ਅਗਲੇ ਸਾਲ ਪਾਸਪੋਰਟ ਅਰਜ਼ੀਆਂ ਵਿੱਚ ਭਾਰੀ ਵਾਧੇ ਦੀ ਉਮੀਦ ਦੇ ਨਾਲ ਨਿਊਜ਼ੀਲੈਂਡ ਸਰਕਾਰ ਲੋਕਾਂ ਨੂੰ ਉਨ੍ਹਾਂ ਦੇ ਪਾਸਪੋਰਟ ਜਲਦੀ ਰੀਨਿਊ ਕਰਨ ਦੀ ਅਪੀਲ ਕਰ ਰਹੀ ਹੈ ਤਾਂ ਜੋ ਭੀੜ ਅਤੇ ਰੀਨਿਊ ‘ਚ ਲੱਗਣ ਵਾਲੇ ਸਮੇਂ ਨੂੰ ਘਟਾਇਆ ਜਾ ਸਕੇ। ਰਿਪੋਰਟ ਅਨੁਸਾਰ ਅਗਲੇ ਦੋ ਸਾਲਾਂ ਵਿੱਚ 1.3 ਮਿਲੀਅਨ ਤੋਂ ਵੱਧ ਪਾਸਪੋਰਟ ਆਪਣੀ ਮਿਆਦ ਪੂਰੀ ਕਰਨ ਜਾ ਰਹੇ ਹਨ। ਇੰਟਰਨਲ ਅਫੇਅਰਜ਼ ਮੰਤਰੀ ਬਰੂਕ ਵੈਨ ਵੇਲਡਨ ਨੇ ਕਿਹਾ ਕਿ 10 ਸਾਲਾ ਪਾਸਪੋਰਟ ਲਾਗੂ ਹੋਣ ਦੀ ਐਨੀਵਰਸਰੀ ਕਾਰਨ, 2026 ਅਤੇ 2027 ਵਿੱਚ ਬੇਹੱਦ ਵੱਡੀ ਗਿਣਤੀ ਵਿੱਚ ਨਵੀਨੀਕਰਨ ਦੀ ਲੋੜ ਪਵੇਗੀ। 2026 ‘ਚ ਲਗਭਗ 622,000 ਅਤੇ 2027 ‘ਚ ਲਗਭਗ 759,000 ਲੋਕ ਆਪਣੇ ਪਾਸਪੋਰਟ ਰੀਨਿਊ ਕਰਵਾਉਣਗੇ। ਮੰਤਰੀ ਬਰੂਕ ਵੈਨ ਦਾ ਕਹਿਣਾ ਹੈ ਕਿ ਅਸੀਂ ਲੋਕਾਂ ਨੂੰ ਕਹਿ ਰਹੇ ਹਾਂ ਕਿ ਆਪਣੇ ਪਾਸਪੋਰਟ ਦੀ ਮਿਆਦ ਚੈੱਕ ਕਰੋ। ਜੇ ਖਤਮ ਹੋਣ ਵਾਲਾ ਹੈ, ਤਾਂ ਅਰਜ਼ੀ ਜਲਦੀ ਪਾਓ ਤਾਂ ਜੋ ਲੰਬੀਆਂ ਲਾਈਨਾਂ ਤੋਂ ਬਚ ਸਕੋ।
ਉਨ੍ਹਾਂ ਅੱਗੇ ਕਿਹਾ ਕਿ ਸਰਕਾਰ 2023 ‘ਚ ਸਾਰੇ ਪਾਸਪੋਰਟਾਂ ਲਈ ਪ੍ਰੋਸੈਸਿੰਗ ਸਮੇਂ ਨੂੰ 25 ਦਿਨਾਂ ਤੋਂ ਘਟਾ ਕੇ ਸਿਰਫ਼ ਤਿੰਨ ਦਿਨ ਕਰਨ ਵਿੱਚ ਸਫਲ ਰਹੀ ਹੈ ਅਤੇ ਉਨ੍ਹਾਂ ਨੂੰ ਉਮੀਦ ਹੈ ਕਿ ਮੰਗ ਵਧਣ ਦੇ ਬਾਵਜੂਦ ਵੀ 10 ਦਿਨਾਂ ਤੋਂ ਜ਼ਿਆਦਾ ਇੰਤਜ਼ਾਰ ਨਹੀਂ ਕਰਨਾ ਪਏਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਪਾਸਪੋਰਟ ਨੂੰ ਔਨਲਾਈਨ ਰੀਨਿਊ ਕਰਨਾ ਵੀ ਆਸਾਨ ਅਤੇ ਸੁਰੱਖਿਅਤ ਹੈ। ਜੋ ਤੁਸੀਂ passports.govt.nz. ਰਾਹੀਂ ਕਰਵਾ ਸਕਦੇ ਹੋ। ਪਰ ਇਸ ਦੌਰਾਨ ਤੁਹਾਨੂੰ ਸੈਲਫੀ ਤੋਂ ਪਰਹੇਜ਼ ਕਰਨਾ ਪਏਗਾ ਜੇ ਫੋਟੋ ਮਿਆਰਾਂ ‘ਤੇ ਖਰੀ ਨਹੀਂ ਉਤਰਦੀ ਤਾਂ ਅਰਜ਼ੀ ਲੇਟ ਹੋ ਜਾਵੇਗੀ।