ਨਿਊਜ਼ੀਲੈਂਡ ਵਿੱਚ ਵਿਦੇਸ਼ੀ ਨਿਵੇਸ਼ ਕਾਨੂੰਨਾਂ ਨੂੰ ਦਰਕਿਨਾਰ ਕਰਕੇ ਸੰਵੇਦਨਸ਼ੀਲ ਖੇਤੀਬਾੜੀ ਜ਼ਮੀਨ ਖਰੀਦਣ ਦੇ ਮਾਮਲੇ ਵਿੱਚ ਦੋ ਵਿਅਕਤੀਆਂ ‘ਤੇ ਕੁੱਲ $440,000 ਡਾਲਰ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਆਸਟ੍ਰੇਲੀਆਈ ਨਾਗਰਿਕ Daniel Klaus ਨੇ Hawke’s Bay ਦੇ ਉੱਤਰੀ ਇਲਾਕੇ ਵਿੱਚ 91 ਹੈਕਟੇਅਰ ਖੇਤੀਬਾੜੀ ਜ਼ਮੀਨ $4.5 ਮਿਲੀਅਨ ਵਿੱਚ ਖਰੀਦੀ ਸੀ, ਜਿਸ ਵਿੱਚ ਨਿਊਜ਼ੀਲੈਂਡ ਨਾਗਰਿਕ Michael Newcomb ਨੇ ਉਸਦੀ ਮਦਦ ਕੀਤੀ। Overseas Investment Act ਅਨੁਸਾਰ ਇਹ ਜ਼ਮੀਨ “Sensitive Land” ਵਿੱਚ ਆਉਂਦੀ ਸੀ, ਇਸ ਲਈ ਇਸਦੀ ਖਰੀਦ ਲਈ Overseas Investment Office ਦੀ ਮਨਜ਼ੂਰੀ ਲਾਜ਼ਮੀ ਸੀ।
ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਕ Daniel Klaus ਕੋਲ ਕ੍ਰਿਪਟੋਕਰੰਸੀ ਸੀ ਜਿਸਨੂੰ ਉਹ ਨਕਦੀ ਵਿੱਚ ਬਦਲਣਾ ਚਾਹੁੰਦਾ ਸੀ। ਇਸ ਲਈ ਉਸਨੇ ਇੱਕ ਨਿਊਜ਼ੀਲੈਂਡ ਰਜਿਸਟਰਡ ਕੰਪਨੀ ਬਣਾਕੇ Michael Newcomb ਨੂੰ ਲੋਕਲ ਸਾਥੀ ਵਜੋਂ ਵਰਤਿਆ, ਤਾਂ ਜੋ ਕਾਨੂੰਨੀ ਮਨਜ਼ੂਰੀ ਤੋਂ ਬਿਨਾਂ ਜ਼ਮੀਨ ਦੀ ਡੀਲ ਕੀਤੀ ਜਾ ਸਕੇ। ਜਾਂਚ ਦੌਰਾਨ ਇਹ ਸਾਬਿਤ ਹੋਇਆ ਕਿ ਇਹ Overseas Investment Act ਦੀ ਉਲੰਘਣਾ ਸੀ, ਕਿਉਂਕਿ ਕਾਨੂੰਨ ਵਿਦੇਸ਼ੀ ਨਿਵੇਸ਼ਕਾਂ ਨੂੰ “front person” ਦੀ ਮਦਦ ਨਾਲ ਨਿਯਮਾਂ ਤੋਂ ਬਚਣ ਦੀ ਆਗਿਆ ਨਹੀਂ ਦਿੰਦਾ।
ਬਾਅਦ ਵਿੱਚ ਦੋਵਾਂ ਵਿਚਾਲੇ ਤਣਾਅ ਵਧ ਗਿਆ ਅਤੇ Michael Newcomb ਨੇ ਕੰਪਨੀ ਛੱਡ ਕੇ ਆਪਣੇ ਸਾਰੇ ਸ਼ੇਅਰ Daniel Klaus ਦੇ ਨਾਮ ਕਰ ਦਿੱਤੇ। ਇਸ ਨਾਲ Klaus ਸਿੱਧੇ ਤੌਰ ‘ਤੇ ਸੰਵੇਦਨਸ਼ੀਲ ਜ਼ਮੀਨ ਦਾ ਮਾਲਕ ਬਣ ਗਿਆ, ਜੋ ਕਿ ਇੱਕ ਹੋਰ ਕਾਨੂੰਨੀ ਉਲੰਘਣਾ ਸੀ। ਬਾਅਦ ਵਿੱਚ ਇਹ ਜ਼ਮੀਨ ਇੱਕ ਨਿਊਜ਼ੀਲੈਂਡ ਕੰਪਨੀ ਨੂੰ $3.1 ਮਿਲੀਅਨ ਵਿੱਚ ਵੇਚ ਦਿੱਤੀ ਗਈ।
Land Information New Zealand (LINZ) ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਤਾਂ ਦੋਵੇਂ ਵਿਅਕਤੀ ਦੇਸ਼ ਛੱਡ ਗਏ। ਉਨ੍ਹਾਂ ਦੀ ਗੈਰਹਾਜ਼ਰੀ ਵਿੱਚ ਹੀ High Court ਨੇ Daniel Klaus ਨੂੰ $350,000 ਜੁਰਮਾਨਾ ਅਤੇ $15,000 ਖਰਚੇ ਭਰਨ ਦੇ ਹੁਕਮ ਦਿੱਤੇ, ਜਦਕਿ Michael Newcomb ‘ਤੇ $90,000 ਜੁਰਮਾਨਾ ਅਤੇ $15,000 ਖਰਚੇ ਲਗਾਏ ਗਏ।
LINZ ਦੀ Compliance Leader Susan Smith ਨੇ ਕਿਹਾ ਕਿ Overseas Investment Act ਦਾ ਮਕਸਦ ਨਿਊਜ਼ੀਲੈਂਡ ਦੀ ਸੰਵੇਦਨਸ਼ੀਲ ਜ਼ਮੀਨ ਦੀ ਰੱਖਿਆ ਕਰਨਾ ਹੈ ਅਤੇ ਇਹ ਯਕੀਨੀ ਬਣਾਉਣਾ ਹੈ ਕਿ ਵਿਦੇਸ਼ੀ ਨਿਵੇਸ਼ ਦੇਸ਼ ਦੇ ਹਿੱਤ ਵਿੱਚ ਹੋਵੇ। ਉਨ੍ਹਾਂ ਕਿਹਾ ਕਿ ਇਹ ਫੈਸਲਾ ਸਪਸ਼ਟ ਸੰਦੇਸ਼ ਹੈ ਕਿ ਕਾਨੂੰਨ ਤੋਂ ਬਚਣ ਦੀ ਹਰ ਕੋਸ਼ਿਸ਼ ‘ਤੇ ਕਾਰਵਾਈ ਕੀਤੀ ਜਾਵੇਗੀ, ਭਾਵੇਂ ਸੰਬੰਧਤ ਵਿਅਕਤੀ ਨਿਊਜ਼ੀਲੈਂਡ ਤੋਂ ਬਾਹਰ ਹੀ ਕਿਉਂ ਨਾ ਹੋਣ।