ਇਮੀਗ੍ਰੇਸ਼ਨ ਐਡਵਾਈਜ਼ਰਾਂ ਦੀ ਗਲਤੀ ਤੁਹਾਡੀ ਜਿੰਦਗੀ ਕਿਵੇਂ ਬਰਬਾਦ ਕਰ ਸਕਦੀ ਹੈ ਇਸ ਦੀ ਇੱਕ ਉਦਾਹਰਣ ਸਾਹਮਣੇ ਆਈ ਹੈ ਦਰਅਸਲ ਰੋਟੋਰੂਆ ਦੇ ਲਾਇਸੰਸ ਪ੍ਰਾਪਤ ਇਮੀਗ੍ਰੇਸ਼ਨ ਐਡਵਾਈਜ਼ਰ ਫਿਲਿਪ ਲੈਸਲੀ ਵ੍ਹੇਰੇਕੂਰਾ ਦੀ ਲਾਪਰਵਾਹੀ ਕਾਰਨ ਇੱਕ ਫਿਲੀਪੀਨੀ ਕਰਮਚਾਰੀ ਨੂੰ ਆਪਣੀ ਨੌਕਰੀ, ਘਰ ਤੇ ਸਥਿਰ ਜੀਵਨ ਛੱਡ ਕੇ ਨਿਊਜ਼ੀਲੈਂਡ ਤੋਂ ਵਾਪਸ ਜਾਣਾ ਪਿਆ ਹੈ। ਰਿਪੋਰਟਾਂ ਮੁਤਾਬਿਕ ਫਿਲੀਪੀਨੀ ਕਰਮਚਾਰੀ ਨੇ ਰਿਹਾਇਸ਼ ਲਈ ਅਰਜ਼ੀ ਦਿੱਤੀ ਸੀ ਪਰ ਵ੍ਹੇਰੇਕੂਰਾ ਨੇ ਉਸਦੇ ਵਾਰ-ਵਾਰ ਕਹਿਣ ਦੇ ਬਾਵਜੂਦ ਉਸਦੀ ਸਾਥੀ ਨੂੰ ਅਰਜ਼ੀ ਵਿੱਚੋਂ ਹਟਾਇਆ ਨਹੀਂ। ਇਸ ਕਾਰਨ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ ਨੇ ਮਈ 2024 ਵਿੱਚ ਅਰਜ਼ੀ ਰੱਦ ਕਰ ਦਿੱਤੀ ਕਿ ਉਨ੍ਹਾਂ ਦੇ ਰਿਸ਼ਤੇ ਦਾ ਸਬੂਤ ਪੱਕਾ ਨਹੀਂ ਸੀ।
ਇਮੀਗ੍ਰੇਸ਼ਨ ਐਡਵਾਈਜ਼ਰਜ਼ ਕਮਪਲੇਂਟਸ ਐਂਡ ਡਿਸ਼ਪਲਿਨਰੀ ਟ੍ਰਿਬਿਊਨਲ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਐਡਵਾਈਜ਼ਰ ਨੂੰ ਤਿੰਨ ਵਾਰ ਸਪਸ਼ਟ ਤੌਰ ‘ਤੇ ਕਿਹਾ ਗਿਆ ਕਿ ਸਾਥੀ ਨੂੰ ਅਰਜ਼ੀ ਤੋਂ ਹਟਾਇਆ ਜਾਵੇ, ਪਰ ਉਸ ਨੇ ਅਜਿਹਾ ਨਹੀਂ ਕੀਤਾ ਜਿਸ ਕਾਰਨ ਫਿਲੀਪੀਨੀ ਕਰਮਚਾਰੀ ਨੂੰ ਇਸਦਾ ਨਤੀਜਾ ਭੁਗਤਣਾ ਪਿਆ। ਪਰ ਇੱਥੇ ਇੱਕ ਰਾਹਤ ਵਾਲੀ ਗੱਲ ਹੈ ਕਿ ਹਨੀ ਰਸਾਲਨ, ਜੋ ਕਿ NZ Immigration Support Services ਦੀ ਡਾਇਰੈਕਟਰ ਹੈ, ਨੇ ਇਮੀਗ੍ਰੇਸ਼ਨ ਐਡਵਾਈਜ਼ਰ ਅਥਾਰਟੀ ਕੋਲ ਸ਼ਿਕਾਇਤ ਕੀਤੀ ਸੀ। ਹਨੀ ਰਸਾਲਨ ਦੀ ਮਦਦ ਨਾਲ ਕੀਤੀ ਅਪੀਲ ਰਾਂਹੀ ਨਿਊਜੀਲੈਂਡ ਛੱਡਕੇ ਗਏ ਕਰਮਚਾਰੀ ਨੂੰ ਇੱਥੇ ਪੱਕੀ ਰਿਹਾਇਸ਼ ਮਿਲ ਗਈ ਅਤੇ ਬਾਅਦ ਵਿੱਚ ਉਸਦੀ ਸਾਥੀ ਨੂੰ ਵੀ।