ਨਿਊਜ਼ੀਲੈਂਡ ਦੇ ਸਭ ਤੋਂ ਵੱਡੇ ਬੈਂਕ ANZ ਨੇ ਆਪਣੇ ਫਲੋਟਿੰਗ ਹੋਮ ਲੋਨ, ਕਾਰੋਬਾਰੀ ਕਰਜ਼ਿਆਂ ਅਤੇ ਓਵਰਡਰਾਫਟ ਦੀਆਂ ਵਿਆਜ ਦਰਾਂ ਵਿੱਚ 0.25 ਫੀਸਦੀ ਦਾ ਵਾਧਾ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਫੈਸਲੇ ਨਾਲ ਫਲੋਟਿੰਗ ਹੋਮ ਲੋਨ ਵਾਲੇ ਗਾਹਕਾਂ ਨੂੰ ਹੁਣ ਵੱਧ ਕਿਸ਼ਤਾਂ ਅਦਾ ਕਰਣੀਆਂ ਪੈਣਗੀਆਂ। ਬੈਂਕ ਦੇ ਫਲੋਟਿੰਗ ਹੋਮ ਲੋਨ ਦੀ ਵਿਆਜ ਦਰ 5.79% ਤੋਂ ਵਧਾ ਕੇ 6.04% ਕਰ ਦਿੱਤੀ ਗਈ ਹੈ। ਇਹ ਨਵੀਆਂ ਦਰਾਂ 15 ਜੁਲਾਈ ਤੋਂ ਨਵੇਂ ਕਰਜ਼ਿਆਂ ‘ਤੇ ਲਾਗੂ ਹੋਣਗੀਆਂ, ਜਦਕਿ ਮੌਜੂਦਾ ਗਾਹਕਾਂ ਲਈ 29 ਜੁਲਾਈ ਤੋਂ ਲਾਗੂ ਕੀਤੀਆਂ ਜਾਣਗੀਆਂ। ਇਸੇ ਤਰ੍ਹਾਂ, ਫਲੇਕਸਿਬਲ ਹੋਮ ਲੋਨ ਦੀ ਵਿਆਜ ਦਰ 5.90% ਤੋਂ ਵਧਾ ਕੇ 6.15% ਕਰ ਦਿੱਤੀ ਗਈ ਹੈ, ਜੋ 29 ਜੁਲਾਈ ਤੋਂ ਪ੍ਰਭਾਵੀ ਹੋਵੇਗੀ।
ਇਹ ਵਾਧਾ ਉਸ ਤੋਂ ਬਾਅਦ ਕੀਤਾ ਗਿਆ ਹੈ ਜਦੋਂ ਰਿਜ਼ਰਵ ਬੈਂਕ ਆਫ ਨਿਊਜ਼ੀਲੈਂਡ ਨੇ ਤਿੰਨ ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਆਫ਼ੀਸ਼ੀਅਲ ਕੈਸ਼ ਰੇਟ (OCR) ਵਿੱਚ ਵਾਧਾ ਕੀਤਾ ਸੀ। ਇਸ ਤੋਂ ਬਾਅਦ ਦੇਸ਼ ਦੇ ਹੋਰ ਵੱਡੇ ਬੈਂਕ ASB, BNZ ਅਤੇ Westpac ਨੇ ਵੀ ਆਪਣੀਆਂ ਫਲੋਟਿੰਗ ਹੋਮ ਲੋਨ ਦਰਾਂ ਵਿੱਚ 0.25 ਫੀਸਦੀ ਦਾ ਵਾਧਾ ਕਰ ਦਿੱਤਾ ਹੈ। ਕਾਰੋਬਾਰੀ ਗਾਹਕਾਂ ਲਈ ਵੀ ANZ ਨੇ ਟਰਮ ਲੋਨ ਦੀ ਫਲੋਟਿੰਗ ਬੇਸ ਰੇਟ 4.10% ਤੋਂ ਵਧਾ ਕੇ 4.35% ਕਰ ਦਿੱਤੀ ਹੈ।
ਦੂਜੇ ਪਾਸੇ, ਬਚਤ ਕਰਨ ਵਾਲੇ ਗਾਹਕਾਂ ਲਈ ਕੁਝ ਰਾਹਤ ਵੀ ਦਿੱਤੀ ਗਈ ਹੈ। Serious Saver ਖਾਤੇ ਦੀ ਪ੍ਰੀਮੀਅਮ ਵਿਆਜ ਦਰ 1.75% ਕਰ ਦਿੱਤੀ ਗਈ ਹੈ, ਜਿਸ ਨਾਲ ਯੋਗ ਗਾਹਕਾਂ ਲਈ ਕੁੱਲ ਵਿਆਜ ਦਰ 1.80% ਹੋ ਜਾਵੇਗੀ। ਇਹ ਦਰ 1 ਅਗਸਤ ਤੋਂ ਲਾਗੂ ਹੋਵੇਗੀ, ਬਸ਼ਰਤੇ ਗਾਹਕ ਕੋਈ ਰਕਮ ਨਾ ਕੱਢਣ ਅਤੇ ਹਰ ਮਹੀਨੇ ਘੱਟੋ-ਘੱਟ 20 ਡਾਲਰ ਜਮ੍ਹਾਂ ਕਰਵਾਉਣ।
ANZ ਦੇ ਬੁਲਾਰੇ ਨੇ ਕਿਹਾ ਕਿ ਬੈਂਕ ਵਿਆਜ ਦਰਾਂ ਦੀ ਸਮੇਂ-ਸਮੇਂ ‘ਤੇ ਸਮੀਖਿਆ ਕਰਦਾ ਰਹੇਗਾ। ਉਨ੍ਹਾਂ ਮੁਤਾਬਕ, ਦਰਾਂ ਤੈਅ ਕਰਦੇ ਸਮੇਂ ਗਾਹਕਾਂ ‘ਤੇ ਪ੍ਰਭਾਵ, ਫੰਡ ਇਕੱਠੇ ਕਰਨ ਦੀ ਲਾਗਤ, ਅੰਤਰਰਾਸ਼ਟਰੀ ਅਤੇ ਸਥਾਨਕ ਬਾਜ਼ਾਰਾਂ ਦੀ ਸਥਿਤੀ ਅਤੇ ਹੋਰ ਬੈਂਕਾਂ ਦੀਆਂ ਦਰਾਂ ਨੂੰ ਧਿਆਨ ਵਿੱਚ ਰੱਖਿਆ ਜਾਂਦਾ ਹੈ।
ਉਧਰ BNZ ਨੇ ਆਪਣੀ ਸਟੈਂਡਰਡ ਵੇਰੀਏਬਲ ਹੋਮ ਲੋਨ ਦਰ 6.09% ਕਰ ਦਿੱਤੀ ਹੈ, ਜਦਕਿ ਤਿੰਨ ਹੋਰ ਵੇਰੀਏਬਲ ਦਰਾਂ 6.19% ਤੱਕ ਵਧਾ ਦਿੱਤੀਆਂ ਹਨ। ਹਾਲਾਂਕਿ, ਬੈਂਕ ਨੇ ਆਪਣੀਆਂ ਫਿਕਸਡ ਹੋਮ ਲੋਨ ਦਰਾਂ ਵਿੱਚ ਕੋਈ ਤਬਦੀਲੀ ਨਹੀਂ ਕੀਤੀ।
Westpac ਨੇ ਵੀ ਆਪਣੇ ਫਲੋਟਿੰਗ ਹੋਮ ਅਤੇ ਕਾਰੋਬਾਰੀ ਕਰਜ਼ਿਆਂ ਦੀਆਂ ਵਿਆਜ ਦਰਾਂ ਵਿੱਚ 0.25 ਫੀਸਦੀ ਦਾ ਵਾਧਾ ਕੀਤਾ ਹੈ। ਇਸੇ ਤਰ੍ਹਾਂ ASB ਨੇ ਆਪਣੀ ਹਾਊਸਿੰਗ ਵੇਰੀਏਬਲ ਦਰ 6.04% ਅਤੇ Orbit ਵੇਰੀਏਬਲ ਦਰ 6.14% ਕਰ ਦਿੱਤੀ ਹੈ।
ASB ਦੇ ਪਰਸਨਲ ਬੈਂਕਿੰਗ ਮੁਖੀ ਐਡਮ ਬੋਇਡ ਨੇ ਮੰਨਿਆ ਕਿ ਵਿਆਜ ਦਰਾਂ ਵਿੱਚ ਇਹ ਵਾਧਾ ਕਈ ਪਰਿਵਾਰਾਂ ਲਈ ਮੁਸ਼ਕਿਲਾਂ ਪੈਦਾ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਗਾਹਕਾਂ ਨੂੰ ਆਪਣੇ ਹੋਮ ਲੋਨ ਦੀਆਂ ਕਿਸ਼ਤਾਂ ਭਰਨ ਵਿੱਚ ਦਿੱਕਤ ਆ ਰਹੀ ਹੈ, ਉਹ ਜਲਦੀ ਬੈਂਕ ਨਾਲ ਸੰਪਰਕ ਕਰਨ ਤਾਂ ਜੋ ਉਨ੍ਹਾਂ ਲਈ ਉਚਿਤ ਵਿਕਲਪ ਲੱਭੇ ਜਾ ਸਕਣ।