ਨਿਊਜ਼ੀਲੈਂਡ ਵਿੱਚ ਪੈਟਰੋਲ ਅਤੇ ਡੀਜ਼ਲ ਦੀ ਘਾਟ ਨੂੰ ਲੈ ਕੇ ਚਿੰਤਾ ਕਰਨ ਦੀ ਲੋੜ ਨਹੀਂ ਹੈ। ਸਰਕਾਰੀ ਸੂਤਰਾਂ ਨੇ ਦੱਸਿਆ ਹੈ ਕਿ ਭਾਵੇਂ ਹਾਲੀਆ ਦਿਨਾਂ ਵਿੱਚ ਫਿਊਲ ਸਟਾਕ ਵਿੱਚ ਹਲਕੀ ਕਮੀ ਦਰਜ ਕੀਤੀ ਗਈ ਹੈ, ਪਰ ਦੇਸ਼ ਦੀ ਸਪਲਾਈ ਪ੍ਰਣਾਲੀ ਪੂਰੀ ਤਰ੍ਹਾਂ ਸਥਿਰ ਹੈ। ਮਿਨਿਸਟਰੀ ਆਫ ਬਿਜ਼ਨਸ, ਇਨੋਵੇਸ਼ਨ ਐਂਡ ਇਮਪਲਾਇਮੈਂਟ (MBIE) ਦੇ ਅਨੁਸਾਰ, ਇਹ ਘਟਾਅ ਸਧਾਰਣ ਉਤਾਰ-ਚੜ੍ਹਾਅ ਦਾ ਹਿੱਸਾ ਹੈ ਅਤੇ ਇਸ ਨਾਲ ਕਿਸੇ ਵੀ ਤਰ੍ਹਾਂ ਦਾ ਸੰਕਟ ਪੈਦਾ ਹੋਣ ਦੀ ਸੰਭਾਵਨਾ ਨਹੀਂ ਹੈ। 19 ਅਪ੍ਰੈਲ ਤੱਕ ਦੇ ਅੰਕੜਿਆਂ ਮੁਤਾਬਿਕ ਦੇਸ਼ ਕੋਲ ਲਗਭਗ 51 ਦਿਨਾਂ ਲਈ ਪੈਟਰੋਲ, 41 ਦਿਨਾਂ ਲਈ ਡੀਜ਼ਲ ਅਤੇ 47 ਦਿਨਾਂ ਲਈ ਜੈੱਟ ਫਿਊਲ ਮੌਜੂਦ ਹੈ। ਇਸ ਵਿੱਚ ਸਿਰਫ਼ ਦੇਸ਼ ਅੰਦਰ ਸਟੋਰ ਫਿਊਲ ਹੀ ਨਹੀਂ, ਸਗੋਂ ਸਮੁੰਦਰ ਵਿੱਚ ਮੌਜੂਦ ਅਤੇ ਰਾਹ ਵਿੱਚ ਆ ਰਹੇ ਟੈਂਕਰ ਵੀ ਸ਼ਾਮਿਲ ਹਨ।
ਪਿਛਲੇ ਅੰਕੜਿਆਂ ਨਾਲ ਤੁਲਨਾ ਕਰਨ ‘ਤੇ ਕੁਝ ਘਟਾਅ ਜ਼ਰੂਰ ਆਈ ਹੈ, ਪਰ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਆਮ ਗੱਲ ਹੈ ਅਤੇ ਸਪਲਾਈ ਚੇਨ ਦੇ ਨਿਯਮਿਤ ਹਿੱਸੇ ਵਜੋਂ ਵੇਖੀ ਜਾਂਦੀ ਹੈ। ਖਾਸ ਗੱਲ ਇਹ ਹੈ ਕਿ ਡੀਜ਼ਲ ਦਾ ਦੇਸ਼ ਅੰਦਰ ਸਟਾਕ ਅਜੇ ਵੀ ਉੱਚ ਪੱਧਰ ‘ਤੇ ਹੈ। ਇਸ ਤੋਂ ਇਲਾਵਾ, ਸਿੰਗਾਪੁਰ ਤੋਂ ਇੱਕ ਨਵਾਂ ਡੀਜ਼ਲ ਟੈਂਕਰ ਵੀ ਜਲਦੀ ਨਿਊਜ਼ੀਲੈਂਡ ਪਹੁੰਚਣ ਵਾਲਾ ਹੈ, ਜਿਸ ਨਾਲ ਸਪਲਾਈ ਹੋਰ ਮਜ਼ਬੂਤ ਹੋਵੇਗੀ।
ਅਗਲੇ ਕੁਝ ਹਫ਼ਤਿਆਂ ਵਿੱਚ ਹਲਕੇ ਉਤਾਰ-ਚੜ੍ਹਾਅ ਦੀ ਸੰਭਾਵਨਾ ਜ਼ਰੂਰ ਹੈ, ਪਰ ਇਹ ਪ੍ਰਕਿਰਿਆ ਆਮ ਹੈ ਅਤੇ ਕੰਪਨੀਆਂ ਇਸਨੂੰ ਰੋਜ਼ਾਨਾ ਅਧਾਰ ‘ਤੇ ਸੰਭਾਲਦੀਆਂ ਹਨ।
ਮੌਜੂਦਾ ਸਮੇਂ ਸਰਕਾਰ ਨਿਗਰਾਨੀ ਅਤੇ ਤਿਆਰੀ ਦੇ ਪੜਾਅ ‘ਚ ਹੈ। ਜੇ ਭਵਿੱਖ ਵਿੱਚ ਹਾਲਾਤ ਬਦਲਦੇ ਹਨ ਤਾਂ ਲੋਕਾਂ ਨੂੰ ਵਾਹਨ ਸਾਂਝੇ ਕਰਨ ਜਾਂ ਜਨਤਕ ਆਵਾਜਾਈ ਵਰਤਣ ਵਰਗੀਆਂ ਸਲਾਹਾਂ ਦਿੱਤੀਆਂ ਜਾ ਸਕਦੀਆਂ ਹਨ, ਤਾਂ ਜੋ ਸਪਲਾਈ ਅਤੇ ਮੰਗ ਵਿੱਚ ਸੰਤੁਲਨ ਬਣਾਇਆ ਰੱਖਿਆ ਜਾ ਸਕੇ।