾ ਲੈਣ ਦੀ ਗੱਲ ਕੀਤੀ ਪਰ ਬਾਅਦ ਵਿੱਚ ਨਾ ਤਾਂ ਕੋਈ ਲਿਖਤੀ ਸਬੂਤ ਦਿੱਤਾ ਅਤੇ ਨਾ ਹੀ ਸੁਣਵਾਈ ਵਿੱਚ ਹਾਜ਼ਰ ਹੋਈ। ਅਥਾਰਟੀ ਦੇ ਮੈਂਬਰ ਪੀਟਰ ਵੈਨ ਕਿਊਲਨ ਨੇ ਕਿਹਾ ਕਿ ਕੰਪਨੀ ਨੂੰ ਪੂਰੀ ਜਾਣਕਾਰੀ ਦੇ ਬਾਵਜੂਦ ਮੀਟਿੰਗ ਵਿੱਚ ਸ਼ਾਮਲ ਨਾ ਹੋਣਾ ਗੰਭੀਰ ਗੱਲ ਹੈ ਅਤੇ ਜਾਂਚ ਕੰਪਨੀ ਦੀ ਗੈਰਹਾਜ਼ਰੀ ਵਿੱਚ ਹੀ ਕੀਤੀ ਗਈ। ਅਥਾਰਟੀ ਨੇ ਫੈਸਲਾ ਦਿੱਤਾ ਕਿ ਕਰਮਚਾਰੀ ਨੂੰ ਨਿਆਂ ਸੰਗਤ ਪ੍ਰਕਿਰਿਆ ਬਿਨਾਂ ਨੌਕਰੀ ਤੋਂ ਕੱਢਿਆ ਗਿਆ ਅਤੇ ਇਹ ਬਰਖਾਸਤਗੀ ਗਲਤ ਸੀ। ਇਸ ਲਈ ਕਾਰਲ ਸਿੰਕਲੇਅਰ-ਵਾਕਰ ਨੂੰ ਤਨਖ਼ਾਹ ਦੇ ਨੁਕਸਾਨ ਅਤੇ ਮਾਨਸਿਕ ਪੀੜ੍ਹਾ ਦੇ ਬਦਲੇ $45,000 ਤੋਂ ਵੱਧ ਰਕਮ ਅਦਾ ਕਰਨ ਦਾ ਹੁਕਮ ਦਿੱਤਾ ਗਿਆ ਹੈ।