ਦੁਨੀਆ ਦੇ ਸਭ ਤੋਂ ਸ਼ਕਤੀਸ਼ਾਲੀ ਪਾਸਪੋਰਟਾਂ ਦੀ ਦਰਜਾਬੰਦੀ ਕਰਨ ਵਾਲੀ ਸੰਸਥਾ, ਹੈਨਲੇ ਪਾਸਪੋਰਟ ਇੰਡੈਕਸ ਨੇ ਆਪਣੀ 2025 ਦੀ ਪਾਸਪੋਰਟ ਰੈਂਕਿੰਗ ਜਾਰੀ ਕੀਤੀ ਹੈ। ਇਸ ਰਿਪੋਰਟ ਨੇ ਅਮਰੀਕਾ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਅੰਕੜਿਆਂ ਅਨੁਸਾਰ, ਅਮਰੀਕੀ ਪਾਸਪੋਰਟ 20 ਸਾਲਾਂ ਵਿੱਚ ਪਹਿਲੀ ਵਾਰ ਦੁਨੀਆ ਦੇ ਚੋਟੀ ਦੇ 10 ਸਭ ਤੋਂ ਸ਼ਕਤੀਸ਼ਾਲੀ ਪਾਸਪੋਰਟਾਂ ਦੀ ਸੂਚੀ ਵਿੱਚੋਂ ਬਾਹਰ ਹੋ ਗਿਆ ਹੈ।
ਸਿੰਗਾਪੁਰ ਦਾ ਪਾਸਪੋਰਟ ਇਸ ਰਿਪੋਰਟ ਵਿੱਚ ਪਹਿਲੇ ਸਥਾਨ ‘ਤੇ ਹੈ, ਜਦੋਂ ਕਿ ਭਾਰਤ ਕੁਝ ਸਾਲਾਂ ਦੀ ਗਿਰਾਵਟ ਤੋਂ ਬਾਅਦ ਲਗਾਤਾਰ ਸੁਧਾਰ ਕਰ ਰਿਹਾ ਹੈ। ਇੱਕ ਸਮੇਂ ਸਿਖਰਲੇ ਦਰਜੇ ਵਾਲਾ ਪਾਸਪੋਰਟ, ਅਮਰੀਕਾ ਹੁਣ ਮਲੇਸ਼ੀਆ ਦੇ ਨਾਲ ਬਰਾਬਰ 12ਵੇਂ ਸਥਾਨ ‘ਤੇ ਆ ਗਿਆ ਹੈ। ਦੋਵਾਂ ਦੇਸ਼ਾਂ ਕੋਲ 180 ਦੇਸ਼ਾਂ ਲਈ ਵੀਜ਼ਾ-ਮੁਕਤ ਜਾਂ ਵੀਜ਼ਾ-ਆਨ-ਅਰਾਈਵਲ ਪਹੁੰਚ ਹੈ। 2024 ਵਿੱਚ, ਅਮਰੀਕਾ ਇਸ ਸੂਚੀ ਵਿੱਚ 7ਵੇਂ ਸਥਾਨ ‘ਤੇ ਸੀ।
ਹੈਨਲੇ ਰਿਪੋਰਟ ਦੇ ਅਨੁਸਾਰ, ਸਿੰਗਾਪੁਰ 193 ਦੇਸ਼ਾਂ ਤੱਕ ਵੀਜ਼ਾ-ਮੁਕਤ ਜਾਂ ਵੀਜ਼ਾ-ਆਨ-ਅਰਾਈਵਲ ਪਹੁੰਚ ਦਾ ਆਨੰਦ ਮਾਣਦਾ ਹੈ, ਜੋ ਇਸਨੂੰ ਸਿਖਰ ‘ਤੇ ਰੱਖਦਾ ਹੈ। ਦੱਖਣੀ ਕੋਰੀਆ ਅਤੇ ਜਾਪਾਨ 190 ਦੇਸ਼ਾਂ ਤੱਕ ਪਹੁੰਚ ਦੇ ਨਾਲ ਦੂਜੇ ਅਤੇ ਤੀਜੇ ਸਥਾਨ ‘ਤੇ ਹਨ। ਯੂਰਪੀਅਨ ਦੇਸ਼ ਜਿਵੇਂ ਕਿ ਸਵਿਟਜ਼ਰਲੈਂਡ, ਲਕਸਮਬਰਗ, ਜਰਮਨੀ, ਇਟਲੀ ਅਤੇ ਸਪੇਨ ਚੌਥੇ ਸਥਾਨ ‘ਤੇ ਹਨ।
ਭਾਰਤ ਨੇ ਇਸ ਵਾਰ ਚੰਗੀ ਰੈਂਕਿੰਗ ਪ੍ਰਾਪਤ ਕੀਤੀ ਹੈ। ਰਿਪੋਰਟ ਵਿੱਚ ਭਾਰਤ ਨੂੰ 85ਵਾਂ ਸਥਾਨ ਦਿੱਤਾ ਗਿਆ ਹੈ, ਜਿਸ ਵਿੱਚ 59 ਦੇਸ਼ਾਂ ਤੱਕ ਵੀਜ਼ਾ-ਮੁਕਤ ਜਾਂ ਵੀਜ਼ਾ-ਆਨ-ਅਰਾਈਵਲ ਪਹੁੰਚ ਹੈ। ਇਹ ਭਾਰਤ ਲਈ ਇੱਕ ਚੰਗੀ ਰੈਂਕਿੰਗ ਮੰਨੀ ਜਾਂਦੀ ਹੈ। ਕੋਵਿਡ-19 ਮਹਾਂਮਾਰੀ ਤੋਂ ਬਾਅਦ, ਭਾਰਤ ਦੀ ਰੈਂਕਿੰਗ 90ਵੇਂ ਸਥਾਨ ‘ਤੇ ਆ ਗਈ ਸੀ। ਹਾਲਾਂਕਿ, 2023 ਵਿੱਚ, ਭਾਰਤ 84ਵੇਂ ਸਥਾਨ ‘ਤੇ ਸੀ ਅਤੇ 2024 ਵਿੱਚ, ਇਹ 80ਵੇਂ ਸਥਾਨ ‘ਤੇ ਸੀ। ਉੱਥੇ ਹੀ ਇਸ ਸੂਚੀ ਦੇ ਵਿੱਚ ਨਿਊਜ਼ੀਲੈਂਡ ਛੇਵੇਂ ਸਥਾਨ ਦੇ ਉੱਪਰ ਹੈ। ਯਾਨੀ ਕਿ ਨਿਊਜ਼ੀਲੈਂਡ ਵਾਸੀ 186 ਦੇਸ਼ਾਂ ਤੱਕ ਵੀਜ਼ਾ-ਮੁਕਤ ਜਾਂ ਵੀਜ਼ਾ-ਆਨ-ਅਰਾਈਵਲ ਪਹੁੰਚ ਦਾ ਆਨੰਦ ਮਾਣ ਸਕਦੇ ਹਨ।