ਜ਼ਿੰਦਗੀ ‘ਚ ਲੋਕਾਂ ਲਈ ਭਲਾਈ ਦਾ ਕੰਮ ਕਰਨ ਵਾਲੇ ਵਿਅਕਤੀ ਨੂੰ ਹਮੇਸ਼ਾਂ ਯਾਦ ਰੱਖਿਆ ਜਾਂਦਾ ਹੈ। ਖਾਸ ਕਰ ਓਦੋ ਜਦੋਂ ਕਿਸੇ ਨੇ ਜਾਨਾਂ ਬਚਾਉਣ ਲਈ ਕੁਝ ਕੀਤਾ ਹੋਵੇ। ਤਾਜ਼ਾ ਮਾਮਲਾ ਨਿਊਜ਼ੀਲੈਂਡ ਦੇ ਨੌਰਥਲੈਂਡ ਖੇਤਰ ਦਾ ਹੈ ਜਿੱਥੇ Kai Iwi Lakes ‘ਤੇ ਇੱਕ ਸਥਾਨਕ ਵਿਅਕਤੀ ਨੇ ਡੁੱਬ ਰਹੇ ਇੱਕ ਪਰਿਵਾਰ ਦੇ ਚਾਰ ਮੈਂਬਰਾਂ ਦੀ ਜਾਨ ਬਚਾਈ ਸੀ। ਹੁਣ ਕੀਮਤੀ ਜਾਨਾਂ ਬਚਾਉਣ ਵਾਲੇ ‘ਐਰਨ ਸਟੌਟ’ ਨੂੰ ‘ਹੀਰੋ’ ਦੇ ਨਾਮ ਨਾਲ ਨਵਾਜਿਆ ਗਿਆ ਹੈ।
ਦੱਸ ਦੇਈਏ ਇਹ ਘਟਨਾ ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਵਾਪਰੀ ਸੀ, ਜਦੋਂ ਹਰੁਰੂ ਦਾ ਰਹਿਣ ਵਾਲਾ ਐਰਨ ਸਟੌਟ ਆਪਣੇ ਪਰਿਵਾਰ ਅਤੇ ਦੋਸਤ ਨਾਲ ਝੀਲ ਦੇ ਕੰਢੇ ਟਹਿਲ ਰਿਹਾ ਸੀ। ਉਸ ਨੇ ਪਾਣੀ ਵਿੱਚ ਦੋ ਬੱਚਿਆਂ ਨੂੰ ਮੁਸ਼ਕਿਲ ਵਿੱਚ ਦੇਖਿਆ ਅਤੇ ਕੁਝ ਹੀ ਪਲਾਂ ਵਿੱਚ ਮਾਂ ਵੀ ਪਾਣੀ ਵਿੱਚ ਡੁੱਬ ਗਈ। ਐਰਨ ਸਟੌਟ ਨੇ ਤੁਰੰਤ ਪਾਣੀ ਵਿੱਚ ਛਾਲ਼ ਮਾਰ ਮਾਂ ਤੇ ਇੱਕ ਬੱਚੇ ਨੂੰ ਬਾਹਰ ਕੱਢਿਆ। ਇਸ ਦੌਰਾਨ ਕਿਸੇ ਨੇ ਚੀਕ ਕੇ ਦੱਸਿਆ ਕਿ ਹੋਰ ਦੋ ਲੋਕ ਵੀ ਡੁੱਬ ਰਹੇ ਹਨ। ਸਟੌਟ ਨੇ ਪਾਣੀ ਵਿੱਚ ਡੁੱਬ ਕੇ ਦੋ ਹੋਰ ਲੋਕਾਂ ਨੂੰ ਵੀ ਬਾਹਰ ਕੱਢਿਆ। ਇਸ ਦੌਰਾਨ ਇੱਕ ਬੱਚਾ ਬੇਹੋਸ਼ ਹੋ ਚੁੱਕਾ ਸੀ ਅਤੇ ਉਸ ਦਾ ਰੰਗ ਨੀਲਾ ਪੈ ਗਿਆ ਸੀ। ਸਟੌਟ ਨੇ ਉਸ ਨੂੰ ਕੰਢੇ ‘ਤੇ ਲਿਆ ਕੇ ਮੁੱਢਲੀ ਸਹਾਇਤਾ ਦਿੱਤੀ ਜਿਸ ਨਾਲ ਬੱਚਾ ਦੁਬਾਰਾ ਸਾਹ ਲੈਣ ਲੱਗ ਪਿਆ। ਇਸ ਤੋਂ ਬਾਅਦ ਮੌਕੇ ‘ਤੇ ਇੱਕ ਨਰਸ ਅਤੇ ਐਂਬੂਲੈਂਸ ਕਰਮਚਾਰੀ ਪਹੁੰਚੇ ਅਤੇ ਪਰਿਵਾਰ ਨੂੰ ਤੁਰੰਤ ਮੈਡੀਕਲ ਸਹਾਇਤਾ ਦਿੱਤੀ ਗਈ। ਪੁਲਿਸ ਦੇ ਸੀਨੀਅਰ ਸਰਜੰਟ ਡੇਵ ਵਿਲਕਿਨਸਨ ਨੇ ਐਰਨ ਸਟੌਟ ਨੂੰ “ਹੀਰੋ” ਕਹਿੰਦੇ ਹੋਏ ਕਿਹਾ ਕਿ ਉਸ ਨੇ ਬਿਨਾਂ ਦੇਰੀ ਕੀਤੇ ਪਾਣੀ ਵਿੱਚ ਛਾਲ ਮਾਰ ਕੇ ਚਾਰ ਜਿੰਦਗੀਆਂ ਬਚਾਈਆਂ ਹਨ।