ਨਿਊਜ਼ੀਲੈਂਡ ਦੇ ਇਨਵਰਕਾਰਗਿਲ ਸ਼ਹਿਰ ਵਿੱਚ ਡੇਟਿੰਗ ਐਪਸ ਰਾਹੀਂ ਲੋਕਾਂ ਨੂੰ ਫਸਾ ਕੇ ਉਨ੍ਹਾਂ ’ਤੇ ਹਿੰਸਕ ਹਮਲੇ ਕਰਨ ਦੇ ਮਾਮਲੇ ਵਿੱਚ ਪੁਲਿਸ ਨੇ ਚਾਰ ਨਾਬਾਲਗਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਮੁਤਾਬਿਕ ਸ਼ਹਿਰ ਵਿੱਚ ਚਾਰ ਵੱਖ-ਵੱਖ ਘਟਨਾਵਾਂ ਦੌਰਾਨ ਡੇਟਿੰਗ ਐਪਸ ਦੀ ਵਰਤੋਂ ਕਰਕੇ ਪੀੜਤਾਂ ਨੂੰ ਨਿਸ਼ਚਿਤ ਥਾਵਾਂ ’ਤੇ ਬੁਲਾਇਆ ਗਿਆ, ਜਿੱਥੇ ਉਨ੍ਹਾਂ ’ਤੇ ਬੇਰਹਿਮੀ ਨਾਲ ਹਮਲੇ ਕੀਤੇ ਗਏ। ਗ੍ਰਿਫ਼ਤਾਰ ਕੀਤੇ ਗਏ ਨੌਜਵਾਨਾਂ ਵਿੱਚ ਦੋ 15 ਸਾਲਾ ਅਤੇ ਦੋ 16 ਸਾਲਾ ਲੜਕੇ ਸ਼ਾਮਿਲ ਹਨ। ਚਾਰਾਂ ’ਤੇ aggravated burglary ਦੇ ਦੋਸ਼ ਲਗਾਏ ਗਏ ਹਨ। ਪੁਲਿਸ ਨੇ ਕਿਹਾ ਹੈ ਕਿ ਮਾਮਲੇ ਵਿੱਚ ਹੋਰ ਗ੍ਰਿਫ਼ਤਾਰੀਆਂ ਅਤੇ ਦੋਸ਼ ਵੀ ਲੱਗ ਸਕਦੇ ਹਨ। ਸਾਰੇ ਦੋਸ਼ੀ ਇਨਵਰਕਾਰਗਿਲ ਯੂਥ ਕੋਰਟ ਵਿੱਚ ਪੇਸ਼ ਹੋਣਗੇ।
ਇਨ੍ਹਾਂ ਹਮਲਿਆਂ ਵਿੱਚ 8 ਮਈ ਨੂੰ ਇੱਕ ਵਿਅਕਤੀ ਨੂੰ ਗੰਭੀਰ ਜ਼ਖ਼ਮਾਂ ਕਾਰਨ ਕਰਿਟੀਕਲ ਕੇਅਰ ਵਿੱਚ ਦਾਖ਼ਲ ਕਰਵਾਉਣਾ ਪਿਆ, ਜਦਕਿ 10 ਮਈ ਨੂੰ Queen’s Park ਇਲਾਕੇ ਵਿੱਚ ਹੋਏ ਹਮਲੇ ਦੌਰਾਨ ਇੱਕ ਹੋਰ ਵਿਅਕਤੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਇਆ।
ਸਾਊਥਲੈਂਡ ਖੇਤਰ ਦੇ ਪ੍ਰੀਵੇਂਸ਼ਨ ਮੈਨੇਜਰ ਐਕਟਿੰਗ ਇੰਸਪੈਕਟਰ ਮੇਲ ਰਾਬਰਟਸਨ ਨੇ ਕਿਹਾ ਕਿ ਇਹ ਹਮਲੇ “ਸੋਚੇ-ਸਮਝੇ, ਯੋਜਨਾਬੱਧ ਅਤੇ ਬਹੁਤ ਖ਼ਤਰਨਾਕ” ਸਨ। ਉਨ੍ਹਾਂ ਕਿਹਾ ਕਿ ਹਮਲਿਆਂ ਵਿੱਚ ਵਰਤੀ ਗਈ ਹਿੰਸਾ ਚਿੰਤਾਜਨਕ ਹੈ ਪਰ ਖੁਸ਼ਕਿਸਮਤੀ ਹੈ ਕਿ ਕੋਈ ਜਾਨ ਨਹੀਂ ਗਈ।
ਰਾਬਰਟਸਨ ਨੇ ਸੋਸ਼ਲ ਮੀਡੀਆ ਅਤੇ ਆਨਲਾਈਨ ਟ੍ਰੈਂਡਜ਼ ’ਤੇ ਵੀ ਚਿੰਤਾ ਜਤਾਈ, ਜਿਹੜੇ ਅਜਿਹੇ ਵਿਹਾਰ ਨੂੰ ਉਤਸ਼ਾਹਿਤ ਅਤੇ ਮਹਿਮਾ ਮੰਡਿਤ ਕਰਦੇ ਹਨ। ਪੁਲਿਸ ਨੇ ਲੋਕਾਂ ਨੂੰ ਹਮਲਿਆਂ ਨਾਲ ਜੁੜੀਆਂ ਹਿੰਸਕ ਵੀਡੀਓਜ਼ ਸ਼ੇਅਰ ਨਾ ਕਰਨ ਦੀ ਅਪੀਲ ਵੀ ਕੀਤੀ ਹੈ।
ਉਨ੍ਹਾਂ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਜੇ ਕੋਈ ਇਸਨੂੰ ਮਜ਼ਾਕ ਜਾਂ ਟ੍ਰੈਂਡ ਸਮਝਦਾ ਹੈ ਤਾਂ ਉਹ ਗਲਤ ਹੈ, ਕਿਉਂਕਿ ਅਜਿਹੇ ਕੰਮਾਂ ਦੇ ਗੰਭੀਰ ਨਤੀਜੇ ਹੁੰਦੇ ਹਨ ਅਤੇ ਪੁਲਿਸ ਹਰ ਦੋਸ਼ੀ ਨੂੰ ਕਾਨੂੰਨ ਅੱਗੇ ਲਿਆਵੇਗੀ।
ਇਸ ਘਟਨਾ ’ਤੇ ਇਨਵਰਕਾਰਗਿਲ ਦੇ ਮੇਅਰ ਟੌਮ ਕੈਂਪਬੈਲ ਨੇ ਕਿਹਾ ਕਿ ਸ਼ਹਿਰ ਦੇ ਲੋਕ ਇਨ੍ਹਾਂ ਹਮਲਿਆਂ ਕਾਰਨ ਹੱਕੇ-ਬੱਕੇ ਹਨ। ਉਨ੍ਹਾਂ ਕਿਹਾ ਕਿ ਇਨਵਰਕਾਰਗਿਲ ਆਮ ਤੌਰ ’ਤੇ ਨਿਊਜ਼ੀਲੈਂਡ ਦੇ ਸਭ ਤੋਂ ਸੁਰੱਖਿਅਤ ਸ਼ਹਿਰਾਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ ਅਤੇ ਲੋਕ ਅਜਿਹੀ ਗੁੰਡਾਗਰਦੀ ਦੇ ਆਦੀ ਨਹੀਂ ਹਨ।