ਵੈਲਿੰਗਟਨ ਦੇ ਮਿਰਾਮਾਰ ਉਪਨਗਰ ਵਿੱਚ ਵੀਰਵਾਰ ਸਵੇਰੇ ਜਲਦੀ ਇੱਕ ram-raid ਘਟਨਾ ਤੋਂ ਬਾਅਦ ਚਾਰ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਨੂੰ ਸਵੇਰੇ ਲਗਭਗ 2:10 ਵਜੇ ਤੌਹਿਨੂ ਰੋਡ ‘ਤੇ ਸਥਿਤ ਇੱਕ ਦੁਕਾਨ ਤੋਂ ਕਈ ਅਲਾਰਮ ਵੱਜਣ ਦੀ ਸੂਚਨਾ ਮਿਲੀ। ਮੌਕੇ ‘ਤੇ ਪਹੁੰਚਣ ‘ਤੇ ਦੁਕਾਨ ਦਾ ਮੁੱਖ ਦਰਵਾਜ਼ਾ ਤੋੜਿਆ ਹੋਇਆ ਮਿਲਿਆ ਅਤੇ ਇੱਕ ਕਾਰ ਵੀ ਉੱਥੇ ਛੱਡੀ ਗਈ ਸੀ। ਪੁਲਿਸ ਦੇ ਡੌਗ ਯੂਨਿਟ ਨੇ ਸ਼ੱਕੀ ਲੋਕਾਂ ਦਾ ਪਿੱਛਾ ਕਰਦੇ ਹੋਏ ਮਿਰਾਮਾਰ ਦੀ ਬੂਥ ਸਟਰੀਟ ‘ਤੇ ਇੱਕ ਘਰ ਤੱਕ ਪਹੁੰਚ ਕੀਤੀ। ਉੱਥੇ ਅਧਿਕਾਰੀਆਂ ਨੂੰ ਨੌਜਵਾਨ ਮਿਲੇ, ਇੱਕ ਚੋਰੀਸ਼ੁਦਾ ਕਾਰ ਅਤੇ ਦੁਕਾਨ ਤੋਂ ਚੋਰੀ ਕੀਤੀ ਗਈ ਵੱਡੀ ਮਾਤਰਾ ਵਿੱਚ ਸ਼ਰਾਬ ਵੀ ਬਰਾਮਦ ਹੋਈ।
ਵੈਲਿੰਗਟਨ ਕਮਾਂਡਰ ਇੰਸਪੈਕਟਰ ਡੀਨ ਸਿਲਵੇਸਟਰ ਨੇ ਕਿਹਾ ਕਿ ਉਹ ਖੁਸ਼ ਹਨ ਕਿ ਦੋਸ਼ੀਆਂ ਦੀ ਪਛਾਣ ਇੰਨੀ ਜਲਦੀ ਕਰ ਲਈ ਗਈ। ਗ੍ਰਿਫ਼ਤਾਰ ਕੀਤੇ ਗਏ ਨੌਜਵਾਨਾਂ ਵਿੱਚ ਇੱਕ 16 ਸਾਲ ਦਾ, ਦੋ 17 ਸਾਲ ਦੇ ਅਤੇ ਇੱਕ 19 ਸਾਲ ਦਾ ਮੁੰਡਾ ਸ਼ਾਮਿਲ ਹੈ। ਇਹਨਾਂ ਨੂੰ ਵੈਲਿੰਗਟਨ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਅਤੇ ਇਸ ਮਹੀਨੇ ਦੇ ਅੰਤ ਵਿੱਚ ਮੁੜ ਪੇਸ਼ੀ ਲਈ ਜ਼ਮਾਨਤ ‘ਤੇ ਰਿਹਾ ਕਰ ਦਿੱਤਾ ਗਿਆ ਹੈ।