ਵਾਪਿਸ ਈਰਾਨ ਭੇਜੇ ਜਾਣ ਦੀ ਸੰਭਾਵਨਾ ਕਾਰਨ “ਡਰ” ‘ਚ ਦਿਨ ਕੱਟ ਰਹੀ ਇੱਕ 84 ਸਾਲਾ ਵਿਧਵਾ ਨੂੰ ਆਖ਼ਰਕਾਰ ਇੱਕ ਚੰਗੀ ਖ਼ਬਰ ਮਿਲੀ ਹੈ। ਦਰਅਸਲ 84 ਸਾਲਾ ਮਹਿਲਾ ਨੂੰ ਰਿਹਾਇਸ਼ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ। ਮਹਿਲਾ ਨੇ ਆਪਣੀ ਡਿਪੋਰਟੇਸ਼ਨ ਖਿਲਾਫ ਅਪੀਲ ਜਿੱਤ ਲਈ ਹੈ ਜਿਸ ਦਾ ਮਤਲਬ ਹੈ ਕਿ ਉਨ੍ਹਾਂ ਨੂੰ ਨਿਊਜ਼ੀਲੈਂਡ ਵਿੱਚ ਰਹਿਣ ਦੀ ਇਜਾਜ਼ਤ ਮਿਲ ਗਈ ਹੈ। ਇਮੀਗ੍ਰੇਸ਼ਨ ਅਤੇ ਪ੍ਰੋਟੈਕਸ਼ਨ ਟ੍ਰਿਬਿਊਨਲ ਨੇ ਆਪਣੇ ਫ਼ੈਸਲੇ ਵਿੱਚ ਕਿਹਾ ਕਿ ਉਸਦੀ ਵਾਪਸੀ ਨਾਲ ਉਹ ਆਪਣੇ ਪੁੱਤਰ ਤੋਂ ਹਮੇਸ਼ਾਂ ਲਈ ਵੱਖ ਹੋ ਜਾਵੇਗੀ। ਉਸਦਾ ਪੁੱਤਰ ਨਿਊਜ਼ੀਲੈਂਡ ਦਾ ਨਾਗਰਿਕ ਹੈ ਅਤੇ ਦੇਸ਼ ਦੀ ਰਾਸ਼ਟਰੀ ਸੁਰੱਖਿਆ ਨਾਲ ਸਬੰਧਿਤ ਕੰਮ ਕਰਦਾ ਹੈ। ਟ੍ਰਿਬਿਊਨਲ ਨੇ ਦਰਸਾਇਆ ਕਿ ਜੇ ਉਹ ਇਰਾਨ ਗਿਆ ਤਾਂ ਉਸਨੂੰ ਉੱਥੇ ਪਹੁੰਚਦੇ ਹੀ ਗ੍ਰਿਫ਼ਤਾਰ ਕੀਤਾ ਜਾ ਸਕਦਾ ਹੈ।
ਦੱਸ ਦੇਈਏ ਨਿਊਜ਼ੀਲੈਂਡ ਦੀ ਸਰਕਾਰ ਨੇ ਇਰਾਨ ਲਈ ਸਭ ਤੋਂ ਉੱਚੇ ਪੱਧਰ ਦੀ ਯਾਤਰਾ ਚਿਤਾਵਨੀ ਜਾਰੀ ਕੀਤੀ ਹੋਈ ਹੈ — ਯਾਨੀ ਕਿ ਬਿਲਕੁਲ ਯਾਤਰਾ ਨਾ ਕਰੋ — ਕਿਉਂਕਿ ਉੱਥੇ ਗ੍ਰਿਫ਼ਤਾਰੀ, ਹਿੰਸਕ ਅਸ਼ਾਂਤੀ ਅਤੇ ਅਸਥਿਰ ਸੁਰੱਖਿਆ ਹਾਲਾਤਾਂ ਦੇ ਬਹੁਤ ਵੱਡੇ ਖਤਰੇ ਹਨ। ਟ੍ਰਿਬਿਊਨਲ ਨੇ ਮੰਨਿਆ ਕਿ ਉਸਨੂੰ ਇਰਾਨ ਵਾਪਸ ਭੇਜਣਾ ਅਨਿਆਂਪੂਰਨ ਅਤੇ ਬਹੁਤ ਹੀ ਕਠੋਰ ਹੋਵੇਗਾ।