ਨਿਊਜ਼ੀਲੈਂਡ ਦੇ Wellington Region ਵਿੱਚ ਭਾਰੀ ਮੀਂਹ ਕਾਰਨ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਲਗਾਤਾਰ ਤੇਜ਼ ਮੀਂਹ ਨਾਲ ਖੇਤਰ ਵਿੱਚ ਹੜ੍ਹ ਅਤੇ ਹੋਰ ਖਤਰੇ ਪੈਦਾ ਹੋ ਗਏ ਹਨ। Wairarapa ਅਤੇ ਵੇਲਿੰਗਟਨ ਲਈ ਜਾਰੀ ਭਾਰੀ ਮੀਂਹ ਦੀ ਚਿਤਾਵਨੀ ਨੂੰ ਵਧਾ ਕੇ ‘ਰੇਡ ਅਲਰਟ’ ਕਰ ਦਿੱਤਾ ਗਿਆ ਹੈ, ਜੋ ਮੰਗਲਵਾਰ ਰਾਤ ਤੱਕ ਲਾਗੂ ਰਹੇਗੀ। ਮੌਸਮ ਵਿਭਾਗ MetService ਮੁਤਾਬਿਕ ਇਹ ਮੀਂਹ ਜਾਨ ਲਈ ਖਤਰਾ ਬਣ ਸਕਦਾ ਹੈ, ਕਿਉਂਕਿ ਦਰਿਆਵਾਂ ਦੇ ਪਾਣੀ ਦੇ ਲੈਵਲ ਵੱਧਣ, ਭਾਰੀ ਹੜ੍ਹ ਅਤੇ ਲੈਂਡਸਲਾਈਡ ਦਾ ਖਤਰਾ ਹੈ।
Wellington Civil Defence Emergency Management (WCEM) ਨੇ ਦੱਸਿਆ ਕਿ ਐਮਰਜੈਂਸੀ ਦਾ ਐਲਾਨ ਜਾਰੀ ਸਖ਼ਤ ਮੌਸਮੀ ਹਾਲਾਤਾਂ, ਹੜ੍ਹ ਅਤੇ ਬੁਨਿਆਦੀ ਢਾਂਚੇ ‘ਤੇ ਪਏ ਅਸਰ ਨਾਲ ਨਜਿੱਠਣ ਲਈ ਕੀਤਾ ਗਿਆ ਹੈ। ਇਸ ਐਲਾਨ ਨਾਲ ਰਾਹਤ ਟੀਮਾਂ ਨੂੰ ਵੱਧ ਅਧਿਕਾਰ ਅਤੇ ਬਿਹਤਰ ਸਹਿਯੋਗ ਮਿਲੇਗਾ, ਜਿਸ ਨਾਲ ਲੋਕਾਂ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾ ਸਕੇਗੀ, ਜ਼ਰੂਰਤ ਪੈਣ ‘ਤੇ ਘਰ ਖਾਲੀ ਕਰਵਾਉਣ ਦੀ ਕਾਰਵਾਈ ਹੋ ਸਕੇਗੀ ਅਤੇ ਨੁਕਸਾਨ ਨੂੰ ਕਾਬੂ ਕੀਤਾ ਜਾ ਸਕੇਗਾ।
ਗਰੁੱਪ ਕੰਟਰੋਲਰ ਕੈਰੀ ਮੈਕੈਂਜ਼ੀ ਨੇ ਕਿਹਾ ਕਿ ਸਭ ਤੋਂ ਵੱਡੀ ਤਰਜੀਹ ਲੋਕਾਂ ਦੀ ਜ਼ਿੰਦਗੀ ਬਚਾਉਣਾ ਹੈ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਸਥਿਤੀ ਨੂੰ ਗੰਭੀਰਤਾ ਨਾਲ ਲੈਣ, ਸੁਰੱਖਿਆ ਸੰਬੰਧੀ ਹਦਾਇਤਾਂ ਦੀ ਪਾਲਣਾ ਕਰਨ ਅਤੇ ਖਾਸ ਕਰਕੇ ਉਹ ਲੋਕ ਜੋ ਨੀਵੇਂ ਇਲਾਕਿਆਂ ਜਾਂ ਹੜ੍ਹ-ਪ੍ਰਭਾਵਿਤ ਖੇਤਰਾਂ ਵਿੱਚ ਰਹਿੰਦੇ ਹਨ, ਸਮੇਂ ਸਿਰ ਕਦਮ ਚੁੱਕਣ।