ਨਿਊਜ਼ੀਲੈਂਡ ਵੱਸਦੇ ਲੋਕਾਂ ਲਈ ਇੱਕ ਰਾਹਤ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ ਦੇਸ਼ ‘ਚ ਡਰਾਈਵਰ ਲਾਇਸੈਂਸ, ਫਿਟਨੈਸ ਵਾਰੰਟ ਅਤੇ ਫਿਟਨੈਸ ਸਰਟੀਫਿਕੇਟ ਨੂੰ ਵਾਹਨ ਚਾਲਕਾਂ ਦੇ ਫ਼ੋਨਾਂ ‘ਚ ਰੱਖਣ ਦਾ ਰਾਹ ਖੋਲ੍ਹਣ ਵਾਲਾ ਬਿੱਲ ਸੰਸਦ ਵਿੱਚ ਪੇਸ਼ ਕੀਤਾ ਗਿਆ ਹੈ। ਯਾਨੀ ਕਿ ਜੇਕਰ ਇਹ ਬਿੱਲ ਪਾਸ ਹੋ ਜਾਂਦਾ ਹੈ ਤਾਂ ਡਰਾਈਵਰਾਂ ਨੂੰ ਆਪਣੇ ਨਾਲ ਹਮੇਸ਼ਾਂ ਫਿਜ਼ਿਕਲ ਲਾਇਸੈਂਸ ਰੱਖਣਾ ਲਾਜ਼ਮੀ ਨਹੋ ਹੋਵੇਗਾ ਉਹ ਫੋਨ ਰਾਹੀਂ ਵੀ ਇਸ ਸਬੰਧੀ ਵਿਕਲਪ ਚੁਣ ਸਕਦੇ ਹਨ। ਨਵੀਂ ਵਿਵਸਥਾ ਤਹਿਤ ਕੀਵੀਆਂ ਕੋਲ ਆਪਣਾ ਲਾਇਸੈਂਸ ਆਪਣੇ ਬਟੂਏ ਵਿੱਚ ਜਾਂ ਆਪਣੇ ਫ਼ੋਨਾਂ ‘ਤੇ ਰੱਖਣ ਦਾ ਵਿਕਲਪ ਹੋਵੇਗਾ। ਮੌਜੂਦਾ ਕਾਨੂੰਨਾਂ ਦੇ ਤਹਿਤ, ਡਰਾਈਵਰਾਂ ਨੂੰ ਵਾਹਨ ਚਲਾਉਂਦੇ ਸਮੇਂ ਆਪਣਾ ਫਿਜ਼ਿਕਲ ਲਾਇਸੈਂਸ ਆਪਣੇ ਨਾਲ ਰੱਖਣਾ ਲਾਜ਼ਮੀ ਹੈ।
ਇਸ ਸਬੰਧੀ ਗੱਲਬਾਤ ਕਰਦਿਆਂ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਕਿਹਾ ਸੀ ਕਿ ਡਿਜੀਟਲ ਡਰਾਈਵਿੰਗ ਲਾਇਸੈਂਸ ਇੱਕ “ਆਮ ਸਮਝ ਵਾਲੀ ਗੱਲ” ਹੈ। “ਅਸੀਂ ਸਾਰੇ ਦੇਸ਼ ਭਰ ਵਿੱਚ ਉਤਪਾਦਾਂ ਅਤੇ ਵੱਖੋ-ਵੱਖ ਸੇਵਾਵਾਂ ਲਈ ਡਿਜੀਟਲ ਵਾਲਿਟ ਦੀ ਵਰਤੋਂ ਕਰ ਰਹੇ ਹਾਂ ਤਾਂ ਡਿਜੀਟਲ ਡਰਾਈਵਿੰਗ ਲਾਇਸੈਂਸ ਕਿਉਂ ਨਹੀਂ ? ਟਰਾਂਸਪੋਰਟ ਮੰਤਰੀ ਕ੍ਰਿਸ ਬਿਸ਼ਪ ਨੇ ਦੱਸਿਆ ਸੀ ਕਿ ਕੀਵੀਆਂ ਲਈ ਆਪਣੇ ਫ਼ੋਨਾਂ ‘ਤੇ ਡਿਜੀਟਲ ਡਰਾਈਵਿੰਗ ਲਾਇਸੈਂਸ ਰੱਖਣ ਦਾ ਵਿਕਲਪ ਕੁਝ ਅਜਿਹਾ ਸੀ ਜਿਸ ਲਈ ਬਹੁਤ ਸਾਰੇ ਲੋਕ ਉਤਸੁਕ ਸਨ। ਉਨ੍ਹਾਂ ਕਿਹਾ ਕਿ ਡਿਜੀਟਲ ਲਾਇਸੈਂਸਾਂ ਨੂੰ ਲਾਗੂ ਕਰਨ ਵਿੱਚ ਸਮਾਂ ਲੱਗੇਗਾ, ਪਰ “ਨਿਊਜ਼ੀਲੈਂਡ ਡਿਜੀਟਲ ਡਰਾਈਵਿੰਗ ਲਾਇਸੈਂਸ ਲਾਗੂ ਕਰਨ ਵਾਲੇ ਦੁਨੀਆ ਦੇ ਪਹਿਲੇ ਦੇਸ਼ਾਂ ਵਿੱਚੋਂ ਇੱਕ ਹੋਵੇਗਾ, ਸਾਨੂੰ ਇਹ ਯਕੀਨੀ ਬਣਾਉਣ ਦੀ ਜ਼ਰੂਰਤ ਹੈ ਕਿ ਅਸੀਂ ਇਸਨੂੰ ਸਹੀ ਢੰਗ ਨਾਲ ਲਾਗੂ ਕਰੀਏ। ਡਿਜੀਟਲ ਲਾਇਸੈਂਸ ਪਹਿਲਾਂ ਹੀ ਡੈਨਮਾਰਕ, ਆਈਸਲੈਂਡ, ਨਾਰਵੇ ਅਤੇ ਕਈ ਅਮਰੀਕੀ ਰਾਜਾਂ ਵਿੱਚ ਉਪਲਬਧ ਹਨ।