ਨਿਊਜ਼ੀਲੈਂਡ ਦੇ Waikato Hospital ਵਿੱਚ ਇੱਕ 79 ਸਾਲਾ ਡਾਇਬਟੀਜ਼ ਮਰੀਜ਼ ਦੀ ਮੌਤ ਦੇ ਮਾਮਲੇ ਵਿੱਚ ਗੰਭੀਰ ਲਾਪਰਵਾਹੀ ਸਾਹਮਣੇ ਆਈ ਹੈ। ਇਸ ਸਬੰਧੀ Health and Disability Commissioner ਵੱਲੋਂ ਜਾਰੀ ਕੀਤੀ ਗਈ ਜਾਂਚ ਰਿਪੋਰਟ ਵਿੱਚ ਹਸਪਤਾਲ ਦੀ ਸੇਵਾ ਪ੍ਰਣਾਲੀ ‘ਤੇ ਸਖ਼ਤ ਟਿੱਪਣੀ ਕੀਤੀ ਗਈ ਹੈ। ਰਿਪੋਰਟ ਅਨੁਸਾਰ ਮਰੀਜ਼ ਨੂੰ ਦਿਲ ਦਾ ਦੌਰਾ ਪੈਣ ਤੋਂ ਬਾਅਦ ਕਾਰਡਿਏਕ ਕੇਅਰ ਯੂਨਿਟ ਵਿੱਚ ਦਾਖਲ ਕੀਤਾ ਗਿਆ ਸੀ। ਰਾਤ ਕਰੀਬ 9:30 ਵਜੇ ਉਸਦੀ ਬਲੱਡ ਸ਼ੂਗਰ 4.4 mmol/L ਤੱਕ ਘਟ ਗਈ ਸੀ ਅਤੇ ਉਸਨੇ ਨਰਸ ਨੂੰ ਦੱਸਿਆ ਕਿ ਉਹ ਚਿੰਤਤ ਮਹਿਸੂਸ ਕਰ ਰਿਹਾ ਹੈ।
ਨਰਸ ਉਸ ਲਈ ਤੁਰੰਤ ਸੈਂਡਵਿਚ ਲੈਣ ਗਈ ਪਰ ਵਾਰਡ ਦੇ ਫ੍ਰਿਜ ਵਿੱਚ ਖਾਣਾ ਨਾ ਹੋਣ ਕਾਰਨ ਉਸਨੂੰ ਦੂਜੇ ਵਾਰਡ ਜਾਣਾ ਪਿਆ। ਕਰੀਬ 10–15 ਮਿੰਟ ਬਾਅਦ ਜਦੋਂ ਉਹ ਵਾਪਸ ਆਈ ਤਾਂ ਮਰੀਜ਼ ਆਪਣੇ ਕਮਰੇ ਵਿੱਚ ਨਹੀਂ ਸੀ। ਇਸ ਕਰਕੇ ਸੈਂਡਵਿਚ ਬਿਸਤਰ ਦੇ ਕੋਲ ਰੱਖ ਦਿੱਤਾ ਗਿਆ।
ਕੁਝ ਸਮੇਂ ਬਾਅਦ ਵੀ ਮਰੀਜ਼ ਵਾਪਸ ਨਾ ਆਇਆ, ਪਰ ਲਗਭਗ 55 ਮਿੰਟ ਤੱਕ ਉਸਦੀ ਖੋਜ ਸ਼ੁਰੂ ਨਹੀਂ ਕੀਤੀ ਗਈ। ਸੀਸੀਟੀਵੀ ਫੁਟੇਜ ਵਿੱਚ ਦਿਖਾਈ ਦਿੱਤਾ ਕਿ ਮਰੀਜ਼ ਕਮਰੇ ਤੋਂ ਨਿਕਲ ਕੇ ਸਨੈਕ ਮਸ਼ੀਨ ਵੱਲ ਗਿਆ ਸੀ ਅਤੇ ਨਰਸਿੰਗ ਸਟੇਸ਼ਨ ਦੇ ਕੋਲੋਂ ਲੰਘਿਆ। ਇਸ ਦੌਰਾਨ ਸੱਤ ਸਟਾਫ਼ ਮੈਂਬਰ ਉਸਦੇ ਕੋਲੋਂ ਗੁਜ਼ਰੇ ਪਰ ਕਿਸੇ ਨੇ ਵੀ ਉਸਦੀ ਹਾਲਤ ਬਾਰੇ ਪੁੱਛਗਿੱਛ ਨਹੀਂ ਕੀਤੀ।
ਬਾਅਦ ਵਿੱਚ ਉਹ ਫਾਇਰ ਏਗਜ਼ਿਟ ਰਾਹੀਂ ਬਾਹਰ ਨਿਕਲ ਗਿਆ ਅਤੇ ਹਸਪਤਾਲ ਦੀ ਪੌੜੀ ਵਾਲੀ ਜਗ੍ਹਾ ‘ਤੇ ਬੇਹੋਸ਼ ਮਿਲਿਆ। ਇੱਕ ਡਾਕਟਰ ਨੇ ਉਸਨੂੰ ਦੇਖ ਕੇ ਤੁਰੰਤ ਮਦਦ ਮੰਗੀ ਅਤੇ ਬਚਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਕਾਮਯਾਬ ਨਹੀਂ ਹੋ ਸਕੇ। ਉਸ ਵੇਲੇ ਤੱਕ ਮਰੀਜ਼ ਦੀ ਬਲੱਡ ਸ਼ੂਗਰ ਸਿਰਫ 1.8 mmol/L ਰਹਿ ਗਈ ਸੀ।
ਇਸ ਘਟਨਾ ਤੋਂ ਬਾਅਦ ਹਸਪਤਾਲ ਪ੍ਰਬੰਧਨ ਨੇ ਨਵੇਂ ਨਿਯਮ ਲਾਗੂ ਕੀਤੇ ਹਨ ਅਤੇ ਹੁਣ ਇਹ ਯਕੀਨੀ ਬਣਾਇਆ ਜਾਂਦਾ ਹੈ ਕਿ ਵਾਰਡ ਦੇ ਫ੍ਰਿਜ ਵਿੱਚ ਡਾਇਬਟੀਜ਼ ਮਰੀਜ਼ਾਂ ਲਈ ਹਮੇਸ਼ਾਂ ਸਨੈਕਸ ਮੌਜੂਦ ਰਹਿਣ। ਹਾਲਾਂਕਿ ਮਰੀਜ਼ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਹਸਪਤਾਲ ਮਰੀਜ਼ ਦੀ ਸੁਰੱਖਿਆ ਯਕੀਨੀ ਬਣਾਉਣ ਵਿੱਚ ਨਾਕਾਮ ਰਿਹਾ ਅਤੇ ਘਟਨਾ ਬਾਰੇ ਉਨ੍ਹਾਂ ਨਾਲ ਢੰਗ ਨਾਲ ਸੰਚਾਰ ਵੀ ਨਹੀਂ ਕੀਤਾ ਗਿਆ।