ਤਰਨਾਕੀ: ਨਿਊਜ਼ੀਲੈਂਡ ਦੇ ਤਰਨਾਕੀ ਖੇਤਰ ਵਿੱਚ ਸ਼ਨੀਵਾਰ ਤੜਕੇ 5.3 ਤੀਬਰਤਾ ਦੇ ਭੂਚਾਲ ਨੇ ਲੋਕਾਂ ਨੂੰ ਹਿਲਾ ਕੇ ਰੱਖ ਦਿੱਤਾ। ਜਿਓਨੈੱਟ (GeoNet) ਮੁਤਾਬਿਕ ਭੂਚਾਲ ਸਵੇਰੇ ਕਰੀਬ 3 ਵਜੇ ਨਿਊ ਪਲਾਇਮਥ ਤੋਂ 25 ਕਿਲੋਮੀਟਰ ਪੂਰਬ ਵੱਲ ਆਇਆ। ਭੂਚਾਲ ਦੀ ਗਹਿਰਾਈ ਲਗਭਗ 11 ਕਿਲੋਮੀਟਰ ਸੀ। ਭੂਚਾਲ ਦੇ ਝਟਕਿਆਂ ਨੂੰ “ਤੇਜ਼” ਦੱਸਿਆ ਗਿਆ ਅਤੇ 7,000 ਤੋਂ ਵੱਧ ਲੋਕਾਂ ਨੇ ਇਸ ਨੂੰ ਮਹਿਸੂਸ ਕਰਨ ਦੀ ਰਿਪੋਰਟ ਕੀਤੀ।
ਸੋਸ਼ਲ ਮੀਡੀਆ ’ਤੇ ਲੋਕਾਂ ਨੇ ਭੂਚਾਲ ਦੀ ਤੀਬਰਤਾ ਬਾਰੇ ਆਪਣੇ ਤਜਰਬੇ ਸਾਂਝੇ ਕੀਤੇ। ਇੱਕ ਵਿਅਕਤੀ ਨੇ ਕਿਹਾ, “ਮੈਂ ਸੁੱਤਾ ਹੋਇਆ ਸੀ ਅਤੇ ਮਹਿਸੂਸ ਹੋਇਆ ਜਿਵੇਂ ਕਿਸੇ ਨੇ ਮੈਨੂੰ ਚੁੱਕ ਕੇ ਬੁਰੀ ਤਰ੍ਹਾਂ ਹਿਲਾ ਦਿੱਤਾ ਹੋਵੇ। ਕਈ ਚੀਜ਼ਾਂ ਹੇਠਾਂ ਡਿੱਗ ਪਈਆਂ। ਅਜੇ ਵੀ ਸਰੀਰ ਕੰਬ ਰਿਹਾ ਹੈ।”
ਇੱਕ ਹੋਰ ਵਿਅਕਤੀ ਨੇ ਲਿਖਿਆ, “ਇਹ ਜ਼ਿੰਦਗੀ ਦੇ ਸਭ ਤੋਂ ਡਰਾਉਣੇ ਤਜਰਬਿਆਂ ਵਿੱਚੋਂ ਇੱਕ ਸੀ।”